وحدت نیوز (گلگت)  قومی مفاد کے سامنے جزوی اختلافات کوئی حیثیت نہیں رکھتے۔ مجلس وحدت مسلمین باکردارامیدواروں کو سامنے لائے گی اور الیکشن میں ہم خیال جماعتوں سے اتحاد کو یقینی بنانے کیلئے کوششیں جاری رکھی جائینگی۔ایم ڈبلیوایم ایک حقیقت کا نام ہے اور گلگت بلتستان اسمبلی کے الیکشن میں عوامی خدمت کے جذبے سے حصہ لے رہے ہیں۔ان خیالات کا اظہار مجلس وحدت مسلمین گلگت بلتستان کے سیکرٹری جنرل علامہ نیئر عباس مصطفوی نے اپنے ایک بیان میں کیا ہے۔

انہوں نے کہا کہ مجلس وحدت مسلمین کا حکمران جماعت نواز لیگ کے سوا باقی تمام جماعتوں سے انتخابی اتحاد خارج از امکان نہیں۔شیعہ علماء کونسل سمیت دیگرتمام جماعتوں سے انتخابی اتحاد کیلئے مسلسل رابطے میں ہیں۔انہوں نے کہا کہ مجلس وحدت مسلمین مظلوموں کی حامی جماعت ہے جو مظلوموں کو انصاف دلوانے تک چین سے نہیں بیٹھے گی۔ وفاقی حکمرانوں نے گلگت بلتستان کے عوام کا استحصال کیا ہے اور اس علاقے میں بسنے والے دو ملین عوام کو تاحال شناخت سے محروم رکھا گیا ۔وفاقی حکمرانوں نے گلگت بلتستان کے عوام کے ساتھ صرف زبانی وعدوں کے علاوہ کچھ نہیں کیا اور وزیر اعظم پاکستان کا حالیہ دورہ صرف الیکشن چرانے غرض سے تھا ۔

انہوں نے کہا کہ انتخابات سے قبل جھوٹے وعدے کرنے والی جماعتوں کا عوام خود احتساب کرینگے کیونکہ ماضی میں بھی حکمران جماعتوں نے الیکشن پر اثر انداز ہونے کی غرض سے بہت سے جھوٹے وعدے کئے تھے جو تاحال پورے نہیں ہوئے۔انہوں نے کہا کہ گلگت بلتستان کے مستقبل کا دارومدار اقتصادی راہداری پر منحصر ہے اور حکمران جماعت اس سنہرے منصوبے کو ہائی جیک کرنے کیلئے گلگت بلتستان میں چھوٹے موٹے منصوبوں کے اعلانات کے ذریعے عوامی مینڈیٹ چرانے کی ناکام کوشش کررہے ہیں۔انہوں نے کہا اگر نواز حکومت واقع گلگت بلتستان کے عوام سے مخلص ہے تو اقصادی راہداری کا ونڈو گلگت بلتستان میں قائم کرے ۔انہوں نے کہا مجلس وحدت مسلمین واحد سیاسی جماعت ہے جس کے پلیٹ فارم تمام مسالک کے سیاسی نمائندوں نے الیکشن لڑنے کیلئے فارم حاصل کئے ہیں۔

وحدت نیوز (اسکردو) مجلس وحدت مسلمین پاکستان کے مرکزی سیکرٹری سیاسیات سید ناصر عباس شیرازی نے اسکردو میں پریس کانفرنس سے خطاب کرتے ہوئے کہا ہے کہ ایم ڈبلیو ایم گلگت بلتستان کے انتخابات میں بھرپور کامیابی حاصل کرے گی، ہمارے دروازے ان تمام شخصیات کے لئے کھلے ہیں جو نظریات اور کارکردگی کی بنیاد پر مجلس وحدت مسلمین میں شمولیت اختیار کرنا اور محروموں کے حقوق کی جنگ لڑنے کے لئے میدان عمل میں اترنا چاہتے ہیں۔ انہوں نے کہا کہ نواز لیگ پوری ریاستی طاقت کے ذریعے گلگت بلتستان کے انتخابات کو یرغمال بنانے پر تلی ہوئی ہے، انہوں نے گلگت میں بلاجواز مقدمات کے ذریعے الیکشن کمپین کو کمزور کرنے کی کوشش کی ہے اور محب وطن افراد پر غداری کے مقدمات بنا کر ثابت کر دیا ہے کہ وہ انتقامی سیاست پر یقین رکھتی ہے اور سب سے زیادہ انہیں خطرہ مجلس وحدت مسلمین سے ہے۔ نواز شریف کو دو سالوں تک گلگت بلتستان کا کوئی خیال نہیں آیا اور انتخابات کے موسم میں انہیں گلگت بلتستان کی عوام سے محبت ہوگئی ہے۔ نواز لیگی حکومت کی طرف سے گلگت بلتستان کے لئے کیے گئے ناکافی اعلانات سیاسی رشوت اور قبل از انتخابات دھاندلی ہے۔ مسلم لیگ نواز کی غیر جمہوری روش اور جبر کا جواب الیکشن میں دیا جائے گا۔ انہوں نے کہا کہ بلتستان میں علماء، زعما، عمائدین، سیاسی شخصیات کی جوق در جوق ایم ڈبلیو ایم میں شمولیت انتہائی حوصلہ افزاء اور لائق تحسین ہیں۔

