وحدت نیوز(ڈی آئی خان)مجلس وحدت مسلمین ضلع ڈیرہ اسماعیل خان کی کابینہ کا اجلاس ضلعی سیکرٹری جنرل مولانا سید غضنفر علی نقوی کی سربراہی میں منعقد ہوا، اجلاس میں صوبائی ڈپٹی سیکرٹری جنرل سید اسد علی زیدی، ضلعی سیکرٹری تبلیغات مولانا اظہر عباس ندیم پرنسپل القائم حفظ القرآن، سیکرٹری روابط محمد سبطین، میڈیا سیکرٹری سید بلال کاظمی سمیت دیگر اراکین نے شرکت کی۔
اجلاس کے شرکاء نے یادگار شہداء کو انتظامیہ کی جانب سے منہدم کرنے کی شدید الفاظ میں مذمت کی۔
غضنفر نقوی کا کہنا تھا کہ 5 سال قبل یادگار شہداء کی بنیاد علامہ راجہ ناصر عباس جعفری نے شہداء کے ورثاء اور ملت جعفریہ کے جمع غفیر میں رکھی، جہاں ہزاروں مومنین کی شرکت تھی، ہم کسی صورت شہداء کی یاد سے تغافل نہیں کر سکتے، شہداء ملت ہی ہیں جن کے ناحق خون کے سبب ملت کی آبرو اور بقاء ہے۔
اجلاس سے خطاب کرتے ہوئے مولانا غضنفر نقوی کا کہنا تھا کہ اگر انتظامیہ کی جانب سے مزید کسی مشکل کا سامنا کرنا پڑا تو ہم ہر قسم کی تکالیف سہنے و برداشت کرنے کے لئے تیار ہیں لیکن اپنے موقف سے ایک انچ بھی پیچھے نہیں ہٹیں گے۔
