وحدت نیوز(اسلام آباد)مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ نائیجیریا کے عالمی شہرت یافتہ ممتاز عالم دین اور انقلابی رہنما علامہ محمد ابراہیم زکزاکی کی بلاجواز اور طویل قید سے عالمی سطح پر امت مسلمہ میں شدید تشویش پائی جاتی ہے۔ زکزاکی دنیا کے کروڑوں انسانوں کے محبوب رہنما ہیں۔ جو اپنے اخلاص ایثار جہاد فی سبیل اللہ اور عزم راسخ کے باعث دنیا بھر میں ایک عظیم رہنما کے طور جانے جاتے ہیں۔ نائیجیریا کی بدنام زمانہ بوھاری حکومت اپنے عوام پر مظالم کا سلسلہ بند کرے۔  6 جوان بیٹوں کی شہادت کے بعد شیخ محمد ابراہیم زکزاکی اور ان کی زوجہ کو زخمی حالت میں گرفتار کیا گیا اور وہ تا حال پابند سلاسل ہیں۔

 انہوں نے کہا کہ علامہ محمد ابراہیم زکزاکی فقط نائیجیریا کے لئے نہیں بلکہ پورے جہان اسلام کے لئے ایک عظیم مجاہد اور ایک فداکار عالم کی حیثیت رکھتے ہیں ان کی بلاجواز اور طویل قید کے خلاف دنیا بھر کے حریت پسند مسلسل آواز بلند کر رہے ہیں۔ انہوں نے شیخ ابراہیم زکزاکی کی رہائی کے لئے ٹیوٹر کمپین کو خوش آئند قرار دیتے ہوئے اپیل کی کہ ابراہیم زکزاکی کے حق میں ہر سطح پر آواز بلند کی جائے۔ انہوں نے کہا کہ نائیجیریا میں بوھاری حکومت مظلوم عوام  پر مظالم ڈھا رہی ہے۔

وحدت نیوز(کھرمنگ)  مومنین کھرمنگ کے تعاون سے المجلس ڈیزاسٹر مینجمنٹ سیل ضلع کھرمنگ کے زیر اہتمام طے شدہ امدادی پروگرام کے تحت  کھرمنگ کے بارڈر ایریاز ، ترکتی سے اوپر کے تمام موضعات اور نالہ جات میں مقیم ضرورت مند فیملیز تک امدادی رقوم تقسیم کئے۔ المجلس ڈیزاسٹر مینجمنٹ سیل کے ذمہداران میں سکریٹری جنرل ایم ڈبلیو ایم کھرمنگ شیخ اکبر رجائی، ڈپٹی سکریٹری جنرل جناب شیخ یعقوب محمدی، متحرک صوبائی رہنماؤں راجہ ولایت علیخان اور نصرت علی، مجلس وحدت کھرمنگ کے سرگرم بزرگ رہنما حاجی محسن علی، شریف ولی کھرمنگی، انجنئیر شجاعت حسین یورنگوت، امام جماعت اولڈنگ شیخ ہادی مقدسی، نوجوان سماجی کارکن اکبر روحانی اولڈنگ و دیگر شامل تھے۔

 اس دوران مختلف علاقوں کے مقامی علمائے کرام اور سماجی شخصیات بھی ہمراہ رہے، اور مستحقین کی شناخت اور ان تک امداد پہنچانے میں معاونت کیں۔ کرونا وایریس کی وجہ سے پیدا شدہ مشکل حالات اور رمضان المبارک کی آمد پر اس پروگرام کے تحت انتہائی ضرورت مندوں کو فوکس کرنے کی کوشش کی گئی۔ ان علاقوں میں اولڈنگ ، ہرغوسیل نالہ، میموش تھنگ ، میموش،  بریسل، بریسیل چھو، گنگنی، بلارگو،بلارگو پایو، سیر تھنگ بلارگو، برولمو، مورول، گنوخ، دنسر تھنگ ،ژے ژے تھنگ، ترکتی، حمزیگونڈ، سنکرمو، اور تمام ملحقہ محلہ جات و موضعات شامل ہیں۔ پہلے مرحلے میں ان علاقوں کے مقامی علمائے کرام کے توسط سے اصل مستحقین کی نشاہدہی کی گئی اور انہی علماء کے ذریعے معلوم شدہ فیملیز تک امداد پہنچا دیئے گئے۔

