وحدت نیوز(لاڑکانہ) مجلس وحدت مسلمین صوبہ سندھ کے سیکریٹری جنرل علامہ مقصود علی ڈومکی نے وارثان شہداء کمیٹی کے ایک وفد کے ہمراہ کمشنر لاڑکانہ سے ملاقات کی ،اس موقع پر سکندر علی دل،قمر دین شیخ،سید غلام شبیر شاہ نقوی ،سید محمد شاہ کاظمی ،ڈپٹی کمشنر جیکب آباد ،ڈپٹی کمشنر شکارپور و دیگر موجود تھے۔
           
اس موقع پر گفتگو کرتے ہوئے علامہ مقصود علی ڈومکی نے کہا سندھ حکومت نے وارثان شہداء سے کیا گیا اپنا وعدہ پورہ نہیں کیا،خالی وعدوں کے بجائے سندھ حکومت کو عملی اقداما ت کرنا ہوں گے۔
             
انہوں نے مطالبہ کیا کہ کالعدم جماعتوں کے ٹریننگ کیمپس کیخلاف پولیس اور رینجرز کا مشتر کہ آپریشن کیا جائے۔سانحات کے زخمیوں کا مکمل علاج اور بقیہ معاوضہ ادا کیا جائے،اور ان سانحات میں ملوث دہشتگرد گروہ کے خلاف جو اقدامات ہوئے ہیں اس سے متعلق ہمیں تفصیلی بریفنگ دی جائے،اس موقع پر کمشنر نے کہا کہ وہ ان مسائل سے متعلق سندھ گورنمنٹ سے بات چیت کریں گے۔