سید ناصر عباس شیرازی نے اپنی گفتگو میں کہا کہ گلگت بلتستان میں انتخابات کے دن قریب تر آتے جا رہے ہیں، جوں جوں انتخابات کے دن قریب آ رہے ہیں گذشہ پارٹیاں جنہوں نے گلگت بلتستان کو سوائے دھوکے کے کچھ نہیں دیا، ایک بار پھر جی بی میں دھوکے، دھونس، طاقت اور کھوکھلے وعدوں کیساتھ وارد ہو رہی ہیں۔ گلگت بلتستان کی عوام ان تمام سیاسی پارٹیوں سے یہ پوچھنے میں حق بجانب ہیں کہ تم سب نے گلگت بلتستان پر باری باری 67 سال حکومت کی لیکن اب تک ہمیں شناخت سے کیوں محروم رکھا۔ ابھی تک گلگت بلتستان کو آئینی حق نہ دینے کی اصل ذمہ دار مسلم لیگ نواز سمیت وہ تمام پارٹیاں ہیں، جنہوں نے یہاں حکومت کی اور یہاں کی عوام کو کچھ نہیں دیا۔ انہوں نے کہا کہ میں آپ صحافی حضرات کے توسط سے یہ سوال بھی ہم اٹھانے میں حق بجانب ہوں کہ پاکستان کے عام انتخابات میں سوائے مجلس وحدت مسلمین کے کس سیاسی پارٹی کے منشور میں گلگت بلتستان کو آئینی حقوق دینے کا ذکر تھا۔ ملک کے عام انتخابات میں جن پارٹیوں کو گلگت بلتستان کی یاد تک نہ آئی ہو، اب وہ کس منہ سے گلگت بلتستان کے حقوق کی بات کرتے ہیں۔ یہ بات واضح ہوگئی ہے گلگت بلتستان کو حقوق نہ ملنے کی ذمہ دار کوئی اور نہیں بلکہ وہ تمام پارٹیاں ہیں جنہوں نے یہاں حکومتیں کیں، اس خطہ کے وسائل لوٹے اور انہیں ان کے حق سے محروم کر دیا۔ اب ہم کسی وفاقی حکومتی پارٹی کو ریاستی جبر کے ذریعے یہاں کا عوامی مینڈیٹ چرانے کی اجازت نہیں دیں گے۔

