وحدت نیوز(ٹھٹھہ) مجلس وحدت مسلمین پاکستان صوبہ سندھ کے سیکریٹری جنرل علامہ مقصود علی ڈومکی ، ضلع ٹھٹہ کے تنظیمی دورے پر پہنچے تو سید اسد اللہ شاہ کی قیادت میں کارکنوں نے ان کا استقبال کیا۔ اس موقع پر صوبائی سیکریٹری سوشل میڈیا برادر مختار دایو بھی ان کے ہمراہ تھے۔

اس موقع پر ٹھٹہ پریس کلب میں پریس کانفرنس سے خطاب کرتے ہوئے انہوں نے کہا کہ ستر روز سے جاری بھوک ہڑتال کا مقصد ملک سے دھشت گردی اور تکفیری سوچ کا خاتمہ ہے۔نیشنل ایکشن پلان کو نواز شریف سرکار اپنے مخالفین کے خلاف استعمال کررہی ہے ۔انہوں نے مطالبہ کیا کہ سانحہ شکارپور ، چھلگری اور جیکب آباد سمیت ملک بھر میں ہونے والے دھشت گردی کے مقدمات فوجی عدالتوں میں بھیجے جائیں گے۔

انہوں نے کہا کہ المیہ یہ ہے کہ رحیم آباد میں سینکڑوں کلو گرام بارود ی مواد اور خودکش جیکٹس ملیں،مجرم رنگے ہاتھوں پکڑے گئے مگر انہیں ریاستی اداروں نے سزا دینے کی بجائے با عزت بری کر دیا۔اس وقت بھی ضلع شکارپور سمیت سندہ بھر دہشت گردوں کے اڈے،ٹریننگ کیمپس اور تربیتی مراکزجاری ہیں۔مگر ان کے خلاف کوئی ایکشن نہیں ہو رہا۔نیشنل ایکشن پلان کے باوجود ملک کے چپے چپے پر دہشت گرد وں اورکالعدم جماعتوں کے پرچم اور نفرت انگیز سر گرمیاں سوالیہ نشان ہیں؟
شکارپور ،جیکب آباد،خیر پور،شھداد کوٹ و دیگر اضلاع میں دہشت گردوں کی بڑھتی ہوئی سر گرمیوں پر ہم تشویش کا اظہار کرتے ہیں۔