 المجلس ڈیزاسٹر منیجمنٹ سیل کھرمنگ اس کار خیر میں حصہ لینے والے تمام مومنین کرام کے ممنون و مشکور ہیں۔ ان دور افتادہ علاقوں میں دیں مبین اسلام کی تبلیغ اور مومنین کی خدمت میں مصروف عمل معزز علمائے حقہ کے ممنون و مشکور ہیں۔ واضح رہے کہ تائید خداوندی کے طفیل صرف اور صرف ضلع کھرمنگ کے ہی چند درجن مومنین کی مالی معاونت نے کرونا وایریس کی وجہ سے پیدا شدہ حالیہ مشکل صورتحال میں چند ایام کے اندر ہی مستحقین کی امداد کے لئے مرتب کئے اس امدادی سرگرمی کو کامیابی عطا کی۔ بہت زیادہ نہ سہی مگر ان تمام بارڈرز سے ملحقہ دور دراز علاقوں کے مستحق فیملیز کو ایک امدادی پیکیج با عزت، باوقار اور بالکل غیر محسوس انداز میں پہنچانے کی سعی کی۔ بحق آئمہ معصومین علیھم السلام ان تمام مومنین کرام کو آباد و بامراد رکھے، انکو اور انکی فیملیز کو صحت و سلامتی عطا ہو، خدا پاک انکی توفیقات خیر میں اضافہ فرمائے۔

ضرورت مند فیملیز کی نشاندہی، تقسیم کے عمل میں بھرپور کردار ادا کرنے والے علمائے عظام اور مختلف علاقوں کے زعماء، طلبا و دیگر مومنین کے بھی مشکور و ممنون ہیں، خدا ان سب مومنین کی خلوص و توکل اور عزم و حوصلے کو دوام بخشے، انکی دنیاوی و اخروی حوائج شرعیہ برآور فرمائے۔ آمین۔ انشاللہ تعالیٰ اگلے مرحلے میں ترکتی سے نیچے کے علاقوں اور ملحقہ نالہ جات کے مستحقین کی امداد کیجائے گی۔ اس سلسلے میں آپ سب کو پہلے سے بڑھ کر تعاون اور روابط کرنے کی ضرورت ہے۔ خداوند متعال کی نصرت و تائید حاصل رہی تو اگلے مرحلے میں بھی اسی طرح مکمل عزت و تکریم کیساتھ مقامی علمائے عظام و مومنین کرام کی تشخیص کردہ حقیقی مستحقین و معذورین تک مخیر مومنین کیجانب سے جمع شدہ امداد پہنچائے جائیں گے۔ انشاللہ العزیز۔

وحدت نیوز(میانوالی) المجلس ڈیزاسٹر مینجمنٹ سیل ضلع میانوالی کے پلیٹ فارم سے سابق سیکرٹری جنرل علمدار حسین ایڈووکیٹ کی خصوصی دلچسپی سے لاک ڈاون سے متاثرہ، غریب، نادار اور مستحق 100خاندانوں میں تین لاکھ روپے کا راشن تقسیم کیا گیا، اس موقع پر صوبائی سیکرٹری جنرل علامہ اقتدار حسین نقوی، صوبائی کوارڈینیٹر المجلس ڈیزاسٹر منیجمنٹ سیل سید زعیم حیدر زیدی، ضلعی سیکرٹری جنرل سید عابد حسین عابدی اور سابق ضلعی سیکرٹری جنرل علمدار حسین ایڈووکیٹ موجود تھے۔

صوبائی سیکرٹری جنرل نے اس موقع پر گفتگو کرتے ہوئے کہا کہ الحمداللہ جنوبی پنجاب کے دیگر اضلاع کی طرح میانوالی میں بھی المجلس ڈیزاسٹر منیجمنٹ سیل کے ورکر قابل تحسین ہیں اور بالخصوص علمدار حسین ایڈووکیٹ جنہوں نے میانوالی میں ایسے افراد تک امداد پہنچائی جو مستحق اور سفید پوش خاندان تھے۔

