وحدت نیوز(لاڑکانہ) رمضان المبارک کے جمعۃ الوداع پہ رہبر انقلاب امام روح الله الموسوی الخمینی علیہ الرحمہ کے حکم پر ملک بھر کی طرح لاڑکانہ میں بھی مجلس وحدت مسلمین کی جانب سے یوم القدس بھرپور انداز سے منایا جائیگا. اس سلسلے میں مجلس وحدت مسلمین پاکستان صوبۂ سندھ کے سیکریٹری جنرل علامہ مقصود علی ڈومکی نے آج پریس کلب لاڑکانہ میں پریس کانفرس کی اور اسرائیل کی جانب سے مسلمانوں کے قبلۂ اول بیت المقدس پہ ناجائز قبضے اور نہتے فلسطینیوں پہ ایک عرصے سے ڈھائے جانے والے مظالم کے خلاف 25 رمضان المبارک جمعہ نماز کے بعد القدس ریلی کے انعقاد کا اعلان کیا. اس موقعہ پر دیگر مذہبی و سیاسی جماعتوں کے سربراہان، جماعتِ اسلامی پاکستان صوبۂ سندھ کے ڈپٹي جنرل سیکریٹری کاشف سعید شیخ، سنی اتحاد کونسل اور جمیعت علماء پاکستان کے ضلعی سربراہ مولانا حافظ روشن انقلابی، پاکستان عوامی تحریک ضلع لاڑکانہ کے صدر عبدالعزیز نے بھی جمعۃ الوداع کو مجلس وحدت مسلمین کے ساتھ یوم القدس منانے اور قدس ریلی میں شرکت کا اعلان کیا.پریس کانفرنس میں مجلس وحدت مسلمین کے ضلعی سیکریٹری جنرل مولانا محمد علی شر سمیت دیگر ضلعی مسؤلین ممتاز علی کھیڑو، عبدالرزاق جلبانی، مشتاق علی میمن، جاوید فاضل حسینی، اعجاز علی سولنگی اور طارق رسول انڑ نے بھی شرکت کی.

وحدت نیوز(اسلام آباد )بیت المقدس پر اسرائیل کے غاصبانہ قبضے اور فلسطینی مسلمانوں پر صیہونی مظالم کے خلاف مجلس وحدت مسلمین کے زیر اہتمام ’’آزادی قدس منتظر وحدت امت مسلمہ کانفرنس‘‘ کا انعقاد ایک مقامی ہوٹل میں ہوا جس میں مجلس وحدت مسلمین کے سربراہ علامہ راجہ ناصر عباس جعفری نے اپنے صدارتی خطاب میں  کہا کہ بیت المقدس ہاتھ سے نکلنے پر یہ ثابت ہوا ہے کہ امت مسلمہ کی قوت صفر ہو چکی ہے۔اسرائیل و امریکہ کی رعونت کولبنان کی مٹھی بھر طاقت نے خاک میں ملا کر رکھ دیا۔عالم اسلام کو بدنام کر نے کے لیے داعش، النصرہ اور طالبان طرز کی دہشت گرد جماعتوں کی تشکیل کی گئی تا کہ دین اسلام کے روشن چہرے کو بدنما کر پیش کیا جا سکے۔

انہوں نے کہا کہ ایشا وسائل اور افرادی قوت کے اعتبار سے ایک بڑی منڈی ہے ۔یورپ اس خطے کو عدم استحکام کا شکار کرنے پر تلا ہوا ہے۔ایشیاء میں مختلف ممالک کے مابین تصادم یورپ کے لیے نفع بخش ہے اس لیے وہ سازشوں میں مصروف ہے۔ایشائی ممالک کو باہمی مسائل گفت و شنید سے حل کرنا ہوں گے۔ملک کو اس وقت دہشت گردی کے عفریت نے جکڑ رکھا ہے۔ ڈھائی ہزار دہشت گردوں کو مارنے سے دہشت گردی کا خاتمہ نہیں ہو گا۔ علامہ ناصر عباس نے کہاکہ  گزشتہ 47 دنوں سے میں بھوک ہڑتال پر ہوں ۔میرے سارے مطالبات ملک و قوم کے استحکام کے لیے ہیں ۔ہمارا کوئی سیاسی ہدف نہیں۔ ہم کسی حکومت کے خلاف احتجاج کرنے نہیں بیٹھے۔انہوں نے کہ کہ یوم القدس کے موقعہ پر ملک بھر میں مجلس وحدت مسلمین کے زیر اہتمام اجتماعات میں فلسطینی قوم کے ساتھ اظہار یکجہتی کیا جائے گا۔