وحدت نیوز(پشاور) حیات آباد کے علاقے فیز فائیو میں یکے بعد دیگرے تین بم دھماکے ہوئے جس کے نتیجے میں متعدد افراد زخمی ہوگئے جبکہ ایک دھماکا مسجد میں نماز جمعہ کی ادائیگی کے دوران بھی ہوا۔ ذرائع کے مطابق پشاور کے علاقے حیات آباد میں مختلف مقامات پر تین دھماکے ہوئے جس میں ابتدائی اطلاعات کے مطابق 30 افراد زخمی ہو گئے۔ ابتدائی اطلاعات کے مطابق دو دھماکے امامیہ مسجد کے اندر نماز جمعہ کے دوران ہوئے جس میں 3 افراد شہید اور 30 سے زائد زخمیوں کی اطلاعات ہیں۔ ذرائع کے مطابق کچھ لوگوں نے امام بارگاہ سے متصل مسجد میں گرینڈوں سے حملہ کرنے کے بعد فائرنگ کی جبکہ ٹی وی نیوز کے مطابق حملہ خودکش تھا۔ ایس ایس پی آپریشنز ڈاکٹر میاں سعید کے مطابق ایک دھماکا مسجد کے قریب جبکہ دوسرا دھماکا پاسپورٹ آفس کے قریب ہوا اور تیسرے دھماکے کا تعین کیا جارہا ہے۔ دھماکے کے فوری بعد امدادی ٹیمیں جائے وقوعہ کی جانب روانہ ہوگئیں جبکہ دھماکے میں زخمیوں کو حیات میڈیکل کمپلیکس منتقل کر دیا گیا ہے۔