ایم ڈبلیو ایم کے مرکزی سیکرٹری سیاسیات کا کہنا تھا کہ ہم عوامی طاقت کے ذریعے مسلم لیگ نواز کی سیاسی اور انتظامی دہشتگردی کا مقابلہ کریں گے۔ یہاں اس بات کی وضاحت کرتا چلوں کہ اس وقت گلگت بلتستان میں موجود تمام سیاسی پارٹیاں مسلم لیگ نواز کی سیاسی اور انتظامی دہشتگردی کا شکار ہیں۔ جسکی مثال یہ ہے کہ انہوں نے اپنے ہی عہدیدار کو چیف الیکشنر تعینات کیا، کسی سیمی گورنمنٹ بنک کے ملازم کو وزیراعلٰی بنایا، اپنی مرضی کی نگران کابینہ کی فوج بنائی اور غیر مقامی گورنر کو مسلط کیا گیا، کیا یہ سب سیاسی دہشتگردی نہیں؟ اسی طرح وہ انتظامی طور پر ملک بھر سے چن چن کر ایسے افراد کو جمع کرکے یہاں لانے کی کوشش میں ہیں جو نگران حکومت سے ملکر الیکشن کو یرغمال بنائیں، اسی طرح گلگت سکردو روڈ کی تعمیر جو کہ سابقہ حکومت کی طرف سے منظور شدہ ہے، اس پر تختی لگا کر یہاں کی عوام کو بے وقوف بنانے کی کوشش ہوگی، اس کے ساتھ ساتھ شگر اور کھرمنگ ضلع کو آخری وقت میں ووٹ بنک کے طور پر استعمال کرنے کے لئے رکھا ہوا ہے، ہم میڈیا کی توسط یہ سوال کرنا چاہیں گے کہ وفاقی حکومت کو دو سال کا عرصہ گزر گیا ہے، اگر تمہارے اختیار میں شگر اور کھرمنگ کو ضلع بنانا موجود ہے تو کیا تاخیر کرنا عوام کیساتھ خیانت نہیں ہے، ہونا تو یہ چاہیے تھا کہ تم محض عوام کی خاطر ایک دو سال قبل ہی اپنے اختیارات کو استعمال میں لا کر ضلع بنا دیتے، تمہارا بدنیتی پر مبنی یہ عمل ظاہر کرتا ہے کہ تم عوام سے مخلص نہیں بلکہ عوام کا ووٹ چرانے چاہتے ہو اور سیاسی بلیک میلنگ کے قائل ہو۔

وحدت نیوز (اسکردو) مجلس وحدت مسلمین پاکستان کے سیکرٹری سیاسیات سید ناصرعباس شیرازی سے بلتستان کے مختلف وفود نے ملاقاتیں کیں اور اس موقع پر انہوں نے ایم ڈبلیو ایم میں باقاعدہ شمولیت کا اعلان کیا۔ عمائدین نیورنگاہ، نیانیور، سندس، کتپناہ اور شگریخورد نے مجلس وحدت مسلمین کی ملک بھر میں جاری تحریکوں کا خیرمقدم کیا اور انہوں اس عزم کا اعادہ کیا کہ ایم ڈبلیو ایم میں شمولیت اس تنظیم کی اطمینان بخش کارکردگی اور نظریات کے سبب ہے۔ انہوں نے کہا کہ مجلس وحدت مسلمین کا یہ طرہ امتیاز ہے کہ اس نے ملک میں دنیا بھر میں جاری مظالم کے خلاف صدائے حق ہر حالت میں بلند کرتی رہی۔ اس موقع پر سید ناصر عباس شیرازی نے کہا کہ مجلس وحدت مسلمین غریبوں اور کمزوروں کی جماعت ہے اور مستضعفین کے حقوق کی جنگ ہر حالت میں لڑتی رہے گی۔ انہوں نے کہا کہ سابقہ حکومتوں نے گلگت بلتستان کو محرومی کے سوا کچھ بھی نہیں دیا۔ سابقہ حکمران جماعت کے استحصال کے بعد یہاں کی عوام نواز لیگ کی سیاسی مکاریوں کا مقابلہ کرنا جان چکی ہے اور مسلم لیگ نواز کو سیاست کے میدان میں بھرپور شکست دے گی۔

انہوں نے کہا کہ پیپلز پارٹی کی حکومت نے گلگت بلتستان کی عوام سے گندم سبسڈی چھین کر ظلم کیا تو یہاں کی غیور عوام نے انکو اس ظلم میں کامیاب ہونے نہیں دیا۔ انہوں نے کہا کہ ہم پیپلز پارٹی کی سابقہ پانچ سالہ کارکردگی کے بارے میں سوال کرنا چاہتے ہیں کہ انہوں نے ان پانچ سالوں میں عوام کو کیا دیا۔ پیپلز پارٹی کے رہنما بلتستان آکر یمن کے مسئلے پر عوام کو گمراہ نہ کریں، پیپلز پارٹی کی قیادت، زرداری اور رحمان ملک فوج کو یمن بھیجنے اور یمن مسئلے پر نواز شریف کا ساتھ دینے کا اعلان کر چکی ہے، خورشید شاہ اور قمرالزمان کو یہ باتیں زیب نہیں دیتیں کہ وہ یمن کے مسئلے پر گفتگو کریں اور نواز شریف پر تنقید کریں۔

