وحدت نیوز (کوئٹہ) مجلس وحدت مسلمین بلوچستان کے سیکریٹری جنرل علامہ مقصودعلی ڈومکی نے ڈیرہ مراد جمالی ضلع نصیر آباد کا دورہ کیا ،اس موقع پر صوبائی ڈپٹی سیکریٹری جنرل مولانا سید ظفر عباس شمسی ، مولانا مشتاق حسین عمرانی، الٰہی بخش کھیازئی و دیگر ان کے ہمراہ تھے،اس موقع پر مرکزی امام بارگاہ ڈیرہ مراد جمالی اور ممتاز ہاؤس ڈیرہ مراد میں گفتگو کرتے ہوئے انہوں نے کہا کہ بدقسمتی سے سیاستدانوں کی ترجیح عوام کی خدمت کی بجائے ذاتی مفادات کا حصول اور کرپشن ہے اسی لئے عوامی مسائل اور مشکلات پر خاموش رہنے والے سیاسی رہنماؤں کے ذاتی مفادات پر کڑا وقت آتا ہے تو وہ چیخ اٹھتے ہیں۔انہوں نے کہا کہ دھشت گردی اور کرپشن کے خلاف اقدامات کو پوری قوم کی تائید حاصل ہے۔
انہوں نے کہا کہ احتساب کا عمل جاری رہنا چاہئے تاکہ کرپشن کے بڑہتے ہوئے رجحان اور اداروں کی تباہی کو روکا جاسکے۔انہوں نے کہا کہ مجلس وحدت مسلمین ملک سے دھشت گردی، فرقہ وارانہ منافرت اور کرپشن کا خاتمہ چاہتی ہے۔ مگر یہ اقدامات انصاف کے اصولوں کے مطابق ہونے چاہیءں جس پر جانبداری کا شبہ نہیں ہونا چاہئے۔ علامہ امین شہیدی ملک میں امن و اتحاد کے علمبردار ہیں ان کے خلاف اقدام حکومت کی ظالمانہ بیلنس پالیسی کا حصہ ہے۔ اس سے قبل مشرف دور میں سینکڑوں معصوم اور شریف کارکنوں اور ملت جعفریہ کے رہنماؤں کو بیلنس پالیسی کے تحت پابند سلاسل کیا گیا تھا۔
انہوں نے وفد کے ہمراہ ڈی پی او نصیر آباد سلیم لہڑی، کمشنرنصیر آباد اور چیئرمین ڈیرہ مراد جمالی، میر غلام نبی عمرانی سے ملاقات کی اور مسائل پر گفتگو کی۔