وحدت نیوز (اسلام آباد) مجلس وحدت مسلمین پاکستان نے سپریم کورٹ کی طرف سے کورونا از خود نوٹس کیس میں فریق بننے کے لیے درخواست دائر کر دی ہے۔ایم ڈبلیو ایم کے مرکزی ڈپٹی سیکرٹری و سینئر ایڈووکیٹ سید ناصر شیرازی نے درخواست گزار کی حیثیت سے موقف اختیار کیا ہے کہ کورونا وائرس ایک عالمی وبا ہے جس نے دنیا کے دو سو سے زائد ممالک کو اپنی لپیٹ میں لے رکھا ہے۔پاکستان میں کورونا وائرس کے پھیلاؤ کے حوالے سے ملت تشیع کے خلاف میڈیا میں مسلسل اور بے بنیاد پروپیگنڈہ کیا جا رہا ہے۔ نفرت انگیز اور فرقہ وارانہ مواد کا بلارکاوٹ نشر ہونا پیمرا کی کارکردگی پر سوالیہ نشان ہے۔
زائرین کو قرنطینہ سینٹرز میں بھیڑ بکریوں کی طرح بٹھا کر کورونا وائرس کا شکار کیا گیا ۔جس کی ذمہ داری وزارت صحت پر عائد ہوتی ہے۔ایران سے واپس آنے والے زائرین پر کورونا پھیلانے کا الزام لگا کر پاکستانی زائرین کی کردار کشی کرنا ایک غیر سنجیدہ عمل ہے۔یہ مذموم مہم ان شدت پسند عناصر کے لیے بھی تقویت کا باعث ہے جو ملک میں وحدت واخوت کے خلاف پوری منصوبہ بندی سے سرگرم ہیں۔ملکی داخلی وحدت کو نشانہ بنا کے وبا کے خلاف جنگ کو متاثر کرنے کی کوشش کی جا رہی ہے ۔جس کے ذمہ داران کا تعین ضروری ہے۔
کورونا وائرس سے مقابلے کرنے کے لیے مشترکہ جدوجہد کو ترغیب دینے کی بجائے پوری قوم کوفرقہ وارنہ فکر میں الجھایاجارہا ہے جو ملک وقوم کے مفادات کے منافی اور موجودہ سنگین حالات کے تقاضوں کے برعکس ہے۔ پچاس دن قرنطینہ میں گزارنے اور رپورٹ منفی آنے کے باوجود زائرین کو ہراساں کیا جا رہا ہے اور ان کے گھروں کے باہر نفرت آمیز بورڈ لگائے جا رہے ہیں جو بدترین زیادتی اور شہری و انسانی حقوق کی خلاف ورزی ہے۔ملت تشیع ملک کے ذمہ دار اور باشعور شہری ہیں اورکورونا کو شکست دینے کے لیے طبی ماہرین کی ہدایات پر پوری طرح سے عمل پیرا ہیں۔
سیدناصر شیراز ی کا کہنا ہے کہ ملت تشیع کے حوالے سے ظفرمرزاکاکردار انتہائی غیر ذمہ دارانہ اور دانش و عقل سے عاری ہے۔وہ اپنی کوتاہیوں کو چھپانے کے لیے زائرین کو نشانہ بنانے میں مصروف ہیں جو حقائق کے سراسر منافی ہے۔اس سلسلے میں اصل حقائق کو قوم کے سامنے لایا جائے۔
وحدت نیوز(اسلام آباد) صدر مملکت جناب ڈاکٹرعارف علوی کی زیر صدارت ملک کے تمام مکاتب فکر کے علماء کرام کی بڑی بیٹھک میں فیصلہ ہوگیا کہ نماز جماعت و اعتکاف کی انجام دہی کے لیے حکومت کی جانب سے بنائے گئے ضوابط کی پابندی کرناہوگئی جبکہ یوم شہادت امیر المومنین حضرت علی ابن ابی طالبؑ اور یوم القدس کے اجتماعات بھی تمام تر احتیاط تدابیر پرعمل کرتے ہوئے انجام پزیر ہونگے ۔
صدر مملکت کی زیر صدارت اس اعلیٰ سطحی میٹنگ میں مکتب اہل بیت ؑ کی نمائندگی مجلس وحدت مسلمین پاکستان کے سربراہ علامہ راجہ ناصر عباس جعفری ، شیعہ علماء کونسل کےرہنماعلامہ عارف واحدی اور علامہ محمد امین شہیدی نے کی ۔ علامہ راجہ ناصر عباس جعفری نے کورونا وائرس کی عدم پھیلاؤ کہ حوالے سے حکومت کو ملت جعفریہ کہ مکمل تعاون کا یقین دلایا اور شیعہ مراجعین کے فتاویٰ کا بھی ریفرنس میٹنگ میں دیا ۔
