وحدت نیوز(گلگت) صوبائی حکومت نے سی ٹی ایس پی کے ساتھ خفیہ معاہدہ کیا ہوا ہے اور ایک طرح سے لیگی حکومت نے سی ٹی ایس پی کو اپنے مفادات کے تحفظ کیلئے ریکروٹمنٹ کا ٹھیکہ دیا ہوا ہے ۔یہ ادارہ لوگوں کی آنکھوں میں دھول جھونک کر وزیر اعلیٰ کے اشاروں پر ملازمتوں کی بندربانٹ کررہا ہے۔

 مجلس وحدت مسلمین گلگت بلتستان کے ترجمان محمد الیاس صدیقی نے کہا ہے کہ سی ٹی ایس پی کا کوآرڈینٹر زیر اعلیٰ کا قریبی عزیزہے اور اس ادارے نے  اب تک جتنے امتحانات لئے ہیں ان سے عیاں ہے کہ یہ شفاف نہیں۔انہوں نے کہا کہ ہم نے چیف سیکرٹری سے ملاقات میں باقاعدہ طور پر اس ادارے پر عدم اعتماد کا اظہار کیا تھا لیکن کوئی ٹس سے مس نہیں ہورہا ہے جو کہ انتہائی زیادتی ہے۔

انہوں نے کہا کہ سی ٹی ایس پی ہزاروں امیدواروں سے کروڑوں ر وپے بٹور رہا ہے اور معاہدے کے تحت حکومتی امیدواروں کو فیور دیا جارہا ہے۔غریب ،مستحق اہل افراد محض میں اپنے پیسے اور وقت کا ضیاع کررہے ہیں ۔اس ساری صورت حال میں چیف سیکرٹری گلگت بلتستان کا کردار محض تماشائی کے علاوہ کچھ نہیں۔انہوں نے کہا کہ وزیر اعلیٰ گلگت بلتستان نے بھی اعتراف کیا کہ سرکاری ملازمتیں ہر کسی کو نہیں دے سکتے، ہاںسرکاری ملازمت حاصل کرنے کیلئے حکمران جماعت کی سفارش یا وزیر اعلیٰ کی رشتہ داری ضروری ہے۔

انہوں نے مطالبہ کیا کہ سی ٹی ایس پی کے ذریعے مشتہر پوسٹوں کو روک کرصوبائی سطح پر ایک ریکروٹمنٹ کمیٹی قائم کرکے ان کے ذریعے پُر کیا جائے کم از کم غریب لوگوں کا پیسہ تو بچ جائے گا۔انہوں نے امیدواروںسے بھی اپیل کی کہ وہ اس بدنام زمانہ ادارے کے خلاف بھرپور احتجاج کریں ، ان کا بھرپور ساتھ دیا جائیگا۔

وحدت نیوز(گلگت) رکن اسمبلی مرحوم محمد شفیق ایک ملنسار شخصیت کے مالک تھے۔ان کی ناگہانی موت نے ہم سب کو دکھی کردیا ہے۔دکھ کی اس گھڑی میں پسماندگان سے دلی ہمدردی کا اظہار کرتے ہیں۔

مجلس وحدت مسلمین شعبہ خواتین کی رہنما ورکن گلگت بلتستان اسمبلی بی بی سلیمہ نے رکن اسمبلی محمد شفیق کی ناگہانی موت پر گہرے دکھ ورنج کا اظہار کرتے ہوئے مرحوم کے خانوادگان سے دلی ہمدردی کا اظہار کیا ہے۔

انہوں نے اپنے تعزیتی پیغام میں مرحوم کی سیاسی جدوجہد کو خراج تحسین پیش کرتے ہوئے کہا ہے کہ مرحوم ایک سیاسی شخصیت کے ساتھ ساتھ ایک ہمدرد انسان بھی تھے۔ان کی ناگہانی موت سے جہاں سیاسی خلا پیدا ہوچکا ہے وہاں علاقے کے عوام ایک ہمدرد اور متحرک انسان سے محروم ہوچکے ہیں۔خداوند تعالیٰ مرحوم کی لغزشوں کو معاف فرماکر انہیں اپنی رحمت کے سائے میں جگہ عنایت فرمائے اور پسماندگان کو صبر جمیل عطا فرمائے۔