 اُنہوں نے مزید کہا کہ اس وقت کرونا کے خلاف ہم سب کو اپنا اپنا کردار ادا کرنا ہوگا، ضروری نہیں کہ ہم لاکھوں روپے کی امداد کریں بلکہ ہم اپنی بساط کے مطابق اگر اپنے محلے اور علاقے میں مستحقین کی مدد کریں تو مشکل کی اس گھڑی کا مقابلہ کیا جاسکتا ہے، میانوالی کے علاوہ جنوبی پنجاب کے دیگر اضلاع بھی مشکل کی اس گھڑی میں قوم کے ساتھ کھڑے ہیں۔

وحدت نیوز(اسلام آباد)مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ پاکستانی عوام نے ہمیشہ فلسطین اور قبلہ اول کی آزادی کی تحریک کی حمایت کی ہے فلسطین پر اسرائیل کا غاصبانہ قبضہ کسی صورت منظور نہیں اسرائیل ایک ناجائز ریاست ہے جو محو ہونے کے لئے ہے۔

انہوں نے شہداء یوم القدس کوئٹہ پاکستان کو سلام عقیدت پیش کرتے ہوئے کہا کہ پاکستانی عوام کو یہ اعزاز حاصل ہے کہ ہم نے بیت المقدس کی آزادی کے لئے اپنا خون دیا ہے ہم اپنے عظیم شہیدوں کے ساتھ یہ عہد کرتے ہیں کہ تحریک آزادی فلسطین کی حمایت جاری رکھیں گے۔

انہوں نے کہا کہ اسرائیل غاصب کی حامی خائن لابی کو ہم یہ بات واضح طور پر بتانا چاہتے ہیں کہ پاکستانی عوام کبھی بھی کشمیر اور فلسطین سے دست بردار نہیں ہوں گے اور نہ ہی تحریک آزادی کے سلسلے میں کسی خیانت کو تسلیم کریں گے۔ بعض خائنوں کی اور سامراجی ایجنٹوں کی جانب سے  وطن عزیز پاکستان کی جانب سے غاصب اسرائیل کو تسلیم کرانے کا خواب کبھی پورا نہیں ہو گا۔

وحدت نیوز(میانوالی) مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی دو روزہ دورے پر میانوالی پہنچ گئے، جہاں اُنہوں نے میانوالی شہر میں ایتام پروجیکٹ کی رقوم مستحقین میں تقسیم کیں۔ اس موقع پر صوبائی کوارڈینیٹر المجلس ڈیزاسٹر منیجمنٹ سیل جنوبی پنجاب سید زعیم حیدر زیدی اور ضلعی سیکرٹری جنرل میانوالی سید عابد حسین عابدی بھی موجود تھے۔ علامہ اقتدار حسین نقوی نے اس موقع پر ایتام پروجیکٹ میں شامل افراد میں ماہانہ وظائف کے ساتھ ساتھ دودھ بھی تقسیم کیا۔

علامہ اقتدار نقوی کا کہنا تھا کہ کرونا وائرس کے باعث ملک کی ستر فیصد آبادی جو غربت، ناداری اور سفید پوشی کی زندگی بسر کر رہی ہے، وہ متاثر ہوئی ہے، اس وقت ملک میں ایمرجنسی کی صورتحال ہے، مخیر حضرات اس موقع پر آگے بڑھیں اور مستحق و نادار افراد کی معاونت کریں، الحمداللہ دیگر اداروں کے ساتھ ساتھ المجلس ڈیزاسٹر مجنیمنٹ سیل کے پانچ ہزار سے زائد والنٹیئر ملک بھر میں عوامی خدمت میں مصروف ہیں اور اب تک ملک بھر میں ستر ہزار کے قریب افراد میں راشن اور کھانا تقسیم ہوچکا ہے، مجلس وحدت مسلمین کے سربراہ علامہ راجہ ناصر عباس جعفری نے تمام تنظیمی سرگرمیوں کو معطل کرتے ہوئے ہدایت کی ہے کہ مشکل کی اس گھڑی میں بڑھ چڑھ کر اپنا کردار ادا کریں۔

