وحدت نیوز(روندو) مجلس وحدت مسلمین کے ارکان گلگت بلتستان اسمبلی شیخ اکبر علی رجائی، صوبائی وزیر ذراعت محمد کاظم میثم، محترمہ ڈاکٹر فاطمہ علی تنظیمی رہنماؤں کے ہمراہ روندو پہنچ گئے۔ روندو میں مجلس وحدت مسلمین کے سابق امیدوار علامہ ڈاکٹر مشتاق حکیمی، رکن کونسل مولانا جان حیدری، صوبائی رہنماؤں حاجی زرمست خان، مولانا محمد اسحاق اور دیگر نے پرتپاک استقبال کیا۔
اس موقع پر گفتگو کرتے ہوئے رکن صوبائی اسمبلی شیخ اکبر رجائی اور صوبائی وزیر ذراعت محمد کاظم میثم نے کہا کہ سب سے اہم بات جس پر ہمیں فخر ہے وہ یہ کہ مجلس وحدت مسلمین کی بابصیرت قیادت نے عوامی نمائندگی کااہل سمجھ کر انتخاب کیا۔ اسمبلی رکنیت اور عہدہ عظیم آزمائش ہے جس میں سرخرو ہونے کیلئے دن رات محنت کیساتھ ساتھ توفیقات الہیٰ حاصل ہونے کیلئے بزرگوں کی دعاؤں کی ضرورت ہے۔
اراکین اسمبلی نے کہاکہ انشاللہ قیادت اور عوام کی توقعات پر پورا اترتے ہوئے خطے اور عوام کے مسائل کے حل کیلئے تمام تر توانائیوں کو بروئے کار لائیں گے۔