وحدت نیوز(کوئٹہ)  تحریک منہاج القرآن پاکستان کے مرکزی رہنما علامہ سید فرحت حسین شاہ نے کہا ہے کہ پاکستان میں دہشت گردوں کا راج ہے، محب وطن قوتوں پر حملے عالمی استعماری ممالک کا بین الاقوامی ایجنڈہ ہے، طالبانی سوچ کو ہم پر مسلط کر نے کی کوشش کی جارہی ہے، پاکستان میں شیعہ سنی لڑائی جھگڑا قطعاً کہیں نہیں ، ایک مخصوص انتہا پسند سوچ پاکستان کو عدم استحکام سے دوچار کر نے میں مصروف ہے ،ہمارے دل پاکستان میں دہشت گردی کا نشانہ بننے والےشیعہ  ہزارہ بھائیوں کے ساتھ دھڑکتے ہیں، تحریک منہاج القرآن امن کے قیام اور دہشت گردی کے خاتمے کی قومی مہم میں مجلس وحدت مسلمین اور سنی اتحاد کو نسل کے شانہ بشانہ کھڑی ہے، پاکستان کے خوارج کیلئے واحد علاج شیخ الاسلام علامہ ڈاکٹر طاہرالقادری کا وہ تاریخ ساز فتویٰ ہی ہے جس پر عمل کرکے پاکستانی قوم اس ناسور سے نجات پاسکتے ہیں۔ ان خیالات کا اظہار انہوں نے مجلس وحدت مسلمین پاکستان کے زیر اہتمام علمدار روڈ پر منعقدہ پیام شہداء و اتحاد امت کانفرنس سے خطاب کر تے ہو ئے کیا ۔

ان کاکہنا تھا کہ یزیدی سوچ و فکر کے حامل خارجی دہشت گردو ٹولے کا خاتمہ ناگزیر ہو چکا ہے، ملک میں مسلسل دہشت گرد کاروائیاں پاکستان کی جڑوں کو کھوکلا کر نے کی شازش ہے، حکومت اور ریاستی ادارے پاکستان کے استحکام اور بقاء کی خاطر اپنا مخلصانہ کردار اداکرے، عالمی سطح پر پاکستان کو بد نام کر نے کے لئے بیرون ممالک سے دہشت گردوں کی بٹالین تیار کر کے پاکستان میں بے گناہ شہریوں کے قتل عام کے لئے اتاری گئی، طالبان ناسور کائنات ہیں ، مختلف ممالک میں طرح طرح کے نقاب اوڑھ کر یہ مفصد فی ارض مظلوموں کے قتل عام میں مصروف ہیں ۔ انہو ں نے طالبان سے حکومتی مذاکرات کو قومی خیانت قرار دیتے ہو ئے کہا کہ ۵۰۰۰۰سے زائد بے گناہ عوام اور افواج پاکستان کے کون سے ساتھ حکمرانوں کی غداری کو عوام کبھی معاف نہیں کریں گے۔ جن کا عقیدہ جمہوری اقدار کے منافی ہو ان کے مذاکرات بے سود ہیں ۔

بلوچستان میں دہشت گردی کا شکار ہو نے والے شیعہ ہزارہ بھائیوں کے غم میں تحریک منہاج القرآن بھی شامل ہے، پاکستان میں بے گناہو ں کے قتل عام کی سخط الفاظ میں مذمت کرتے ہیں ، ہزارہ برادری اور شیعہ برادری پاکستان کے آئینی شہری ہیں جن کے حقوق تمام مسالک کی طرح مساوی ہیں ، دہشت گردی کے خلاف اور پاکستان میں امن کے قیام کے لئے پوری تحریک منہاج القرآن شیخ الاسلام علامہ ڈاکٹر طاہرالقادری کی قیادت میں مجلس وحدت مسلمین اور سنی اتحاد کونسل کے شانہ بشانہ ہرمیدان میں حاضر ہے، جب کبھی کسی میدان میں ہماری ضرورت ہو گی ہم حاضر ہو نگے۔