وحدت نیوز(پشاور) مجلس وحدت مسلمین خیبر پختونخوا کے صوبائی سیکرٹری جنرل علامہ سید وحید کاظمی نے کہا کہ پاراچنار اور بنگش کے علاقے میں زمینی تنازعات کے حل میں غیر ضروری طوالت سنگین مسائل کا سبب بن سکتی ہے۔انہیں ہنگامی بنیادوں پر حل کرنا ہوگا۔ پاراچنار میں قبضہ مافیا پوری قوت کے ساتھ متحرک ہے۔
زمینوں پر غیر قانونی قبضے اور حکومتی خاموشی دیکھ کر لگتا ہے کہ وہاں قانون کی بجائے طاقت کی حکمرانی ہے۔اگر قابضین اسی طرح آزادانہ اپنی کاروائیوں میں مصروف رہے تو پھر مختلف طاقتور گروہوں کے درمیان خونریزی کے خدشات کو رد نہیں کیا جا سکتا۔ علاقائی امن کی خاطر قبضہ مافیا کو لگام دینا ہو گی۔ صوبائی حکومت اور قومی سلامتی کے اداروں کی توجہ اس سنگین مسلے کی طرف بارہا مبذول کرائی گئی لیکن ذمہ داران کی طرف سے کوئی نوٹس نہیں لیا گیا۔
انہوں نے مطالبہ کرتے ہوئے کہا کہ پاراچنار، علاقہ بنگش اور ڈی ائی خان کے کوٹلی امام حسین ع کی زمینیں ان کے اصل حق داروں تک پہنچائی جائے۔ تاکہ فرقہ وارانہ فسادات برپا کرنے والوں کے پاس شرپسندی کا کوئی جواز باقی نہ رہے۔ پاراچنار کی ضلعی انتظامیہ بھی کسی جانب داری کا مظاہرہ کرنے کی بجائے زمینوں کی دیرینہ مسائل کا حل کاغذات مال کے ذریعے کرے تاکہ اصل حقدار محروم نہ رہیں۔
