وحدت نیوز (مظفرآباد) طالبان کا دفتر کھلوانے والوں کو بے گناہ اور نہتے مسلمانوں کا خون بھی یاد رکھنا چاہیے، یہ دعویٰ کے ہم تبدیلی لے کے آئیں گے، حکومت کی کارکردگی دیکھ کر محض ایک فریب نظر آتا ہے، لگتا ہے پشاور میں خیبر پختونخواہ میں تحریک انصاف کی نہیں بلکہ دہشت گردوں کی حکومت ہے، پشاور شہر میں ہونے والے دھماکے، حکومت کی ناکامی کا منہ بولتا ثبوت ہیں، مجلس وحدت مسلمین آزاد کشمیر اس کی بھرپور مذمت کرتی ہے، پشاور قصہ خوانی بازار میں ہونے والے بم دہماکے کے نتیجے میں انسانوں جانوں کے ضیاء پر افسوس کا اظہار کرتے ہیں، دہشت گردوں کا اسلام اور پاکستان سے کوئی تعلق نہیں ، وہ بیروں ایما پر بے گناہ مسلمانوں کا خون بہا رہے ہیں، دہشت گرد کبھی بھی ملک کے مفاد میں کام نہیں کرتے اور نہ انہیں مملکت خداداد پاکستان سے محبت ہے، ان کا مقصد صرف اور بیرونی ایجینڈے کی تکمیل ہے۔

ان خیالات کا اظہار ممبر شوریٰ عالی مجلس وحدت مسلمین پاکستان و سربراہ مجلس وحدت مسلمین آزاد جموں و کشمیر علامہ سید تصور حسین نقوی الجوادی نے یہاں وحدت سیکرٹریٹ مظفرآباد میں مجلس وحدت ضلع مظفرآباد کے سیکرٹری جنرل مولانا طالب ہمدانی، ڈپٹی سیکرٹری جنرل خالد محمود عباسی و ضلع ہٹیاں کے سیکرٹری جنرل سید ظہور حسین نقوی سے ملاقات میں کہی، ملاقات میں ایم ڈبلیو ایم آزاد کشمیر کے مرکزی رہنما سید سجاد حسین اور مولانا سید حمید حسین نقوی بھی شامل تھے ، علامہ سید تصور حسین نقوی الجوادی نے کہا کہ پورے پاکستان میں بالعموم ، پشاور اور گرد و نواح میں بالخصوص دہشتگردی کی اس لہر نے قوم کو تشویش میں مبتلا کر دیا ہے، عمران حکومت کے ابتدائی مرحلے ہی میں بم دھماکوں کی تعداد میں اضافہ تشویشناک امر ہے، دہشتگرد کاروائیاں کر رہے ہیں جبکہ حکومت مذاکرات کا راگ الاپ رہی ہے، ہم یہ سوچنے پر مجبور ہو گئے ہیں کہ آیا حکومت دہشتگردوں کو بچانا چاہتی ہے یا عوام کو، حکومت کو عوام کے صبر کا امتحان نہیں لینا چاہیے، دہشتگردوں سے آہنی ہاتھوں سے نبٹا جائے، دہشتگردوں نے بیرونی ہاتھ پر بیعت کی ہے نہ کہ مادر وطن انہیں کوئی فکر ہے۔

انہوں نے وزیراعظم میاں نواز شریف کے اقوام متحدہ کی جنرل اسمبلی میں خطاب پر اپنے ردعمل میں کہا کہ ان کے کشمیر پر جرأت مندانہ مؤقف قابل ستائش ہے ، وزیراعظم میاں محمد نواز شریف کا خطاب کشمیریوں کے جذبات کی عکاسی تھا، میاں نواز شریف کو ان معاملات کی طرح ملک میں جاری دہشتگردی اورمہنگائی جیسے ناسور کے خاتمے کے لیئے بھی مدبرانہ کردار ادا کرنا ہو گا، انہوں نے کہا کہ حالیہ بجلی اور تیل کے نرخوں میں اضافہ دہشتگردی سے پسی ہوئے لوگوں کے لیئے ایک اور عذاب سے کم نہیں، حکومت کو جلد از جلد ان معاملات کو بھی سنبھالنا ہو گا، دہشتگردی سے بچ جا نے والے مہنگائی سے نہیں بچ پائیں گے، ہم حکومت سے مطالبہ کرتے ہیں کہ نئے جاری شدہ نرخوں کو فوری واپش لیا جائے۔