The Latest
وحدت نیوز(سکردو) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے اپنے ایک بیان میں کہا کہ کامیاب شٹرڈاون اور پہیہ جام ہڑتال کے انعقاد پر انجمن تاجران بلتستان کے سربراہ اور تمام ممبران کو تبریک پیش کرتے ہیں کہ انہوں نے ٹیکس کے اس ظالمانہ اقدام کے خلاف موثر اور ٹھوس اقدام اٹھا کر واضح کر دیا کہ عوام ظلم اور معاشی قتل پر خاموش نہیں رہنے والی۔ آغا علی رضوی نے ودہولڈنگ ٹیکس کے خلاف انجمن تاجران جس طرح کے اقدام اٹھائے ہم ان کے ساتھ کھڑے ہیں اور اس تحریک کو منطقی انجام تک پہنچا کے دم لیں گے۔ ود ہولنڈنگ ٹیکس حکومت کا ظالمانہ اقدام اور عوام کا معاشی قتل ہے جس پر کبھی خاموش نہیں رہا جا سکتا ۔ حکومت ایک طرف گلگت بلتستان پاکستان کا حصہ سمجھنے سے انکار کرتی ہے اور دوسری طرف ٹیکسز لاگو کر کے حقوق سے محروم اس غریب اور مظلوم عوام کا عرصہ حیات تنگ کرنا چاہتی ہے ہم واضح کر دینا چاہتے ہیں کہ ہم نہ گلگت بلتستان میں گندم سبسڈی کا خاتمہ ہونے دیں گے اور نہ کسی قسم کا ٹیکس لگنے دیں گے، گلگت بلتستان کے عوام پر ٹیکس عائد کرنا انسانی اورعالمی قوانین کی سنگین خلاف ورزی ہے جسے کبھی برداشت نہیں کریں گے۔
وحدت نیوز(اسلام آباد) مجلس وحدت مسلمین پاکستان کے مرکزی جنرل سیکرٹری علامہ راجہ ناصر عباس جعفری نے کراچی میں چوبیس گھنٹے کے دوران دہشت گردی کے دو مختلف واقعات میں سینئر صحافی آفتاب عالم اور جیو نیوز کے انجینئر ارشد جعفری کی ٹارگٹ کلنگ پر گہرے افسوس کا اظہار کرتے ہوئے اسے بزدلانہ اقدام قرار دیا ہے۔انہوں نے کہا کہ صحافی برادی کے افراد کو یوں نشانہ بناکر حق و سچ کی آواز کو دبایا نہیں جا سکتا۔دہشت گرد عناصر خواہ کسی بھی روپ میں ہوں ان کے خلاف حق وصداقت کے علمبردار اپنی آواز بلند کرتے رہیں گے۔کراچی میں دہشت گردی کے خلاف جاری آپریشن اپنے منطقی انجام سے قبل کسی صورت ختم نہیں ہو گا۔کراچی میں ہونے والے دہشت گردی کے واقعات میں کالعدم مذہبی جماعتیں ملوث ہیں۔ان جماعتوں کے خلاف بھی آپریشن کیا جانا چاہیے جو نام بدل کر فرقہ وارنہ سرگرمیوں میں مصروف ہیں۔حکومت سیاسی مصلحتوں کوبالائے طاق رکھتے ہوئے قانون و انصاف کی بالادستی کو یقینی بنائے۔ماضی میں سیاسی مفادات کے حصول کے لیے پورے ملک کو ان قوتوں کے رحم و کرم پر چھوڑا گیا جو کھلم دہشت گرد عناصر کی حمایت کرتے رہے جس سے ملک دشمن عناصر کے حوصلوں کو تقویت ملی۔کراچی میں امن و امان کے حقیقی قیام کے ایسے تمام عناصر کے خلاف بلا تخصیص اور فوری کاروائی انتہائی ضروری ہے۔
وحدت نیوز (اسلام آباد) مجلس وحدت مسلمین پاکستان کے مرکزی سیکریٹری امور تربیت علامہ سید احمد اقبال رضوی نے کہا کہ سپریم کورٹ آف پاکستان کی جانب سے اردو کو پاکستان کی سرکاری اور دفتری زبان قرار دینے کے فیصلےپر خوشی اوراطمنان کا اظہار کرتے ہوئے کہا کہ سپریم کورٹ کے فیصلے سےسڑسٹھ برس بعد اردوکو اس کا جائز مقام ملنا قابل تحسین اقدام ہے،تمام اقوام عالم کو اپنی زبانوں پر فخر ہے اور ہمیں بھی اپنی مادری زبان کی ترویج واشاعت میں دوسروں پر سبقت لے جانے کی کوشش کرنی چاہئے،بین