انہوں نے کہا کہ پیپلز پارٹی نے نواز شریف کو ان حالات میں سہارا دیا، جن حالات میں نواز شریف کی حکومت جانے والی تھی، اب بلتستان آکر نواز شریف سے اختلاف کرنا عوام کو دھوکہ دینے کے مترادف ہے۔ پیپلز پارٹی اور نواز لیگ عوام کے درمیان آکر اختلافات کی باتیں کرنے میں مصروف ہیں جبکہ وہ ایک دوسرے کی دوست جماعتیں ہیں۔ اب یہ دونوں جماعتیں باریاں لینا چاہتی ہیں جسے ہم کامیاب نہیں ہونے دیں گے۔ انہوں نے کہا کہ گلگت بلتستان کی عوام اب کارکرگی اور نظریات کی بنیاد پر الیکشن میں حصہ لے گی اور کسی جعلی دعوے کرنے والے کا ساتھ نہیں دے گی۔ عوامی وفد نے گفتگو کرتے ہوئے بتایا کہ بلتستان میں آٹے کا بحران پیدا کیا جا رہا ہے اور اس بحران کے پیچھے مسلم لیگ کا ہاتھ ہے۔ اس پر ردعمل ظاہر کرتے ہوئے ناصر عباس شیرازی نے کہا کہ آٹا بحران انتظامیہ کی نااہلی ہے اور سوچی سمجھی سازش کا حصہ ہے، اگر آٹے کے بحران کا مسئلہ فوری طور پر حل نہ ہوا تو موثر آواز بلند کی جائے گی۔

وحدت نیوز (اسلام آباد) مجلس وحدت مسلمین کے مرکزی جنرل سیکریٹری علامہ راجہ ناصرعباس جعفری نےپشاور میں طوفانی  بارشوں اور نیپال میں آنے والے ہولناک زلزلے کے نتیجے میں دو ہزار سے زائد ہلاکتوں پر افسوس کا اظہار کرتے ہوئے اس المناک سانحہ قرار دیا ہے۔انہوں نے کہا کہ مشکل کی اس گھڑی میں ہمیں پشاور کے متاثرہ عوام اور  اقوام عالم کو نیپال کی زیادہ سے زیادہ مدد کرنے کی ضرورت ہے۔دکھ کی اس گھڑی میں اسے تنہا نہیں چھوڑا جا سکتا۔ متاثرہ علاقوں میں امدادی سرگرمیوں کے عمل کو زیادہ تیزی کے ساتھ سرانجام دینے کی ضرورت ہے تاکہ ملبے کے نیچھے دبے ہوئے افراد کو نکالا اور متاثرین کو ادویہ اور خوراک کی فوری فراہمی کو یقینی بنایا جا سکے۔انہوں نے کہا کہ اس المناک سانحہ پر ہمیں نیپال کی حکومت اور عوام سے دلی ہمدردی ہے اور بڑے پیمانوں پر قمیتی جانوں کے ضیاع پر انہیں تعزیت پیش کرتے ہیں۔

وحدت نیوز(آرٹیکل)سعودی وزير دفاع محمد بن سلمان آل سعود نے پوری دنيا كے سامنے جہان اسلام كی تنہا ايٹمی قوت پر فخر كرنے والے پاكستان اور اس کی 20 كروڑ پاکستانی عوام , پاكستانی مسلح افواج اور حكومت کی تکذیب و اہانت کی ہے. قارون،نمرود وفرعون کے وارثوں نے پاكستانی عوام كی نمائنده پارليمنٹ كی حكيمانہ اور دليرانہ فيصله كے بعد ايک نا كام اور شكست خورده  يمن كيخلاف"فيصله كن طوفان" كے بعد پاكستان کے خلاف "طوفان بدتميزی" شروع كر ديا ہے. غيرت ملی كا تقاضا ہے كہ ہمارے ہم وطن اس مسئلے كو مذہبی اور مسلکی نقطہ نظر سے نہ لیں بلكہ ان عرب شهزادوں نے پوری پاكستانی قوم كی عزت وآبروكوچیلنچ كيا ہے سب پاكستانی شہریوں كو خواه وه سنی ہوں يا شيعه , اسماعیلی , بريلوی ہوں يا ديوبندی يا اہل حديث  اور خواه غير مسلم ہوں سب كوملكر پاكستان اور پاكستانی قوم كی آبرو اور عزت كا دفاع كرنا ہوگا . اور بھرپور جواب دينا ہوگا  تاكہ دنيا میں كسی كو جرأت نہ ملے كہ پاكستان اور پاكستانی قوم پر لب كشائی كر سکے. اور حكومت پاكستان اور سياسی ومذہبی پارٹیوں كو بھی آئے دن اس ہونے والى اہانت اور جسارت كا مؤثر جواب دينا ہو گا. ذلت كی زندگی سے عزت كی موت بہتر ہے . ہمیں تو یہی بزرگوں نے تعليم دی ہے۔ بقول مفکر پاکستان ڈاکٹر علامہ اقبال کہ جو ذلت کو ننگ و عار سمجھتے ہیں اور فرماتے ہیں۔

