وحدت نیوز(کراچی)پاکستان میں موجودہ بحرانی کیفیت کا حل شفاف الیکشن ہیں، موجودہ حالات کسی بھی صورت قابل قبول نہیں۔ ان خیالات کا اظہار مجلس وحدت مسلمین سندھ کے صدر علامہ باقر عباس زیدی نے کراچی پریس کلب کے باہر احتجاجی مظاہرے سے خطاب میں کیا۔ مظاہرے میں علامہ مختار امامی، علامہ صادق جعفری، علامہ مبشر حسن، ناصر الحسینی، حیدر زیدی سمیت کارکنان نے شرکت کی۔
مظاہرین نے موجودہ ملکی صورتحال اتحادی حکومت کے خلاف شدید نعرے بازی کی اور ملک میں جلد شفاف الیکشن کا مطالبہ کیا۔ اپنے خطاب میں مقرین کا کہنا تھا کہ مہنگائی کا جن بوتل سے باہر آگیا ہے، اس وقت دو وقت کی روٹی کا حصول بھی مشکل کردیا گیا ہے، حکومتی اشرافیہ نے آئین و قانون کی توہین کی ہے، مجلس وحدت مسلمین پاکستان وطن عزیز کی آزاد خارجہ پالیسی اور داخلی استحکام کے لیے ہمیشہ آواز بلند کرتی رہے گی، پاکستان کے سیاسی بحران کے بعد معاشی بحران انتہائی سنگین ہوچکا ہے جس پر عالمی ادارے رائے دے رہے ہیں لہذا بروقت اقدام لینا انتہائی ناگزیر ہے، سپریم کورٹ کا احترام ملحوظ رکھا جائے تاکہ اس دارے پر عوامی اعتماد میں اضافہ ہو، ہم قانون کی بالا دستی پر یقین رکھتے ہے جس کا عملی مظاہرہ ہم کئی دہائیوں سے کرتے آ رہے ہیں۔
ان کا کہنا تھا کہ پاکستان کے مقبول سیاسی رہنما کی گرفتاری کے بعد پیدا شدہ حالات کو تشویش کی نگاہ سے دیکھتے ہیں جہاں حکومتی رٹ پر عملدرآمد نہ ہونا، مجرمانہ غفلت اور سازشی اقدامات کی طرف متوجہ ہونا چاہیئے، عوام پاکستان کی غالب اکثریت امن عامہ اور معاشی تحرک کی خواہاں ہے جس کے اسباب حکومت کو مہیا کرنے ہیں، صوبہ پنجاب اور خیبرپختونخواہ میں نگران حکومت کی معیاد ختم ہوچکی ہے جس کی وجہ سے نیا بحران پیدا ہونے کو ہے، بروقت اقدامات کئے جائیں تاکہ صاف شفاف اور قابل قبول الیکشن ہو پائیں، موجودہ پی ڈی ایم حکومت کی گزشتہ چند روز کی پریس کانفرنس غیظ و غضب، اشتعال اور عدلیہ کی توہین پر مبنی تھیں جس سے حالات سنبھالے نہیں، ہمیں قائداعظم اور علامہ اقبال کے نظریات پر قائم پاکستان کو محفوظ، مضبوط اور خود مختار بنانا ہے، ابھی بھی حکومت ہوش میں آئے آئین پر عملدرآمد کرے اور بروقت الیکشن کروائے تو شاید معاشی مسائل بھی حل ہوں۔ رہنماؤں نے سانحہ پاراچنار کے قاتلوں کی گرفتاری اور مجرمانہ غفلت کی مرتکب انتظامیہ کے خلاف کاروائی کا مطالبہ کیا۔
