وحدت نیوز(جعفرآباد) مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے بلوچستان کے ضلع جعفر آباد پہنچ کر بارش و سیلاب متاثرین کے خیموں میں متاثرین سے ملاقات کی اور ضلعی ہیڈکوارٹر ڈیرہ اللہ یار میں فلاح انسانیت فاؤنڈیشن و دیگر رضا کاروں سے ملاقات کی۔
اس موقع پر ایم ڈبلیو ایم کے شعبہ عزاداری کونسل کے چیئرمین برادر شمن علی حیدری برادر ظفر علی مولانا محمد سچل صادقی مولانا محمد حسین جسکانی صحافی نذیر حسین ڈومکی بشیر احمد ڈومکی اور ایم ڈبلیو ایم کے کارکن موجود تھے۔اس موقع پر علامہ مقصود علی ڈومکی نے متاثرہ گاؤں کا وزٹ کیا اور متاثرہ مکانات اور مسجد کا جائزہ لیا جہاں اس وقت بھی کئی فٹ پانی کھڑا تھا۔
اس موقع پر گفتگو کرتے ہوئے علامہ مقصود علی ڈومکی نے کہا کہ مشکل کی اس گھڑی میں فلاحی ادارے اور پوری قوم متاثرین کے ساتھ ہے پاکستانی قوم اپنے سیلاب متاثرہ بہن بھائیوں کے ساتھ کھڑی ہے اور ان کے درد کو پوری شدت کے ساتھ محسوس کر رہی ہے۔
انہوں نے کہا کہ پوری قوم کا دل اھل بلوچستان کے ساتھ دھڑکتا ہے اور بلوچستان کی مظلومیت اور محرومیت کا خاتمہ ضروری ہے۔ وفاقی اور صوبائی حکومتیں الفاظ اور دعوؤں کی بجائے عملی اقدامات کے ذریعے متاثرین کی مدد کریں۔ بدقسمتی سے حکومت متاثرہ علاقوں میں کہیں نظر نہیں آ رہی ہزاروں لوگ روڈوں پر کھلے آسمان تلے بیٹھے ہیں مگر کسی کے پاس ٹینٹ نہیں۔ دھوپ اور بارش میں لوگ پلاسٹک کی تھیلیوں اور کپڑے کی چادر سے خیمہ کا کام لے رہے ہیں۔
انہوں نے کہا کہ مجلس وحدت مسلمین کے کارکن درد کی اس گھڑی میں متاثرین کے ساتھ ہیں ان مظلوموں اور محروموں کی خدمت کو ہم عظیم عبادت سمجھتے ہیں۔
