وحدت نیوز(مظفرآباد)آزاد کشمیر حکومت سانحہ مچھ پر جاندار آواز اٹھائے ، حکومت پاکستان کو ہوش کے ناخن دلائے ، ریاست مدینہ کے دعویدار عمران خان کو ہر صورت کوئٹہ جانا ہو گا ورنہ نواب اسلم رئیسانی کا انجام یاد رکھیں ان خیالات کا اظہار مولانا سید حمید حسین نقوی ڈپٹی سیکرٹری جنرل مجلس وحدت مسلمین آزاد جموں و کشمیر نے وحدت سیکرٹریٹ مظفرآباد سے جاری ایک بیان میں کیا ۔

انہوں نے کہا کہ آزاد کشمیر حکومت کی خاموشی بھی سمجھ سے بالا تر ہے مذمت تک کا بیان سامنے نہیں آیا ، اس بات سے بخوبی واقف ہیں کہ اسی حکومت کے دور میں مرد مجاہد ممتاز عالم دین داعی اتحاد بین المسلمین علامہ سید تصور نقوی اور ان کی اہلیہ پر دن دیہاڑے گولیاں برسائیں گئیں ، نہ حملہ آوروں کا پتہ اور نہ ہی فاروق حیدر کے وعدوں کا ۔ فاروق حیدر نے ملاقات کے دوران کئی وعدے کیے مگر سب ہوائی ثابت ہوئے لیکن ہم مطالبہ کرتے ہیں کہ سانحہ مچھ پر جاندار آواز اٹھائی جائے۔

 انہوں نے کہا کہ ہزارہ برادری کا قتل عام اور مجرمانہ خاموشی دال میں کالا نہیں بلکہ پوری دال کالی کر رہی ہے ، قانون نافذ کرنے والے ادارے ناکام ہو کے رہ گئے ، ریاست مدینہ کے دعویدار خواب خرگوش کے مزے لے رہے ہیں ، ایسا نہ ہو کہ ہمیں پھر سے پورا پاکستان بند کرنا پڑے ، جب ہم سڑکوں پر نکلے تو تمہیں گھر جانا ہو گا ، اس لیے ہوش کے ناخن لیے جائیں بصورت دیگر ریاست بھر میں دھرنے دیں گے۔