وحدت نیوز(کراچی) کراچی کے علاقے زمان ٹاؤن کورنگی کے رہائشی فعال شیعہ رہنما، سابق ممبر پیس کمیٹی اور ایم ڈبلیوایم ضلع کورنگی کےصدر سید رضوان رضوی کے چچا سید  اقبال رضوی (شاہ جی) کو عزاخانہ صغریٰ کورنگی 3نمبر کے پاس نامعلوم مسلح دہشت گردوںنے فائرنگ کرکے شہید کردیا۔ گذشتہ شب انہیں سر پر گولیاں مار کرشدید زخمی کیا گیا ، جائے وقوعہ سے انہیں بذریعہ ایمبولنس فوری طور پر جناح اسپتال منتقل کیا گیا جہاں وہ جانبر نا ہوسکے اور خالق حقیقی سے جاملے۔

واضح رہے کہ مقتول کے جواں سال فرزند سید اظہر رضوی (بابا) کو بھی صرف 5 روز قبل کورنگی میں ہی نشانہ بنایا گیا تھا جس میں وہ جانبحق ہوگئے تھے۔پولیس حکام نے اس قتل کو ڈکیتی مذاحمت قرار دیکر اپنی جان چھڑوالی تھی۔

واقعے کی اطلاع ملتے ہی ایم ڈبلیوایم کراچی ڈویژن کے صدر علامہ صادق جعفری، ڈویژنل رہنما رضی حیدر رضوی ، زین رضا رضوی و دیگر فوری جناح اسپتال پہنچے اور انہوں نے مقتول کے ورثاءسے ملاقات کی اور اظہار تعزیت کیا۔

ایم ڈبلیوایم کے رہنماؤں نے بھی ان دونوں قتل کی کاررائیوں پر شیعہ ٹارگٹ کلنگ کا شبہ ظاہر کیا ہے ، انہوں نے سندھ حکومت اور قانون نافذ کرنے والے اداروں خصوصا آئی جی سندھ اور کراچی پولیس چیف سے فوری شفاف تحقیقات کا مطالبہ کیا ہے اور کہا ہے کہ قاتلوں کو فوری کیفر کردار تک پہنچایا جائے ۔