الاقوامی دورہ جات اور تقریبات میں ہمارے حکمرانوں کیلئے انگریزی زبان کے استعمال کے بجائے اردو زبان کا استعمال قابل فخر ہونا چاہیئے،ہمارے تمام قوانین اور دستاویزات کا ترجمہ کسی اور زبان کے بجائے ہماری مادری زبان اردو میں ہونا چاہئے تاکہ عام پاکستانی با آسانی اسے پڑھ اورسمجھ سکے،پاکستان کے قیام میں بھی اردو زبان نے اہم کردار ادا کیا، اردوادب سے وابستہ متعددشخصیات نے نثرنگاری اور شاعری کے زریعے برصغیر کے مسلمانوں میں سامراج سے مقابلے کیلئے مثبت پیغامات تحریر کیئے، اس بات میں کوئی شائبہ نہیں کہ اردو زبان اپنے اندر علوم کا بہترین خزینہ سموئے ہوئے ہے۔
وحدت نیوز (کراچی) مجلس وحدت مسلمین کے مرکزی سیکریٹری تبلیغات اورخطیب ولایت علامہ شیخ اعجاز بہشتی نے کراچی سمیت اندرون سندھ کے مختلف اضلاع کا دس دوزہ تفصیلی تبلیغی دورہ کیا، دورے کے پہلے مرحلے میں انہوں نے کراچی کے تمام اضلاع میں مختلف عوامی اجتماعات اور مجا لس عزا سے خطاب کیا، جب کہ مختلف شخصیات سے مرحومین کے انتقال پر تعزیت کی ، جبکہ نمائش چورنگی پر ایم ڈبلیوایم کراچی ڈویژن کے زیراہتمام منعقدہ یوم دفاع پاکستان کی خصوصی تقریب میں شرکت کی، بعد ازاں وہ اندرون سندھ کے دورے پر روانہ ہوئےجہاں انہوں نے ایم ڈبلیوایم کے تحت مختلف اضلاع جن میں حیدرآباد، ماتلی،دادو،سہون،بھٹ شاہ،نوشہروفیروز، قاضی احمداور دولت پور میں عوامی اجتماعات سے خطاب کیا اور درگاہ حضرت لعل شہباز قلندرؒاور حضرت شاہ عبدالطیف بھٹائی ؒ پر ھاضری بھی دی اس موقع پر ایم ڈبلیوایم کے صوبائی رہنما ظہیر حیدر زیدی، شفقت لانگااور ندیم جعفری بھی موجود تھے۔
وحدت نیوز (کوئٹہ) مجلس وحدت مسلمین پاکستان کوئٹہ ڈویژن کی طرف سے جاری کردہ بیان میں کونسلر کربلائی رجب علی نے گذشتہ روز بلوچستان بور ڈآفس کے سامنے سراپہ احتجاج طلباء پر پولیس کی شیلنگ کا تذکرہ کرتے ہوئے کہاہے کہ پولیس ان شیلنگ کا استعمال طلباء کے بجائے شر پسند عناصر پر کرے تو ملک میں امن بحال ہوسکتا ہے،نہتے طلباء پر شیلنگ غیر آئینی اور غیر انسانی سلوک ہے. ملک کے مستقبل کے معمار یہی طلباء ہے جن پر شیلینگ ہو رہی تھی. دنیا بھرمیں طلباء کو قدر کی نگاہ سے دیکھا جاتا ہے وہی پاکستان کے اندر ان طلباء پر تشد د ہوتا ہے، ان پر ان کے اپنے محافظ تشدد کرتے ہیں. بیان میں مزید کہا گیا کہ پہلے تو بلوچستان بورڈ نے نا اہلی کا مظاہرہ کرتے ہوئے طلباء کے ساتھ ان کے امتحانات اور نتائج میں زیادتی کی.طلباء کی بڑی تعداد کو فیل کر دیا اور جب طلباء مجبور ہو کر اپنی آواز بلند کرتے ہوئے سڑکوں پر نکل آئے اور اپنا حق مانگنے لگے تو انہیں تشدد کا نشانہ بنایا گیا جو کہ قابل مذمت ہے کیونکہ احتجاج ہر شخص کا آئینی اور قانونی حق ہے اگر کوئی محکمہ قانون شکنی کی قوت رکھتا ہے تو اسکا مطلب یہ ہرگز نہیں کہ وہ یہ کام کرے اور اپنے قوت کا غلط استعمال کرے انہوں نے آخر میں کہاہے کہ حکومت بلوچستان کو چاہئے کہ بلوچستان بورڈ کے کارکردگی کا جائزہ لے اور ان کے بہتر کارکردگی کیلئے کام کریں اور بلوچستان بورڈ کو آگاہ کریں کہ آئندہ اس قسم کے کاموں سے گریز کرے.
