اسلام آباد ( وحدت نیوز) مجلس وحدت مسلمین پاکستان پنجاب کے سیکرٹری جنرل علامہ عبدالخالق اسدی نے کہا ہے کہ وطن عزیز پاکستان کی بنیادیں کھوکھلی کرنیوالے دہشت گردوں کے ساتھ مذاکرات کی حکومتی پالیسی، انہیں قانونی تحفظ فراہم کرنے کی سنگین ساز ش ہے، جسے ناکام بنانے کے لئے ملت کو وحدت کی لڑی میں پرونے کی ضرورت ہے، سرزمین اسلام آباد پر منعقدہ دفاع وطن کنونشن سے خطاب کرتے ہوئے ایم ڈبلیو ایم کے صوبائی سیکرٹری جنرل کا کہنا تھا کہ اس وقت پورا ملک دہشت گردوں، قاتلوں ،اور لٹیروں کی مذموم کاروائیوں کی زد میں ان کا مقابلہ اتحاد کی قوت کے ساتھ ہی کیا جا سکتا ہے، ایم ڈبلیو ایم اتحاد بین ا لمسلمین کی علمبردار ہے اور قوم کو متحد کرنے کے لئے اپنی تمام توانائیاں بروئے کار لارہی ہے۔
انہوں نے کہا کہ گزشتہ سال مینار پاکستان پر منعقد ہونیوالے قرآن و سنت کے تاریخ ساز اجتماع نے وطن عزیز پاکستان میں تبدیلی کی بنیاد رکھی اور آج کا اجتماع بھی اسی کا تسلسل ہے ، انشاء اللہ وحدت کے پرچم کے سائے میں صرف ملت تشیع کو ہی نہیں، ہر مکتب فکر کے فرد کو بلا تفریق تحفظ ملے گا۔ ہم شہدا کے وارث ہیں اور گزشتہ پچیس برسوں سے قربایاں دے رہے ہیں، کوئی قانون، کوئی اداری ہمیں انصاف فراہم نہیں کرتا۔ انہوں نے بھکر، ڈی آئی خان، کوئٹہ، گلگت، کراچی کوئٹہ اور پارا چنار سمیت ملک کے مختلف علاقوں میں دہشت گردی کا نشانہ بننے والے شہداء کو شاندار الفاظ میں خراف عقیدت پیش کیا ۔ ان کا کہنا تھا کہ بھکر میں ملت تشیع نے ناموس امامت کے تحفظ کیلئے خون کانذرانہ پیش کیا۔ انہوں نے توقع ظاہر کی کہ ملت تشیع ، مصائب و ابتلا کی اس مشکل گھڑی میں انتہائی صبروتحممل کے ساتھ اپنا قومی سفر جاری رکھے گی۔