اس موقع پہ علماء کرام نے نماز با جماعت ، اعتکاف کیساتھ ساتھ شہادت مولائے متقیان حضرت علی کی مجالس و جلوس جائے عزا و یوم القدس کے انعقاد اور حکومت کی جانب سے اعلان کردہ قواعد و ضوابط کیساتھ تعاون کی یقین دھانی کرائی ۔
اجلاس میں وفاقی وزیر مذہبی امور پیر نورالحق قادری، وزیر اعظم کے معاون خصوصی برائے صحت ڈاکٹر ظفرمرزا، چیئرمین اسلامی نظریاتی کونسل ڈاکٹر قبلہ ایاز سمیت دیگر مکاتب فکر کے علمائے کرام اور مشائخ عظام بھی شریک تھے ۔
وحدت نیوز (جیکب آباد) مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ ماہ شعبان بہترین موقع ہے کہ ہم عبادت و بندگی اور یاد خدا کے ذریعے اپنے آپ کو اللہ تعالی کے تقرب کے لئے آمادہ کریں۔ مناجات شعبانیہ اور آئمہ معصومین ع سے مروی دعائیں اور مناجات علم و عرفان کا سمندر ہیں جو ہماری دلوں میں عشق خدا کی شمع روشن کرتی ہیں۔
انہوں نےکہا کہ ماہ رمضان المبارک اللہ کا مہینہ ہے جس میں روزہ دار اللہ تعالی کا مہمان ہوتا ہے ہمیں ابھی سے دعا و مناجات اور بندگی کے ذریعے اپنے آپ کو اللہ کی مہمانی اور ضیافت کے لئے تیار کرنا چاہیئے۔
انہوں نےکہا کہ احساس کفالت پروگرام میں غریب پاسپورٹ ہولڈرز کو شامل کیا جائے۔ ہرسال لاکھوں غریب اور مستحق افراد کربلا معلی اور مشہد مقدس زیارات کے لئے جاتے ہیں انہیں احساس کفالت پروگرام کے تحت امداد ملنی چاہئے۔
انہوں نےکہا کہ سندھ حکومت کا راشن پروگرام شفاف نہیں لوگ امداد کے منتظر ہیں غربت اور بھوک سے خودکشی کرنے والوں کی ایف آئی آر حکمرانوں پر کاٹی جائے۔ سپریم کورٹ راشن کی تقسیم میں کرپشن کا نوٹس لے اور لاک ڈاون کے نتیجے میں غربت و افلاس کے نتیجے میں ہونے والی خودکشی کا سدباب کرے اور غربت و بھوک کے خاتمے کے حوالے سے حکومت کو فوری اقدامات کا پابند کرے۔
وحدت نیوز (اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری نے المجلس ڈیزاسٹر مینجمنٹ سیل کو امدادی سرگرمیوں میں تیزی لانے کی ہدایات جاری کیں ہیں ۔انہوں نے کہا کہ یہ وقت پوری لگن اور جانفشانی کے ساتھ قوم کی خدمت کرنے کا ہے ۔اسے غیر ضروری سرگرمیوں میں ضائع کرنے کی بجائے نیک مقاصد کی تکمیل کے لیے استعمال کیا جائے۔انہوں نے کہ نوجوان ہماری قوم کا سب سے قیمتی سرمایہ ہیں۔ ملک و قوم کو درپیش کسی بھی مشکل حالات میں ہمارے نوجوانوں کی صف اول میں موجودگی ہمارے لیے تقویت کا باعث ہے۔
