وحدت نیوز(کراچی)مجلس وحدت مسلمین سندھ کے صدر علامہ باقرعباس زیدی نے کہا ہے کہ یوم شہادت امیر المومنین امام علیؑ ابن ابی طالب علیہ السلام پاکستان کے دیگر صوبوں کی طرح سندھ بھر میں مذہبی عقیدت اور احترام کے ساتھ منایا جائے گا، حکومت اور قانون نافذ کرنے والے ادارے یوم علیؑ کے موقع پر سندھ بھر میں فول پروف سیکورٹی انتظامات کو یقینی بنائیں۔
ان خیالات کا اظہار انہوں نے وحدت ہاؤس کراچی میں صوبائی کابینہ کے اجلاس سے خطاب میں کیا۔ اجلاس میں صوبائی سیکرٹری سیاسیات سید علی حسین نقوی، علامہ مختار امامی، علامہ رضا محمد سعیدی، چوہدری اظہر حسن، ارشد اللہ مکتبی، محمود الحسن، طارق بدوی، ندیم جعفری، حیدر زیدی، ناصر الحسینی سمیت دیگر رہنما بھی موجود تھے۔
علامہ باقر عباس زیدی نے کہا کہ 21 رمضان المبارک یوم شہادت امام علیؑ کے موقع پر مجالس اور عزاداری کے اجتماعات کا سلسلہ شروع ہو چکا ہے، دنیا بھر کی طرح ملک خداداد پاکستان میں 19 سے 21 رمضان المبارک مجالس و جلوس عزاء کا سلسلہ جاری رہے گا، جبکہ روز شہادت علیؑ کو ملک بھر میں مرکزی اجتماعات جلوس عزاء نکالے جائیں گے، حکومت اور قانون نافذ کرنے والے ادارے یوم علیؑ کے موقع پر سندھ بھر میں فول پروف سیکورٹی انتظامات کو یقینی بنائیں۔
علامہ باقر عباس زیدی نے کہا کہ امیرالمومنین امام علیؑ کو شدت عدل کی وجہ سے شہید کر دیا گیا، امام علیؑ نے عدالت کے قیام کیلئے اپنی جان قربان کی اور اسی طرح کربلا میں بھی عدالت کے قیام کیلئے امام حسینؑ نے بے مثل قربانی دیکر اسلام اور عدالت کو تحفظ فراہم کیا۔ انہوں نے کہا کہ آج ضرورت اس امر کی ہے کہ پاکستان کے حکمران امام علیؑ کے طرز حکومت کو اپنا اسوہ قرار دیں۔ صوبائی صدر نے کہا کہ ہم پاکستان میں عدل و انصاف اور قانون کی بالادستی پر یقین رکھتے ہیں، لیکن یہ اسی صورت قائم ہو سکتی ہے کہ جب حکمران امیرالمومنین امام علیؑ کی سیرت پر عمل پیرا ہوں اور نظام حکومت میں امام علیؑ کے طرز حکمرانی کو سیرت قرار دیں۔
