وحدت نیوز(مظفرآباد) مجلس وحدت مسلمین آزاد جموں و کشمیر کے زیر اہتمام وحدت سیکرٹریٹ مظفرآباد میں پُروقار تقریب، جشن آزادی مملکت خداداد پاکستان کے پرمسرت موقع پر تقریب میں سیکرٹری جنرل مجلس وحدت مسلمین آزاد جموں و کشمیر علامہ سید تصور حسین نقوی الجوادی کے علاوہ امامیہ آرگنائزیشن کشمیر ریجن کے ناظم سید اشتیاق سبزواری، آئی ایس او کے ڈویژنل صدر سید وقار کاظمی، سیکرٹری سیاسیات ایم ڈبلیو ایم آزاد کشمیر تصور عباس موسوی، سیکرٹری جنرل ضلع مظفرآباد مولانا طالب ہمدانی، خالد محمود عباسی، عابد قریشی ، عہدیداران و کارکنان کی کثیر تعداد نے شرکت کی، علامہ سید تصور حسین نقوی الجوادی نے وحدت سیکرٹریٹ پر پرچم کشائی کر کے تقریب کا افتتا ح کیا، جبکہ وحدت اسکاؤٹس اوپن گروپ کے دستے نے پرچمِ وطن عزیز کو سلامی پیش کی۔

بعد ازاں وحدت سیکرٹریٹ میں تقریب سے خطاب کرتے ہوئے سیکرٹری جنرل مجلس وحدت مسلمین آزاد کشمیر علامہ سید تصور حسین نقوی الجوادی نے کہا کہ آج کا دن خوشی و مسرت کا دن ہے، آج کے دن ہمارے بزرگوں نے مال و جان لٹاتے ہوئے ہمیں اس دھرتی سے سرفراز فرمایا، قائد اعظم ؒ محمد علی جناح کی انتھک محنتوں کے ثمر میں 14اگست کی شادمانیاں ہمیں نصیب ہوئیں، مملکت خداداد پاکستان کی محبت ہمارے دلوں میں کوٹ کوٹ کر بھری ہوئی ہے، پاکستانی سرزمین پر پیدا ہونے والا پاکستان سے محبت ورثے میں لیتا ہے جبکہ ہم اپنے چوائس سے پاکستان کو اپنا وطن مانتے اور اس سے لازوال محبت رکھتے ہیں ۔ ہماری منزل پاکستان ہے،آج کے دن ہم شہدائے ضرب عضب، شہدائے پاکستان اور شہدائے ملت اسلامیہ کو خراج تحسین پیش کرتے ہیں ،ضرب عضب میں شہید ہونے والے ہمارے سکون و مملکت کے باسیوں کو امن کی امانت لُٹانے کے لیئے اپنی جانوں کو پیش کررہے ہیں ، مجلس وحدت مسلمین اور قوم ان جوانوں کو آج کے دن یقین دلاتی ہے کہ ہم تمہارے ساتھ ہیں، وطن کے سپوتو! ہمیں تم پر فخر ہے۔

علامہ سید تصور جوادی نے کہا کہ ہمارا نعرہ کہ پاکستان بنایا تھا پاکستان بچائیں گے اس بات کی غمازی کرتا ہے کہ کل جسطرح ہمارے بڑوں نے اپنے خون سے ملک کو بنایا ، ہم اس ملک کے باسی شیعہ سنی باہم ملکر بچائیں گے ، اور کسی بھی خطرے کی صورت میں اپنی جانوں کی قربانی پیش کرنے کو تیار ہیں ۔ انہوں نے کہا کہ جسطرح ضرب عضب کی بھرپور حمایت کی ہے اسی طرح قائد وحدت کے اعلان کے مطابق کرپٹ و باہر ممالک میں بیٹھ کر اپنے ملک کی پالیسیاں بنانے والے حکمرانوں کے خلاف آپریشن ضرب ذوالفقارکے لیئے بھی بھرپور تیاری میں ہیں۔ تقریب سے سید اشتیاق سبزواری، سید تصور عباس موسوی، مولانا سید طالب ہمدانی ، سید وقار کاظمی و دیگر نے بھی خطاب کیا، آخر میں علامہ سید تصور حسین نقوی الجوادی نے دیگر مہمانانِ گرامی کے ہمراہ کیک کاٹ کر جشن آزادی کی اس پروقار تقریب کا اختتام کیا۔