شیعت نیوز: رمضان المبارک میں یوم علیؑ کی مناسبت سے مجالس عزاء میں حکومتی ایس او پیز پر عملدرآمد یقینی بنایا جائے گا، عزاداروں کی حفاظت اولین ترجیح ہوگی۔ ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے صوبائی کابینہ کے آن لائن ہونیوالے اجلاس کی صدارت کرتے ہوئے کیا۔ اجلاس میں کابینہ کے ارکان نے اپنے اپنے گھروں میں بیٹھ کر بذریعہ آن لائن شرکت کی۔ علامہ عبدالخالق اسدی نے کہا کہ 21 رمضان المبارک یوم شہادت حضرت علی علیہ السلام حکومتی شرائط کے مطابق منائیں گے۔ یہ خطرناک وباء ہے اس حوالے سے مراجع عظام اور ماہرین طب نے بھی واضح پالیسی دی ہے، اس لئے ہمارے لئے مراجع کرام کا حکم حجت ہے، اسی پر عمل کیا جائے گا۔

انہوں نے کہا کہ پروگرام ضرور ہوگا تاہم  ایس او پیز کو ملحوظ خاطر رکھا جائے گا۔ انہوں نے کہا کہ حکومت نے تراویح کی اجازت دیدی ہے، اب یوم علیؑ کی بھی اجازت ہوگی لیکن اسے محدود سطح پر ہی منعقد کرنا ہوگا۔ کابینہ ارکان کا کہنا تھا کہ اس حوالے سے علامہ راجہ صاحب جو پالیسی دیں گے اس پر عمل کیا جائے گا، اس لئے علامہ راجہ ناصر عباس وزیراعظم یا صدر مملکت سے ملاقات کرکے اس حوالے سے پالیسی بیان جاری کروائیں۔ تربیتی امور کے حوالے سے نقی ہاشمی اور تنظیم سازی مہم کے سلسلہ میں منتظر مہدی نے کارکردگی رپورٹ پیش کی، جس پر تفصیلی بحث کی گئی۔ منتظر مہدی نے بتایا کہ تنظیم سازی مہم حوصلہ افزا رہی اور بہت سے موثر افراد نے جماعت مییں شمولیت اخیتار کی ہے۔

انہوں نے کہا کہ مختلف اضلاع کے سیکرٹری تربیت کو بھی فعال کر دیا گیا ہے اور مرکز کے پروگرام پر بھی عملدرآمد کیا جا رہا ہے۔ علامہ عبدالخالق اسدی نے کہا کہ تنظیم سازی کا کام ہر صورت میں جاری رکھا جائے، یہ بیادی عنصر ہے، اس میں غفلت کا مظاہرہ نہ کیا جائے۔ انہوں نے کہا کہ موجودہ ماحول تنظیم سازی کے حوالے سے ساز گار ہے۔ انہوں نے کہا کہ اضلاع کی کابینہ مکمل کی جائے اور اضلاع کی کابینہ کے اجلاس کروائے جائیں اور صوبائی کابینہ میں ہونیوالے فیصلے کے مطابق یونین کونسل کی سطح پر یونٹس کے قیام اور اجلاسوں کا انعقاد لازمی کروانا ضرور ی ہیں۔ انہوں نے کہا کہ سیاسی سطح پر بھی اپنی شخصیات کو متعارف کروایا جائے۔ سید نجیب نے کہا کہ تنظیم سازی کے بعد اگلہ مرحلہ دیگر شعبوں پر توجہ ہے، وہاں دیگرشعبوں کو نظرانداز نہ کیا جائے۔

منتظر مہدی نے کہا کہ تنظیم سازی کیساتھ ساتھ تربیتی اور فلاحی امور پر بھی توجہ دی جا رہی ہے۔ انہوں نے کہ لاک ڈاؤن کے باعث تنظیمی شعبہ کا اجلاس نہیں ہو سکا جس کیلئے ساز گار ماحول ہوتے ہی اس کا انعقاد کیا جائے گا۔