وحدت نیوز(گلگت) گلگت بلتستان قانون ساز اسمبلی کے ڈپٹی سپیکر کے کیپٹن محمد شفیع کو سٹینڈنگ کمیٹی سے برطرفی کے فیصلے کوعدالت کی جانب سے منسوخ کرنا آزاد عدلیہ کی دلیل ہے۔صوبائی حکومت کا انداز حکمرانی آمرانہ ہے جو اپوزیشن کو برداشت نہیں کرتے۔ رکن اسمبلی کیپٹن شفیع کو حق حاصل ہے کہ وہ حکومتی اقربا پروری اور کرپشن پر تنقید کرے۔
مجلس وحدت مسلمین گلگت بلتستان کے ترجمان محمد الیاس صدیقی نے عدالت کی جانب سے ڈپٹی سپیکر قانون ساز اسمبلی کے نوٹیفکیشن کا منسوخ کرنا اور کیپٹن شفیع کو اپنے عہدے پر بحال رکھنے کو حق کی فتح اور جیت قرار دیا ہے۔مسلم لیگ ن آمریت کی پیداوار ہے ،جب ان کو اقتدار حاصل ہوتا ہے تو مطلق العنان بن جاتے ہیں۔کیپٹن شفیع کی جانب سے حکومتی کرپشن کو بے نقاب کرنے پر ان کو عہدے سے ہٹانا اسی مطلق العنانیت کی دلیل ہے۔
انہوں نے کہا کہ اگر اداروں نے حکومتی اقدامات پر چیک نہیں رکھا تو اقتدار کے ایوانوں میں براجمان افراد مطلق العنان بادشاہ بن جائینگے۔لیگی وزیر اعلیٰ اور اس کی ٹیم بظاہر میرٹ کے بلند بانگ دعوے کرتی ہے اور درون خانہ کرپشن کے ریکارڈ قائم کئے جارہے ہیں،کسی محکمے میں ملازمت حاصل کرنے کیلئے لازم ہے کہ امیدوار کو لازم ہے کہ وہ وزیر اعلیٰ یا دیگر وزراء کے رشتہ دار ہوں اور محکمہ ورکس میں تمام ٹھیکے من پسند افراد میں بانٹ دیئے جاتے ہیں اور پری کوالیفکیشن کے نام پر ایسے ٹھیکداروں کو پری کیا جاتا ہے جو ان کے منظور نظر ہوتے ہیں۔انہوں نے اپوزیشن ممبران پر زوردیا کہ وہ میرٹ کے قتل عام پرخاموشی اور سکوت کو توڑکر حقدار کو حق دلانے کیلئے اپنا کردار ادا کریں۔