وحدت نیوز(گلگت) حکومت پاکستان کی غلط پالیسیوں کی وجہ سے کشمیر آزاد نہیں ہوا۔کشمیر کے دونوں دعویدار کشمیری عوام کو متحد دیکھنا نہیں چاہتے ہیں۔حکومت پاکستان شروع سے درست سمت میں کشمیر کی آزادی کیلئے اقدامات اٹھاتی تو پچاس سال قبل کشمیر آزاد ہوجاتا۔

مجلس وحدت مسلمین گلگت بلتستان کے رہنما و جنرل سیکرٹری عوامی ایکشن کمیٹی سید یعسوب الدین نے کہاہے کہ گلگت بلتستان کے عوام کشمیری مجاہدین کی قربانیوں کو خراج تحسین پیش کرتی ہے۔بھارت کے غاصبانہ تسلط سے آزادی کیلئے کشمیری عوام نے لازوال قربانیاںپیش کی ہیں ،شہداء کی قربانیاں ضرور رنگ لائیں گی اور کشمیر ی عوام بھارتی تسلط سے آزاد ہوکر رہیں گے۔

امامیہ اسٹوڈنٹس آرگنائزیشن کے زیر اہتمام دنیور چوک پر یوم یکجہتی کشمیر کی ریلی سے خطاب کرتے ہوئے سید یعسوب الدین نے کہا کہ گلگت بلتستان کے عوام کے دلوں میںایک سوچی سمجھی سازش کے تحت کشمیری عوام سے نفرت پیدا کی گئی ہے تاکہ منقسم خطوں کے عوام ا یک دوسرے کے قریب نہ آسکیں اور متحدہ جدوجہد نہ کرسکیں۔انہوں نے کہاکہ کشمیر کی آزادی کیلئے افواج پاکستان کا کردار واضح ہے اور کشمیر کی آزادی کیلئے پاک فوج نے قربانیاں دی ہیںاور اب یہ حکومت کا کام ہے کہ وہ اپنی فوج پر اعتماد کرے اور کشمیر کی آزادی محض جلسے اور ریلیوں سے حاصل ہونا ممکن نہیں۔کشمیر آزاد ہوگا تو افواج پاکستان ہی کے ذریعے آزادہ ہوگالہٰذا حکومت پاکستان زبانی دعووں کی بجائے کشمیر کی آزادی کیلئے عملی اقدامات اٹھائے۔

انہوں نے گلگت بلتستان کے عوامی حقوق کو برسوںسے غصب کرنے پر حکمرانوں پر سخت تنقید کرتے ہوئے کہا کہ گلگت بلتستان کے عوام آرڈر2020 کو ہرگز تسلیم نہیں کرینگے ۔حکومت اب گلگت بلتستان کو کسی آرڈر کے تحت چلانے کی غلطی  نہ کرے۔انہوں نے مزید کہا کہ اراکین اسمبلی گلگت بلتستان کیلئے گورننس بل منظور کرکے وفاق کو بھجوائے اور حق حکمرانی کو حاصل کرے ۔گلگت بلتستان میںا ب وفاق کا آرڈر نہیں چلے گا اور گلگت بلتستان کے عوام جو آرڈر دینگے گے وہی گلگت بلتستان کا آرڈر ہوگا۔یوم یکجہتی کشمیر کی ریلی سے امامیہ اسٹوڈنٹس آرگنائزی کے ڈویژنل صدر برادر منتظر عباس، جماعت اسلامی کے رہنما جہانزیب انقلابی، انجمن تاجران گلگت بلتستان کے جنرل سیکرٹری مسعودالرحمن اور ایم ڈبلیوایم کے سیکرٹری سیاسیات غلام عباس نے بھی خطاب کیا۔

وحدت نیوز(گلگت) مجلس وحدت مسلمین گلگت بلتستان کے ترجمان محمد الیاس صدیقی نے کہا ہے کہ قراقرم کوآپریٹو بنک کے بورڈ آف ڈائریکٹرز میں من پسند افراد کو شامل کر کے اس پر قبضہ جمانے کی کوشش ہو رہی ہے۔ اگر میرٹ پر ممبران کا انتخاب نہ ہوا تو عدالت کا دروازہ کھٹکھٹائیں گے۔

 ایک بیان میں الیاس صدیقی نے کہا کہ بورڈ آف ڈائریکٹرز میں ان لوگوں کو رکن بنانے کی کوشش کی جارہی ہے جن کی تنخواہ بھی اسی بنک میں موجود نہیں، دوسری جانب سابق جی ایم نے من پسند افراد اور اپنے قریبی عزیزوں، رشتہ داروں کو تھوک کے حساب سے شیئرز فروخت کیے۔ حیران کن امر یہ ہے کہ انہوں نے 52 لوگوں کو اپنے شیئرز فروخت کیے، اب ان باون شیئر ہولڈرز کے ذریعے بورڈ آف ڈائریکٹرز میں اپنے من پسند لوگوں کو شامل کرنے کا منصوبہ بنایا گیا ہے۔

