وحدت نیوز(مظفرآباد) مجلس وحدت مسلمین آزاد کشمیر کے سیکرٹری جنرل علامہ سید تصور حسین نقوی الجوادی نے کہا ہے کہ دہشت گرد قابض بھارتی افواج نے صرف جون کے 12 ایام میں کم عمر بچوں سمیت 23 کشمیریوں کو بلا جواز قتل کردیا ہے۔ وحدت ہاوس مظفرآباد سے جاری اپنے ایک مذمتی بیان میں انہوں نے مقبوضہ جموں و کشمیر میں ہونے والی قتل و غارت، انسانی حقوق کی خلاف ورزیوں، لوٹ مار کے نت نئے واقعات، انسانیت سوز بڑھتے ہوئے سانحات کی روک تھام کے لئے اقوام متحدہ کے فوجی مبصرین، انسانی حقوق اور غیر جانبدار میڈیا پر مشتمل فیکٹ فائنڈنگ کمیشن کو مقبوضہ کشمیر کے شہری علاقوں تک رسائی دینے کا مطالبہ کیا ہے۔ ان کا کہنا تھا کہ پاک بھارت کشیدگی عالمی امن کے لئے خطرے کا باعث ہے اور بھارت پاکستان و کشمیر پر حملے کی تیاریوں میں مصروف ہے۔

علامہ تصور نقوی نے مزید کہا کہ اقوام متحدہ، او آئی سی اور انسانی حقوق کی علمبردار تنظیمیں مقبوضہ کشمیر میں بھارتی مظالم کا نوٹس لیں۔ حکومت پاکستان دنیا بھر کے ایوانوں میں مسئلہ کشمیر پر دسترس رکھنے والے قومی اسمبلی، سینٹ، آزاد کشمیر قانون ساز اسمبلی کے ممبران، الیکٹرانک و پرنٹ میڈیا اور دانشوروں پر مشتمل وفود بھیجنے کے علاوہ سفارتی محاذ پر جاندار حکمت عملی پر توجہ مبذول کرے۔ انہوں نے مقبوضہ جموں و کشمیر میں ہونے والی خون ریزی، لوٹ مار، چادر چار دیواری کا تقدس پامال کر کے خواتین کی بے حرمتی اور حریت کانفرنس کے رہنماؤں کی گرفتاریوں پر اپنے شدید ردعمل کا اظہار کیا۔