وحدت نیوز (سکردو) سیکریٹری جنرل مجلس وحدت مسلمین گلگت بلتستان آغا علی رضوی نے اپنے ایک بیان میں کہا کہ یکم نومبر یوم آزادی گلگت بلتستان کے روز وزیر اعظم پاکستان عمران خان کی طرف سےگلگت بلتستان کو عبوری آئینی صوبے کی حیثیت دینے کا اعلان خوش آئندہے۔
ہمارا دوٹوک موقف اور مطالبہ ہمیشہ سے رہا اور مجلس وحدت مسلمین کی قیادت نے حالیہ سیٹ ایڈجسٹمنٹ کے فیصلے میں سب سے اہم اور بھرپور مطالبہ یہی کیا تھا کہ گلگت بلتستان کے عوام کو حقوق کی فراہمی، احساس محرومی کے خاتمے کو یقینی بناتے ہوئے قومی دھارے میں شامل کیا جائے۔
انہوں نے مزید کہا کہ اب ہمارے مطالبے پر عملدرآمد کیطرف بڑھتے ہوئے اس غیر معمولی فیصلے کا اعلان انتہائی اہمیت کی حامل ہے۔ ہم توقع کرتے ہیں کہ وزیر اعظم کے اس اعلان کو من و عن عملی جامہ پہناتے ہوئے تہتر سالہ محرومیوں کے خاتمے کی نوید جلد عوام کو سننے کو ملے گی۔
