وحدت نیوز (فیصل آباد) سنی اتحاد کونسل پاکستان کے چیئرمین صاحبزادہ حامد رضا نے کہا ہے کہ نواز شریف کرنسی اور ایجنسی کے بنائے ہوئے لیڈر ہیں، حکمرانوں نے بجلی مہنگی کر کے عوام دشمنی کا مظاہرہ کیا ہے، بجلی کے نرخوں میں بلاجواز اضافہ واپس لیا جائے۔ انہوں نے کہا کہ کابینہ میں ردوبدل سے مسئلہ حل نہیں ہو گا، پاکستان دشمنی میں واشنگٹن، دہلی اور کابل متحد ہو چکے ہیں۔ انہوں نے کہا کہ پاکستانی سرحدوں پر افغانستان، ایران اور بھارت کی سرحدوں پر چھڑپیں عالمی کھیل کا حصہ ہیں اور پاکستان دشمن قوتیں پاکستان اور ایران کو لڑانا چاہتے ہیں۔ انہوں نے کہا کہ واقعہ کربلا سے ظالم حکمرانوں کے خلاف لڑنے کا سبق ملتا ہے، بلوچستان میں امن وامان کی بگڑتی ہوئی صورت حال تشویشناک ہے۔

پیر طارق ولی چشتی اور پیر غلام مصطفی کی قیادت میں ملنے والے مشائخ سے گفتگو کرتے ہوئے انہوں نے کہا کہ بھارتی وزیر اعظم نریندر مودی آگ سے کھیل رہا ہے، امن کی آشا والے بتائیں کہ بھارت اسلحہ کے انبار کس کے خلاف لگا رہا ہے۔ انہوں نے کہا کہ 8 سو ارب کا بھارتی اسلحہ پاکستان کے خلاف استعمال ہو گا۔ دھرنوں نے حکومت کو عوام سے کئے گئے وعدے یاد دلائے ہیں، قوم کو بھارت نواز حکمران قبول نہیں۔ انہوں نے کہا کہ پاکستان کو دلیر وزیراعظم کی ضرورت ہے، امریکہ بھارت کا تحفظ کرنے کے لئے پاکستان کی ایٹمی صلاحیت  ختم کرنا چاہتا ہے۔