وحدت نیوز(گلگت) مجلس وحدت مسلمین پاکستان گلگت اور اہلیان غلمت نگر  کے زیر اہتمام عظمت ولایت کانفرنس کے عنوان سے عظیم الشان  اجتماع کا انعقاد کیا گیا جس میں مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری ، مجلس وحدت مسلمین بلوچستان کے رہنما اور رکن بلوچستان اسمبلی آغا سید محمد رضا ، پاکستان پیپلز پارٹی کے سینیٹرسید فیصل رضا عابدی ، علامہ شیخ اعجاز بہشتی سمیت مقامی مختلف سیاسی و مذہبی جماعتوں سے تعلق رکھنے والے قائدین اور عمائدین   نے خطاب کیا، اہلیان نگر کی جانب سے اجتماع کے دوران 3 نومبر کو منعقد کیے جانے والے دفاع وطن کنونشن کو بہت سراہا گیا ۔اس موقع پر مجلس وحدت مسلمین پاکستان کے مرکزی رہنماعلامہ امین شہیدی ، ناصر عباس شیرازی، ملک اقرار حسین صوبائی رہنما علامہ شیخ نیئر عباس، علامہ مظاہر موسوی، ڈویژنل رہنما علامہ شیخ بلال سمائری   و دیگر بھی موجود تھے ۔

دوران خطاب قائدین کا کہنا تھا کہ اب ہمیں عقیدے کی خاطر متحد ہونا ہوگا، سیاسی پارٹیوں کی شعبدہ بازیوں سے دھوکا نہیں کھانا، شیعہ قوم کی بقاء وحدت پر انحصار کرتی ہے ، قائدین کا یہ بھی کہنا تھا کہ دفاع وطن کنونشن کسی خاص سیاسی یا مذہبی جماعت کی نمائندگی کرنے کے لیے نہیں منعقد کیا گیابلکہ اس کا مقصد تمام شیعہ سنی  عوام خصوصاً گلگت بلتستان سے تعلق رکھنے والی شیعہ سنی قوم کو وحدت کی لڑی میں پرونا ہے۔انشاء اللہ یہ اجتماع گلگت بلتستان میں نئی سیاسی تاریخ رقم کرے گا ۔