وحدت نیوز (اسلام آباد) مجلس وحدت مسلمین پاکستان کے مرکزی جنرل سیکرٹری علامہ راجہ ناصر عباس جعفری نے جسٹس انور ظہیر جمالی کو چیف جسٹس آف پاکستان کے عہدے کا چارج سنبھالنے پر مبارکباد پیش کرتے ہوئے اس توقع کا اظہار کیا ہے کہ سپریم کورٹ آف پاکستان کے نو منتخب چیف جسٹس ملک میں عدلیہ کے وقار اور ساکھ کو بلند رکھنے کے لیے اپنے پیشہ وارنہ کردار کو احسن طریقے سے سرانجام دیں گے۔ملک میں امن و سکون کے حقیقی قیام کے لیے قانون و انصاف کی بالادستی اور غریب و امیر کو بلاامتیاز انصاف کی فراہمی اولین شرط ہے۔جس کے لیے عدالتی نظام پر نظر ثانی کی ضرورت ہے۔ انہوں نے کہا کہ پاکستان کی عدالتی تاریخ ظلم و انصاف کے ملے جلے ابواب سے رقم ہے۔ ماضی میں مختلف حکومتیں اور دہشت گرد طاقتیں اپنی حفاظت کے لیے عدلیہ کی چھتری کے نیچے پناہ لیتی رہیں جس سے قانون و انصاف کا خون ہوتا رہا اور مذموم عناصر کے حوصلوں کو تقویت ملتی رہی۔انہوں نے کہاریٹائرڈ جسٹس جواد ایس خواجہ کا یہ بیان کہ جج ،وکیل اور حکومت نظام عدل کی تباہی کے ذمہ دار ہیں ایک تلخ سچائی ہے۔ چیف جسٹس جمالی کے لیے یہ بیان اہداف کے تعین اور چیلنجز کا مقابلہ کرنے کے لیے رہنما ثابت ہو سکتا ہے۔علامہ ناصر نے کہا کہ مجلس وحدت مسلمین ملک میں قانون و انصاف کی بالادستی پر یقین رکھتی ہے اور اس کے قیام کے لیے ہر قسم کے تعاون کا یقین دہانی کراتی ہے۔