وحدت نیوز(لیہ) مجلس وحدت مسلمین پاکستان کے سر براہ علامہ راجہ ناصرعباس جعفری نے کہا ہے کہ پاکستان کو درپیش چیلنجز سے نپٹنے کے لئے عوام کا منظم ہونا ضروری ہے، وطن عزیز کے غیرت مند شیعہ سنی عوام کو ظالم ،کرپٹ اور قاتل حکمرانوں سے نجات حاصل کرنے کے لئے اکھٹا ہو نا ہو گا، پاکستان اس وقت بحرانوں کی آماجگاہ بن چکا ہے، خطرات و مشکلات کا حملہ اندرونی و بیرونی دونوں اطراف سے ہے، پاکستان کو اپنی خارجہ پالیسی پر نظر ثانی کر نا ہو گی، ایسی پالیسی مرتب کی جائے جس سے ہمارے پڑوسی ممالک ہم پر اعتماد کریں ، دیگر تین ممالک کو چھوڑ کر فقط بھارت سے دوستی ک پینگیں بڑھانا سمجھ سے بالاتر ہے، موجودہ حکومت کی ایک سالہ کارکردگی انتہائی مایوس کن ثابت ہوئی لوڈشیڈنگ، کرپشن، لوٹ مار، دہشت گردی  کا بازار گرم ہے، عام عوام کو درپیش مسائل کے حل کے لئے  کوئی موثر حکمت عملی مرتب ہی نہیں کی گئی،میاں نواز شریف اور شہباز شریف پاکستانی تاریخ کے جھوٹے ترین سیاست دان ثابت ہو ئے ہیں ،ان کا مذید کہنا تھا کہ گرینڈ اپوزیشن الائنس میں شمولیت کے حوالے سے حتمی مشاورت باقی ہے، ایم ڈبلیوایم حکومت کی ناقص پالیسیوں کے خلاف ماہ رمضان المبارک کے بعد احتجاجی تحریک کا آغاز کرے گی قوم آمادہ رہے، ان خیالات کا اظہار انہوں نے اٹھارہ روزہ دورہ پنجاب کے دوران سرزمین لیہ پر عظیم الشان عوامی جلسہ عام سے خطاب کرتے ہوئے کیا، اس موقع پر عوام کا جمع غفیر علامہ ناصر عباس جعفری کا خطاب سننے کے لئے موجود تھا جبکہ مرکزی سیکریٹری تبلیغات علامہ اعجاز بہشتی ، مرکزی سیکریٹری امور تنظیم سازی یعقوب حسینی ، مرکزی سیکریٹری روابط ملک اقرار حسین  اور سیکریٹری جنرل پنجاب علامہ عبد الخالق اسدی بھی موجود تھے۔

انہوں نےعلامہ ڈاکٹر طاہر القادری کوگھنٹوں یرغمال بنائے رکھنے عوامی تحریک کے کارکنان اور عوام الناس کو دن بھر ملک کے سڑکوں چوراہوں پر ہراساں کرنے کے عمل کو موجودہ حکمرانوں کی سیاسی خودکشی قرار دیتے ہوئے کہا کہ جلسے ،جلوس اور ریلیاں عوام کا جمہوری حق ہے موجودہ حکمرانوں کے اپنے سیاسی مخالفین کیخلاف آمرانہ سلوک سے یہ اندازہ ہوتا ہے کہ تین ادوار کے اقتدار اور سالوں کی جلاوطنی سے بھی کچھ نہیں سیکھا مسلم لیگ ن سیاسی سوچ و بصیرت سے خالی جماعت ہے ،پاکستان میں دہشت گرد مخالف قوتوں سے انتقام لیا جا رہا ہے، آپریشن ضرب عضب کی کامیابی انشااللہ یقینی ہے اور ہم اس ارض پاک سے وطن دشمنوں اور اُن کے حامیوں کے خاتمے میں اپنی بہادر فوج کیساتھ ہیں کیونکہ طالبان اور طالبانی سوچ اسلام اور پاکستان کے اصل دشمن ہے، قوم تیاری کرے انشاء اللہ ماہ مبارک رمضان کے بعد حکومت مخالف تحریک کا آغاز کریں گے ۔