وحدت نیوز(پاراچنار) انجمن حسینیہ نے مجلس وحدت مسلمین کے شہید رہنماء علامہ دیدار علی جلبانی کے قتل کی شدید الفاظ میں مذمت کرتے ہوئے دہشتگردوں کیخلاف فوری طور پر کارروائی شروع کرنے کا مطالبہ کیا ہے۔ پارا چنار میں انجمنِ حسینیہ کا ایک ہنگامی اجلاس زیرِ صدارت سیکرٹری حاجی یوسف حسین منعقد ہوا۔ جس میں کراچی میں ٹارگٹ کلنگ میں علامہ دیدار علی جلبانی کی شہادت کی مذمت کی گئی اور حکومت سے پرزور مطالبہ کیا گیا کہ ملتِ تشیع کا قتلِ عام روکا جائے اور علامہ دیدار علی جلبانی کے قتل میں ملوث افراد اور راولپنڈی میں امام بارگاہوں کو جلانے والے دہشت گردوں کے خلاف کارروائی عمل میں لائی جائے، ان کو سزائیں دی جائیں۔ اجلاس میں حاجی ہدایت حسین، حاجی ابرار حسین، حامِد حسین اور کاظم حسین جان نے بھی خطاب کیا اور علامہ دیدار علی جلبانی کے قتل کی پرزور مذمت کی۔