وحدت نیوز (قم) کوئٹہ کے شہداء کے لیے مجلس وحدت مسلمین پاکستان (شعبہ قم المقدسہ) کے زیراہتمام منعقدہ مجلس ترحیم سے خطاب کرتے ہوئے علامہ سید ہاشم موسوی نے کہا کہ 2003ء سے اب تک کی شہادتوں میں قومی پلیٹ فارم منظم نہ ہونے کی وجہ سے ملت کے جذبات کو صحیح رخ نہیں دے سکے، لیکن تین سالوں میں پورے پاکستان میں ایم ڈبلیو ایم کی فعالیت کی وجہ سے کوئٹہ سمیت پورے ملک میں ملت کی طاقت کا اظہار کیا اور قومی پلیٹ فارم نے شہداء کے خون کو طاقت میں تبدیل کیا۔ رکن شوری عالی ایم ڈبلیو ایم پاکستان کا مزید کہنا تھا کہ حالیہ سانحہ کوئٹہ  موجودہ حکومت کے منہ پر طمانچہ اور بہت بڑا چیلنج ہے، سابقہ حکومت سے درس عبرت لیتے ہوئے موجودہ حکومت کو دہشت گردی کے خلاف منظم کارروائی کرنی چاہیے، ورنہ ملت تشیع اپنی بیداری کے ذریعے آئندہ کے لیے ٹھوس لائحہ عمل طے کرنے پر مجبور ہوگی اور فرزندان یزید کو کربلائے عصر میں ایسی تاریخی شکست دیں گے جسے انکی نسلیں یاد رکھیں گی۔