وحدت نیوز(پشاور) مجلس وحدت مسلمین خیبر پختونخوا کے ڈپٹی سیکرٹری جنرل علامہ سید عبد الحسین الحسینی نے ایک وفد کے ہمراہ اتوار کے روز دہشتگردی کا نشانہ بننے والے آل سینٹس چرچ کا دورہ کیا۔ اور وہاں بشپ اعجاز گل سے ملاقات کی۔ اس موقع پر مجلس وحدت مسلمین کے صوبائی آفس مسول ارشاد حسین اور مجلس وحدت مسلمین ضلع کوہاٹ کے سیکرٹری جنرل حاجی علی داد خان بھی موجود تھے۔ علامہ سید عبدالحسین الحسینی نے کہا کہ درندہ صفت دہشتگردوں نے چرچ میں دھماکے کرکے اپنے اس غیر انسانی فعل سے واضح کردیا ہے کہ وہ وطن عزیز کو تباہ کرنا چاہتے ہیں۔ مگر یہ ان کی بھول ہے۔ انہوں نے کہا کہ ہم مر تو سکتے ہیں مگر وطن عزیز کے استحاکم پر کوئی آنچ نہیں آنے دیں گے۔ ہم مصیبت کی اس گھڑی میں اپنے مسیحی بھائیوں کے شانہ بشانہ ہیں۔ مجلس وحدت مسلمین نے اس عظیم سانحہ پر 3 روزہ سوگ کا اعلان کیا اور پشاور سمیت پورے پاکستان میں اپنے مسیحی بھائیوں کے شانہ بشانہ رہی۔ اس موقع پر بشپ اعجاز گل نے مجلس وحدت مسلمین کے وفد کا شکریہ ادا کیا اور کہا کہ ہم سب پاکستانی ہیں، دہشتگرد ہمیں ہرگز خوفزدہ نہیں کر سکتے۔ ہم ان دہشتگردوں کو ملکر شکست دیں گے۔علاوہ ازیں گزشتہ رات مجلس وحدت مسلمین ضلع پشاور کی کابینہ نے بھی آل سینٹس چرچ کا دورہ کیا اور وہاں ہلاک ہونے والے افراد کی یاد میں شمعیں روشن کیں۔