وحدت نیوز(لاہور) تحریک وحدت اسلامی کے چیئرمین علامہ جاوید اکبر ساقی رضائے الہیٰ سےانتقال کرگئے۔ جاوید اکبر ساقی کچھ عرصے سےشدید  علیل تھے،انہیں جگرکا عارضہ لاحق تھا اور وہ ڈائلیسیزپر گذارہ کررہے تھے،  مرحوم کی نماز جنازہ آبائی شہر خوشاب میں ادا کی جائے گی،مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری ، علامہ احمد اقبال رضوی، ناصرشیرازی، اسدعباس نقوی،علامہ مبارک موسوی ، علامہ حسن رضا ہمدانی سمیت دیگر رہنماوں نے علامہ جاوید اکبر ساقی کی اچانک وفات کو قومی نقصان قرار دیا ہے،  رہنماؤں نےکہنا ہے کہ پاکستان ایک مخلص دینی کارکن سے محروم ہوگیا، جاوید اکبر ساقی شیعہ سنی اتحاد کیلئےانتہائی  سرگرم رہنما تھے، وحدت کے فروغ کیلئے انہوں نے نمایاں خدمات سرانجام دیں،وہ اہلسنت رہنما ہونے کے باوجود اہل تشیع میں بھی خاصے مقبول تھے، وہ مجالس عزاء سے بھی خطاب کیا کرتے تھے اور ہمیشہ اتحاد امت کیلئے کوشاں رہے،خدا وند متعال مرحوم کو جنت الفردوس میں اعلیٰ مقام اور ان کے پسماندگان کو صبر جمیل عطافرمائے ۔