وحدت نیوز(کھرمنگ)مجلس وحدت مسلمین گلگت بلتستان کے صوبائی رہنما نصرت علی نے حلقہ نمبر بارہ کھرمنگ سے الیکشن میں حصہ لینے کا اعلان کردیا۔ اپنے بیان میں معروف سیاسی و سماجی رہنما کا کہنا تھا کہ مجلس وحدت مسلمین کی قیادت کے ہر حکم پر عمل کرتے ہوئے عوام کی بھرپور ترجمانی کیلئے الیکشن میں حصہ لینے کا ارادہ کیا ہے۔ مجلس وحدت مسلمین عوام کی ترجمان جماعت جبکہ آغا علی رضوی، شیخ احمد علی نوری اور شیخ اکبر رجائی جیسے سیاسی و مذہبی رہنمامجلس وحدت مسلمین ہی کی نہیں بلکہ علاقہ بھر کے عوام کی طاقتور ترین آواز ہر دکھ درد میں نکلنے والی بے باک و بے لوث شخصیات ہیں۔ الیکشن کیلئے پارٹی ٹکٹ کا امیدوار ہوں اور سیاسی کونسل اور قیادت کے ہر فیصلے کو دل و جان سے تسلیم کرنے کیلئے پر عزم ہوں۔
نصرت علی کا کہنا تھا کہ مجلس وحدت مسلمین نے اقدار کی سیاست کا عملی مظاہرہ گزشتہ پانچ سالوں کے دوران بھرپور انداز میں کیا ہے، جبکہ الیکشن میں کامیابی کی صورت میں ہم کھرمنگ عوام کو بھی عملا اس حقیقت سے واقف کرائیں گے کہ موروثی اور مفادات کی سیاست کی بجائے اقدار کی سیاست اور عوام کی حقیقی نمائندگی کا حق کیسے ادا ہوتا ہے۔