وحدت نیوز(لاہور) مجلس وحدت مسلمین پنجاب کے میڈیا سیل سے جاری بیان کے مطابق سیکرٹری جنرل علامہ عبدالخالق اسدی نے سی سی پی او راولپنڈی اختر عمر کی پریس کانفرنس پر اپنے ردِ عمل کا اظہار کرتے ہوئے کہا کہ سی سی پی او راولپنڈی کی پریس کانفرنس کے بعد وہ مذہبی و سیاسی رہنماء جنہوں نے قوم کو جھوٹ بول کر گمراہ کیا ان کے خلاف حکومت فوری کاروائی کرے۔ سانحہ راولپنڈی شرپسندوں کے طے شدہ سازش کا حصہ تھا ۔ اس سازش کے ذریعے پاکستان میں فرقہ واریت کو ہوا دینا تھا جس کو محب وطن قوتوں نے ناکام بنا دیا۔سی سی پی او کے مطابق جب مدرسہ تعلیم القرآن میں ہلاک ہونے والے طالبعلم نہیں تھے تو کون تھے ؟ کہاں سے آئے تھے ؟ اور ان کے پشت پناہ کون تھے ؟ تحقیقاتی ادارے مکمل تحقیقاتی رپورٹ جلد منظر عام پر لائیں اور شیعہ مکتب فکر کہ خلاف ہو نے والے جھوٹے اور زہریلے پروپگنڈے کو عوام کے سامنے آشکا رکیا جائے ، راولپنڈی میں پنجاب پولیس چادر اور چاردیواری کا تقدس پامال کر رہی ہے،پولیس سونا ، نقدی، موبائل فون کے قیمتی سیٹ لوٹ کر لے جاتی ہے ہم ہر فورم پر ان کیخلاف جانے کو تیار ہیں۔ علامہ اسدی نے نئے آرمی چیف جنرل راحیل شریف کی تقریر کو خوش آئند قرار دیتے ہوئے کہا کہ امید ہے کہ نئے سپہ سالار ملکی سا لمیت اور دفاع میں اپنا بھر پور کردار ادا کریں گے اور قوم کی دعائیں ان کے ساتھ ہیں۔