اے طائر لاہوتی اس رزق سے موت اچھی                    ۔۔۔۔۔۔۔۔۔جس رزق سے آتی ہو پرواز ميں كوتاہی

ہم سعودی وزير دفاع کے اس بيان كی پر زور مذمت كرتے ہیں اور حكومت سے مطالبہ كرتے ہیں كہ جب تک سعودی حكومت پاكستان اور پاكستانی عوام سے معافی نہیں مانگتے  پاكستان اپنے سفارتی تعلقات سعوديہ سے ختم كر دے اور پاكستان ميں موجود سعودی مراكز بند كر دے.
سعودی وزير دفاع محمد بن سلمان آل سعود  نے پاكستان كے نظام ،آئین, پاكستانی آرمی , پاكستانی حكومت اور پاكستانی عوام كی ان الفاط ميں اہانت كی ہے اور گالياں بكیں ہیں.
اور كہیں بھی ذكر نہیں كيا كہ "يمن كے خلاف فيصله كن طوفان" حملہ حرمين شريفين كے دفاع كی لئے ہے كہ جس كا پاكستان ميں پروپیگنڈہ ہوتا رہا ہے اور ہو رہا ہے .
سعودی وزیر دفاع نے جن الفاظ اور منطق کا استعمال کیا ہے وہ ناقابل برداشت ہے اور اس کے چند نقاط یہ ہیں۔

(1)۔ جهوٹی جمہوريت كے دعويدا بن كر ہم پر فخر كرتے ہیں۔ ان دھوکہ بازوں كو جان لينا چاہیے كہ وه جن اپنے اعلى فوجی عہدوں پر ناز كرتے ہیں ان کی حالت یہ ہے كہ اپنی داخلى چھوٹی سی مشكل بهی حل كرنے كی استطاعت نہیں ركھتے۔
(2)۔ اگرہم ان حکمرانوں کی مالی , میڈیا اور معلومات كے ميدان ميں مدد نہ كرتے تو وه كبهی اپنے مخالفين كو ہٹا كر آج حكومت حاصل نہ كر سکتے۔
(3)۔ اور وه (موجودہ حکمران)  ہم سے بھیگ مانگا کرتے تھے اور جو مال خدا نے ہمیں دیا ہے اس میں سے بھیگ اور خیرات مانگ رہے ہیں۔
(4)۔ پھرہمارے احسانات بھول جاتے ہیں اوربنبنا تے ہوئے کہتے ہیں کہ یمن کے مسائل کا بہتریںن حل پرامن مزاکرات ہیں۔  اور بهول جاتےہیں كہ يمن كے خلاف حملہ بنام "فيصله كن طوفان"حقيقت ميں "عروبہ" يعنی عرب ازم كا دفاع ہے۔ اور ہر با شرف عربی كے لئے باعث فخر ہے. اور امن كے قيام اور باغی گروہ كوکچلنے کے لئے ہے.
(5)۔ ہمیں ان لوگوں(پاکستانیوں) كی مدد كی ہرگزضرورت نہیں ہے كہ جن کے مزدوروں كو اگرہم ملک بدر كر ديں  جو ہمارے ہاں مزدوری کرتے ہیں تو دیکھنا کہ کیسے یہ ہماری منت وسماجت کرتے ہیں اورالٹا ہمیں کتوں کی طرح بھونکتے ہیں. "

