وحدت نیوز (لاہور) مدارس جعفریہ پاکستان نے دہشت گردوں کے خلاف پاک فوج کے آپریشن ضرب عضب کی بھرپور حمایت کا اعلان کرتے ہوئے مطالبہ کیا ہے کہ آخری دہشت گرد کے خاتمہ تک آپریشن جاری رکھا جائے۔ مدارس جعفریہ پاکستان کا اجلاس لاہور میں ہوا جس کی صدارت علامہ سید حسین نجفی نے کی جب کہ مولانا حسنین عارف، مولانا ناظم رضا عترتی اور مولانا اقبال کامرانی نے خطاب کیا۔ اس موقع پر اظہار خیال کرتے ہوئے علامہ حسنین عارف نے کہا کہ پاکستان میں داعش کے حامی میڈیا پر آ کر دہشت گردوں کی حمایت میں بیانات دے رہے ہیں لیکن حکومت اور سکیورٹی ایجنسیاں ان کے خلاف کسی قسم کی کارروائی سے گریزاں ہیں۔ انہوں نے کہا کہ پشاور میں ہونے والا واقعہ اچانک نہیں ہوا بلکہ اس کے ڈانڈے اس روز سے ملتے ہیں جس دن پشاور میں داعش کے خیر مقدمی بینر لگائے گئے اور وال چاکنگ کی گئی۔ انہوں نے کہا کہ طلباء کے قتل عام کا انداز عراق میں داعش کی کارروائیوں سے ملتا جلتا ہے۔ علامہ حسنین عارف نے کہا کہ آپریشن کو ملک کے دیگر علاقوں میں بھی پھیلایا جائے اور دہشت گردوں کے حامیوں کو بھی گرفتار کر کے سزا دی جائے تاکہ دہشت گردوں کو کسی بھی جگہ پر حمایت حاصل نہ ہو سکے۔ انہوں نے کہا کہ مدارس جعفریہ پاکستان پشاور میں ہونے والے قتل عام کی مذمت کرتے ہیں، اور ان کے ذمہ داروں کے خلاف بھرپور کارروائی کا کا مطالبہ کرتے ہیں۔ انہوں نے کہا کہ دہشت گردوں کو سرعام پھانسی دی جائے تاکہ وہ دوسرے دہشت گردوں کے لئے عبرت کا نشان بن سکیں۔ اجلاس کے آخر میں شہدائے پشاور کے لئے فاتحہ خوانی اور لواحقین کے لئے صبر جمیل کی دعا کی گئی۔