وحدت نیوز (اسلام آباد) مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے باچاخان چوک کوئٹہ پر بم دھماکے اور سکیورٹی اہلکارو ں اور شہریوں کی قیمتی جانوں کے نقصان پر گہرے دکھ اور افسوس کا اظہار کیا ہے ۔ مرکزی سیکریٹریٹ سے جاری اپنے مذمتی بیان میں انہوں نے کہاکہ بلوچستان کو منظم پلاننگ کے تحت نا امن رکھنے کی سازش رچی جارہی ہے ۔ بھارتی اور افغانی خفیہ ادارے خطے میں امریکی ناپاک عزائم کی تکمیل کیلئے بلوچستان کو تختہ مشق بنائے ہوئے ہیں ۔
ان کا کہناتھاکہ کوئٹہ سمیت بلوچستان بھر میں مسلسل سکیورٹی اہلکاروں، شیعہ ہزارہ شہریوں اور عام عوام پر دہشت گردحملے وطن عزیز کو عدم استحکام سے دوچار کرنے اور پاکستان کی ترقی وخوشحالی کو کاری ضرب لگانے کی مذموم کوششیں ہیں ۔
انہوں نے مزیدکہاکہ مسلح افواج اور سکیورٹی اداروں نے پاکستان میں قیام امن کیلئے بے شمار قیمتی جانوں کے نذرانے پیش کیئے ہیں ۔ آج باچاخان چوک کوئٹہ پر دہشت گرد حملے میں شہید ہونے والوں کے غم میں ایم ڈبلیوایم برابر کی شریک ہے ۔ تمام شہداءکی مغفرت اور تمام زخمیوں کی فوری صحت یابی کیلئے اللہ تعالیٰ کی بارگاہ میں دعاگو ہیں ۔