 دوسری جانب جن لوگوں نے اس ادارے میں کروڑوں روپے کا سرمایہ لگایا ہے اور جن کی وجہ سے یہ بنک چل رہا ہے ان کو شیئر ہولڈر نہیں بنایا گیا۔ ایک اہم سوال یہ بھی ہے کہ ایک قومی ادارے کا شیئر کس طرح رات کے اندھیرے میں فروخت کیا گیا، کس ضابطے کے تحت دیا گیا؟ کیونکہ شیئر فروخت کرنے کا بھی ایک طریقہ ہے، لیکن یہاں کسی کو بھی کانوں کان خبر ہونے نہ دی گئی۔ گلگت بلتستان کے اہم ترین قومی ادارے پر قبضہ جمانے کی کوشش کو ناکام بنایا ہوگا۔

 انہوں نے کہا کہ چیف سیکرٹری فوری طور پر نوٹس لیں اور من پسند لوگوں کو بورڈ آف ڈائریکٹرز میں شامل ہونے نہ دیں، اگر چیف سیکرٹری بھی ان کے ہم نوا بن گئے تو ہم عدالت جائیں گے اور اس قومی ادارے کو بچائیں گے۔

وحدت نیوز (گلگت) قراقرم یونیورسٹی اعلیٰ تعلیمی ادارہ ہے اس اعلیٰ تعلیمی ادارے کو دفتر روزگار نہ بنایا جائے ۔ یونیورسٹی انتظامیہ میرٹ کو پامال کرکے من پسند افراد کو کنٹریکٹ دے رہی ہے ۔ گلگت بلتستان کے بیرون ممالک سے ڈاکٹریٹ کی ڈگری حاصل کرنےوالے ہونہار وں کو دیوار سے لگایا جارہا ہے جبکہ دیگر صوبوں کے کم تعلیم یافتہ افراد کو کنٹریکٹ دیا گیا ہے ۔

مجلس وحدت مسلمین گلگت بلتستان کے ترجمان محمد الیاس صدیقی نے کہا ہے کہ قراقرم یونیورسٹی میں مقامی اعلیٰ تعلیم یافتہ جوانوں کو نظرا نداز کرنا لمحہ فکریہ ہے ۔ گلگت بلتستان کے ہونہار غریب طلباء جنہوں نے بیرون ممالک سے اعلیٰ تعلیم کی ڈگری حاصل ہے آج اپنے ہی علاقے میں قائم قراقرم یونیورسٹی میں روزگارکیلئے دھکے کھارہے ہیں جبکہ پاکستان کے دیگر صوبوں کے کم پڑھے لکھے افراد کو کنٹریکٹ اور کنٹیجنٹ ملازمت دی گئی ہے جو کہ علاقے کے عوام کے سا تھ انتہائی زیادتی ہے ۔

 انہوں نے کہا کہ شروع دن سے قراقرم یونیورسٹی میں ملازمتیں میرٹ پر دینے کی بجائے پسند ناپسند کی بنیاد پرتقسیم کی گئیں اور سیاسی اثر رسوخ پر یونیورسٹی کے حجم سے زیادہ ملازمتیں دی گئی جو آج یونیورسٹی پر بوجھ بنے ہوئے ہیں ۔ پسماندہ علاقہ ہونے کے ناطے طلباء کو فیس کی رعایت دینا تو درکنار ،دیگر یونیورسٹیوں کے مقابلے میں فیسیں بھی زیادہ ہیں جس کی وجہ سے غریب طلباء کا مستقبل تاریک ہوگیا ہے ۔

انہوں نے صدر پاکستان سے مطالبہ کیا ہے کہ وہ قراقرم یونیورسٹی میں ہونےوالی بدعنوانیوں کا نوٹس لیکر یہاں کے اعلیٰ تعلیم یافتہ جوانوں کو یونیورسٹی میں کنٹریکٹ دلوانے میں کردار ادا کریں نیز طلباء کی فیسوں میں کمی کرنے کے احکامات صادر فرمائیں ۔