وطن عزيز پاكستان اور ہماری قومی غيرت پر حملے ہو رہے ہیں خدا را تمام مذاہب ومكاتب فكر كے بہن بھائیوں سے التماس ہے كه اسے مذہبی اور فرقے كا رنگ نہ دياجائے اور حكمران الله تبارك وتعالى كی ذات پر ايمان ويقين كا مظاهره كرتے ہوئے جرأتمندانہ انداز سے ملک وقوم كا دفاع كريں. اور ايسا دندان شكن جواب دين كہ ان فرعونوں كے دماغ ٹھکانے پر آ جائيں۔ اور حکمرانوں کے ایسے جراتمندانہ اقدامات پر پوری قوم ان کا ساتھ دے گی۔

وحدت نیوز (گلگت)  گلگت بلتستان کی پسماندگی کے اصل ذمہ دار مسلم لیگ ن اور پیپلز پارٹی ہے جنہوں نے صرف جھوٹے وعدوں کے علاوہ علاقے کے عوام کے بنیادی مسائل کی طرف کوئی توجہ دی ہی نہیں۔پیپلز پارٹی کا پانچ سالہ دور حکومت کرپشن کی نذر ہوگیا اور سرعام ملازمتیں فروخت کرکے میرٹ کی دھجیاں اڑائی گئیں۔وفاق میں برسر اقتدار نواز لیگ کے دو سال پورے ہونے کو ہے اور الیکشن سے قبل جناب وزیر اعظم کو گلگت بلتستان کے عوام کا خیال آیا اور الیکشن کو ہائی جیک کرنے کیلئے گلگت کا طوفانی دورہ کرکے پرانے منصوبوں پر اپنے نام کی تختیاں لگا گئے۔ان خیالات کا اظہار مجلس وحدت مسلمین پاکستان کے ڈپٹی سیکرٹری جنرل علامہ محمد امین شہیدی نے علمدار روڈ دینور میں بڑے عوامی جلسہ عام سے خطاب کرتے ہوئے کیا، جبکہ دیگر مقررین میں ایم ڈبلیوایم کے مرکزی رہنما علامہ اعجاز بہشتی ، صوبائی رہنما علامہ نیئر عباس ، ڈویژنل رہنما علامہ بلال ثمائری اور دیگر شامل تھے۔

علامہ امین شہیدی نے خطاب کرتے ہوئے کہا کہ پاکستان میں باریاں لینے والی پاکستان پیپلز پارٹی اور نواز لیگ نے کرپشن اور اقربا پروری کی بد ترین مثالیں قائم کی ہیں۔وزیر اعظم نواز شریف نے اپنے داماد اور دوست کو نوازنے کیلئے گلگت بلتستان کے عوام کے حقوق پر ڈاکہ ڈال کر اقتصادی راہداری زون کو حویلیاں اور ڈی آئی خان میں بنانے پلان تیار کیا ہے۔

انہوں نے کہا کہ حقوق کے حصول کیلئے بیداری ضروری ہے اور مجلس وحدت مسلمین عوامی بیداری کے فریضے پرگامزن ہے اور پاکستان بھر میں مظلوموں کو ایک پلیٹ فارم پر متحد کرکے ظالموں و جابر حکمرانوں کے سامنے کھڑی ہے ۔مجلس وحدت مسلمین کی اس جرات اور استقامت سے حاکم طبقہ گھبرایا ہوا ہے اور اس بوکھلاہٹ کے نتیجے میں لیگی حکومت اوچھے ہتھکنڈوں پر اتر آئی ہے۔ انہوں نے کہا کہ گلگت بلتستان میں وحدت مسلمین کے رہنماؤں نے یمن کے مظلوم عوام کی حمایت اور سعودی جارحیت کی مذمت میں ریلی نکال کر وہی مطالبہ کیا تھا جو آج ملک کی پارلیمنٹ نے قرارداد کی شکل میں پاس کیا لیکن گلگت بلتستان کی متعصب نگران حکومت نے مظلوموں کیلئے آواز بلند کرنے وحدت کے رہنماؤں کے خلاف بے بنیاد مقدمات قائم کرکے سیاسی انتقام کا نشانہ بنایا ہے۔