وحدت نیوز(اسکردو) منہاج القران کے مرکزی رہنما فرحت حسین شاہ نے مجلس وحدت مسلمین بلتستان کے زیر اہتمام یادگار شہداء اسکردو پر بیداری ملت و استحکام پاکستان کانفرنس سے خطاب کرتے ہوئے کہا کہ قرض اتارو ملک سنواروں کا نعرہ لگا کر پوری دنیا میں بیٹھے ہوئے پاکستانیوں کو بیوقوف بنا کر اربو ں روپے اکٹھے کرکے حکمرانوں نے صرف اپنی عیاشی کے اڈے بنائے اور ملک کا قرض بڑھتا ہی رہا مگر آج سکردو میں انسانوں کے ٹھاٹھیں مارتے ہوا سمندرسے ثابت ہو چکا ہے کہ اب بھی حکمران اپنی من مانیاں کریں اورانکو کوئی روکنے والانہ ہو آج تمام قوتیں اکٹھی ہو کر ایساآہنی ہاتھ بن جائیگا کہ اگرکسی نے یہاں کے عوام کے حقوق غضب کرنے کی بات بھی کی تو اسکی زبان کھینچ دی جائیگی ۔
ان کا مذید کہنا تھا کہ گلگت بلتستان کے محب وطن عوام کے ساتھ حکمرانوں کا استحصالی رویہ افسوس ناک ہے، اب تک بر سر اقتدار آنے والی کسی بھی جماعت نے اس خطے کو آئینی حیثیت دینے میں کوئی کردار ادا نہیں کیا، قدرتی وسائل سے مالا مال اس خطے کو حکمران دونوں ہاتھوں سے لوٹ رہے ہیں،پاکستان عوامی تحریک اور تحریک منہاج القرآن گلگت بلتستان کے عوام کے آئینی حقوق کی بحالی کی جدوجہد میں ایم ڈبلیو ایم کے شانہ بشانہ ہے، شیخ السلام ڈاکٹر محمد طاہر القادری پاکستان کے استحکام کی خاطر ایم ڈبلیو ایم سمیت تمام محب وطن سیاسی قوتوں کی سپورٹ کے لئے آمادہ ہیں ۔
