وحدت نیوز(ملتان) مجلس وحدت مسلمین پاکستان کے سربراہ سینیٹر علامہ راجہ ناصر عباس جعفری کی کال پر ملک بھر میں نماز جمعہ کے بعد حماس کے رہنما اسماعیل ہانیہ کی شہادت کے خلاف احتجاجی ریلی نکالی گئی، ریلی کی قیادت مجلس علما مکتب اہلبیت کے صوبائی صدر علامہ قاضی نادر حسین علوی، مولانا غلام جعفر انصاری، صوبائی رہنما انجینئر سخاوت علی سیال، وسیم عباس زیدی، حسنین انصاری، ضلعی صدر فخر نسیم نے کی۔ ریلی امام بارگاہ ابو الفضل العباس سے چوک کمہاراں والا تک نکالی گئی، ریلی کے شرکا نے امریکہ و اسرائیل کے خلاف نعرے بازی کی۔

احتجاجی ریلی سے خطاب کرتے ہوئے علامہ قاضی نادر حسین علوی نے کہا کہ حماس کے رہنما اسماعیل ہانیہ کی شہادت اسرائیل کی نابودی کا سبب بنے گی، پاکستانی قوم حماس اور فلسطینی مسلمانوں کے دکھ میں برابر کی شریک ہے، عالم اسلام کو امریکہ و اسرائیل کے خلاف متحد ہونے کی ضرورت ہے، دشمن سمجھتا ہے اسماعیل ہانیہ کو شہید کر کے فلسطینی مسئلے کو کمزور کر دے گا یہ اس کی بھول ہے، اسماعیل ہانیہ کے بعد سینکڑوں مجاہد پیدا ہوں گے، اسرائیل نابود ہو کے رہے گا۔ ریلی سے ضلعی صدر فخر نسیم نے بھی خطاب کیا۔ اس موقع پر مہر مظہر عباس کات، مولانا غدیر شیرازی، مولانا علی سبطین، مولانا علی رضا حسینی اور دیگر موجود تھے۔