انہوں نے کہا کہ کہ یہ وقت پوائنٹ سکورنگ کی بجائے ایک قوم بن کر عالمی وبا کا مقابلہ کرنے کا ہے۔سیاست دانوں کو چاہیے کہ وہ حالات کی سنگینی کا سنجیدگی سے درک کریں اورکورونا وائرس کو شکست دینے کے لیے ایک قوت بن کراپنے اپنے حصے کا کردار اداکریں۔نادار افراد کی کفالت ریاست کی ذمہ داری ہے۔ جو طبقہ اس وقت مالی مشکلات کا شکار ہے اس کے مسائل حل کرنے کے لیے مناسب اور فوری ریلیف کااعلان کیا جائے۔متوسط طبقے کے لیے یوٹیلٹی بلز کی معافی اور کرایہ داروں کو ان کی رہائش کا تحفظ اور کرایے کی ادائیگی میں سہولیات کی فراہمی کر کے حکومت انہیں بہت بڑی مشکل سے نجات دلا سکتی ہے ۔ایسے آڑے وقت میں اہل ثروت کو بھی میدان میں نکل کر مخلصانہ تگ ودو کرنا ہو گی۔انہوں نے کہا کہ طبی ماہرین کی طرف سے جاری ہدایات پر عمل موجودہ حالات کے لحاظ سے واجب ہے۔ہر مذہب و مسلک کے افراد کو چاہیے کہ وہ اپنے مذہبی اجتماعات کا انداز حکومتی تدابیر کے مطابق اپنائیں۔
وحدت نیوز(اسلام آباد) مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ علماء کرام اور مفتیان عظام کرونا وائرس سے نمٹنے کیلئے احتیاطی تدابیر پر عمل درآمد میں معاونت کریں تاکہ عوام کو اس وباء سے محفوظ رکھا جاسکے۔ انسانی جان کی حفاظت کے لئے فاصلہ اور احتیاطی تدابیر پر سختی سے عمل کرنا ہوگا ۔ پاکستان میں بڑھتے ہوئے کرونا کیسز پر تشویش ہے لہذا حکومت اور عوام مل کر کرونا وائرس کے پھیلاؤ کو روکیں۔
انہوں نےکہا کہ عوام لاک ڈاؤن کے دوران احتیاطی تدابیر پر عمل کریں۔ وبا کے دوران اپنے فرائض دیانتداری سے ادا کرنے والے ڈاکٹرز پولیس فوج رینجرز اور رضاکاروں کو سلام پیش کرتے ہیں جبکہ لاک ڈاون کے دوران بعض مقامات پر پولیس کا شہریوں کے ساتھ غیر مہذب رویہ ناقابل قبول ہے پولیس اور رینجرز کو شہریوں کے احترام کا درس دیا جائے۔ پولیس کی جانب سے شہریوں کے ساتھ اچھے اخلاق سے پیش آنے سے پولیس ڈپارٹمنٹ کے وقار اور نیک نامی میں اضافہ ہو گا۔
وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل سید ناصر شیرازی نے وزیر اعظم عمران خان کے فوکل پرسن شہریار آفریدی سے رابطہ کر کے انہیں ملک کے مختلف شہروں میں قائم قرنطینہ سینٹرزکے مسائل سے آگاہ کیا۔ زائرین کو درپیش مشکلات پر بھی فریقین کے درمیان تفصیلی بات چیت ہوئی اور ان کے حل کے لیے موثر حکمت عملی طے کرنے کی یقین دہانی کرائی گئی۔
شہریار آفریدی کو بتایا گیا کہ جھنگ کے جو زائرین اپنی قرنطینہ کی مدت پوری کرنے کے بعد اپنوںگھروںکو روانہ کیے گئے ہیں ان کی رہائش گاہوں کے باہر کورونا وائرس کے بورڈ آویزاں کرنا سمجھ سے بالاتر اور نامناسب عمل ہے۔ صحت یاب افراد کے گھروں کے باہر اس طرح کی غیر ضروری تحریریں لگانے کا سلسلہ روکا جائے گاتاکہ منافرت کی جو فضا پیدا ہورہی ہے اس پر قابو پایا جا سکے۔اس طرح کے اقدامات ملت تشیع کی دانستہ کردار کشی کے مترادف ہے۔
شہریار آفریدی نے فوری نوٹس لیتے ہوئے جھنگ کی متعلقہ انتظامیہ کو ہدایات جاری کیں اورزائرین کے گھروں کے باہر چپساں وہ نوٹس اتار لیے گئے۔ اسی طرح فیصل آباد اور شیخوپورہ کی اعلی انتظامیہ کو بھی زائرین کے مسائل حل کرنے کے لیے موقعہ پر ہدایات جاری کی گئیں ۔ مظفر گڑھ کے ڈپٹی کمشنر کوبھی بچیوں سے رابطہ کرکے ان کی داد رسی کرنے کے احکامات جاری کیے گئے۔