وحدت نیوز(اسلام آباد) سپریم کورٹ کے فیصلے کی روشنی میں گلگت بلتستان کے عوام کوتمام بنیادی حقوق دئے جائیں۔گلگت بلتستان خالصہ سرکار کے نام پر لوگوں کی زمینوں پرناجائز حکومتی قبضے بند کئے جائیں۔لِینڈ ریفارمز کمیٹی کے فیصلے کو یکسر مسترد کرتے ہیں اور واضح کر تے ہیں کہ گلگت بلتستان کی ایک ایک انچ زمین وہاں کی عوام کی ملکیت ہے۔ان خیالات کا اظہار صوبائی سیکرٹری جنرل گلگت بلتستان آغا سید علی رضوی نے صوبائی رہنماؤں کے ہمراہ مرکزی سیکریٹریٹ اسلام آباد میںمشترکہ پریس کانفرنس سے خطاب کرتے ہوئے کیا۔

 انہوں نے کہا کہ گلگت بلتستان کی عوام ابھی تک اپنے بنیادی حقوق کے حصول کے لئےسراپا احتجاج ہے۔ انتظامی اداروں کی بدحالی اور اس میں کرپشن اقربا پروری نے عوام کا جینا دوبھر کررکھا ہے۔ صوبائی حکومت کی اقرباپروری اور ترقیاتی کاموں میں کرپشن پر اینٹی کرپشن کے ادارے خاموش تماشائی بنے ہوئے ہیں۔ ملازمتوں میں میرٹ کی پامالیوں کو روکا جائے صوبائی ملازمتوں کے کوٹے میں وفاقی تناسب کا اضافہ علاقے کی عوام کا حق غصب کرنے کے مترادف ہے ۔صوبائی حکومت گلگت بلتستان کی مدت چھ ماہ رہ گئی ہے لہذا تمام سرکاری ملازمتوں میں بھرتی پر پابندی لگا دی جائے۔

سی پیک منصوبے پر بات کرنے ہوئے انہوں نے کہا کہ گلگت بلتستان سی پیک کا گیٹ وئے ہے لیکن اس کے حصے میں ابھی تک صرف گزرتی گاڑیوں کا دھواں ہے۔ سی پیک میں گلگت بلتستان کو متناسب حصہ دیا جائےورنہ عوام احتجاج کرنے حق رکھتی ہے۔انہوں نے کہاکہ تحریک انصاف کی حکومت نے جیسے سکھ برادری کے لئے کرتارپور بارڈر کو کھولا ایسے ہی کرگل لداخ اور دیگر تاریخی روڈز کو انسانی ہمددری اور سیاحتی مقاصد کے لئے کھولا جائے۔اس وقت گلگت سکردو روڈ علاقے کا اہم ترین منصوبہ ہے اس کی بروقت تکمیل کے لئے وفاقی حکومت اقدامات کرےاور گلگت سکردو روڈ منصوبے میں تعطل اور کسی قسم کی منفی ردو بدل برداشت نہیں کی جائے گی ۔

آغا علی رضوی نے کہاکہ بلتستان یورنیورسٹی کو خصوصی گرانٹ دی جائے جس سے اس کے اداروں کومستحکم کیا جائے۔بلتستان یورنیورسٹی میں ہر سطح پر میرٹ کی پامالی اور بدعنوانی جاری ہے اس سلسلے کو لگام دیا جائے اور تما م تر تقرریاں اہلیت کی بنیاد پر ہونی چاہیں۔گلگت بلتستان کے قیمتی پتھروں کے زخائر کی لوٹ مار روکی جائے۔گلگت بلتستان میں موجود سیاحتی مواقع سے فائدہ اٹھاتے ہوئے سیاحت کوانڈسٹری کی حیثیت دے کر مقامی افراد کے لئے روزگار کے مواقع پیدا کئے جائیں۔ اس کے لئے منصوبہ بندی اور خصوصی گرانٹ کا مطالبہ کرتے ہیں ۔

 پریس کانفرنس میں مرکزی سیکرٹری سیاسیات ایم ڈبلیوایم سید اسد عباس نقوی ،شیخ نیئر عباس مصطفوی ،علامہ شیخ احمدعلی نوری ڈپٹی سیکرٹری جنرل ایم ڈبلیو ایم گلگت بلتستان ،ایم ایل اے ڈاکٹر رضوان ، ایم ایل اے بی بی سلیمہ ،ترجمان ایم ڈبلیوایم گلگت بلتستان الیاس صدیقی ۔سیکرٹری سیاسیات بلتستان محمد علی اورجناب عارف قمبری بھی موجود تھے ۔