وحدت نیوز (پشاور) صوبائی سیکرٹری جنرل مجلس وحدت مسلمین صوبہ خیبر پختونخوا علامہ سبطین حسینی نے صوبائی کابینہ کا اجلاس طلب کر لیا۔ جاری بیان کے مطابق اجلاس 13 ستمبر 2015ء بروز اتوار جامعۃ شہید عارف حسین الحسینی پشاور میں ہوگا۔ بیان میں مزید کہا گیا ہے کہ مذکورہ اجلاس میں صوبائی سیکرٹری جنرل علامہ سبطین حسینی آئندہ کا لائحہ عمل اور دیگر تنظیمی امور پر اہم فیصلے کریں گے۔ یاد رہے کہ صوبائی کابینہ کا اجلاس اس سے پہلے دو مرتبہ طلب کیا گیا تھا، تاہم چند ناگزیر وجوہات کی بنا پر انعقاد پذیر نہ ہوسکا۔
وحدت نیوز (مانٹرنگ ڈیسک ) رہبر انقلاب اسلامی نے جمعرات کو مجلس خبرگان یا ماہرین کی کونسل کے سربراہ اور نمائندوں سے ملاقات میں پارلیمنٹ میں مشترکہ جامع ایکشن پلان کا جائزہ لیے جانے کی ضرورت پر تاکید کی ہے-
رہبر انقلاب اسلامی آیت اللہ العظمی خامنہ ای نے اس ملاقات میں مشترکہ جامع ایکشن پلان کا جائزہ لیے جانے کے طریقہ کار اور اسے منظور یا مسترد کئے جانے کے بارے میں کوئی سفارش نہیں کی-
رہبر انقلاب اسلامی نے پابندیوں کو برقرار رکھنے پر مبنی امریکی حکام کے بیانات کے بارے میں تاکید کے ساتھ کہا کہ مذاکرات کا مقصد، پابندیاں اٹھایا جانا تھا- اگر ہم نے مذاکرات کے دوران بعض مواقع پر لچک کا مظاہرہ کیا اور بعض مراعات دیں تو یہ اس لیے تھا کہ پابندیاں اٹھائی جائیں ورنہ ہم اپنی انیس ہزار سینٹری فیوج مشینوں کو بہت کم وقت میں پچاس سے ساٹھ ہزار سینٹری فیوج مشینوں تک پہنچا سکتے تھے اور یورینیم کی بیس فیصد افزودگی بھی جاری رکھ سکتے تھے-
رہبر انقلاب اسلامی آیت اللہ العظمی سید علی خامنہ ای نے مزید فرمایا کہ علاقے میں امریکیوں کی جملہ پالیسیوں میں مزاحمت و استقامت کی طاقت کو پوری طرح ختم کرنا اور شام و عراق پر مکمل تسلط حاصل کرنا ہے اور انھیں توقع ہے کہ اسلامی جمہوریہ ایران بھی اس دائرے میں داخل ہو جائے گا لیکن ایسا ہرگز نہیں ہو گا-
آپ نے ممالک کے حکام اور فیصلہ کرنے کا اختیار رکھنے والی شخصیتوں پر اپنی جعلی اصطلاحات و الفاظ کو مسلط کرنے کے لئے عالمی سامراج کے پروپیگنڈے کے بارے میں اہم نکات کی جانب اشارہ کیا-
رہبر انقلاب اسلامی کے بقول، تسلط پسند نظام کی زبان اور اصطلاح میں دہشت گردی اور انسانی حقوق جیسے الفاظ خاص مفھوم رکھتے ہیں - ان کی زبان اور اصطلاح میں یمن کے عوام پر مسلسل چھ مہینوں سے جاری حملے اور غزہ کے بےگناہ عوام کا قتل، دہشت گردی نہیں ہے اور ووٹ کا حق مانگنے کی بنا پر بحرینی عوام کی سرکوبی، انسانی حقوق کی خلاف ورزی شمار نہیں ہوتی ہے!
رہبر انقلاب اسلامی نے مزید فرمایا کہ تسلط پسند نظام کی زبان اور اصطلاح میں لبنان اور فلسطین میں مزاحمت و استقامت کی جانب سے جائز دفاع، دہشت گردی شمار ہوتا ہے لیکن علاقے میں امریکہ کے قریبی اور استبدادی ممالک کے اقدامات، انسانی حقوق کے برخلاف نہیں ہیں-
آیت اللہ العظمی خامنہ ای نے کہا کہ ان کی زبان اور اصطلاح میں ایٹمی سائنسدانوں کا قتل بھی کہ جس کا صیہونیوں نے تقریبا کھل کر اعتراف کیا ہے اور بعض یورپی ممالک نے بھی اس اقدام میں مدد کرنے میں اپنے کردار کو تسلیم کیا ہے، دہشت گردی شمار نہیں ہوتا ہے-
وحدت نیوز (سکردو) سیلاب سے تنگ گلگت بلتستان کے عوام پر گندم کی قیمتوں میں اضافہ بڑا ظلم ہے،گندم پر سبسڈی وفاقی حکومت یا کسی جماعت کااحسان نہیں بلکہ گلگت بلتستان کے عوام کا جائز حق ہے،ان خیالات کا اظہار مجلس وحدت مسلمین بلتستان ڈویژن کے سیکریٹری جنرل علامہ سید علی رضوی نے وحدت ہاوس میں ڈویژنل کونسل کے اجلاس سے خطاب کرتے ہوئے کیا۔
ان کا کہنا تھا کہ مسلم لیگ ن کی حکومت عوام کے منہ کا نوالہ چھینے کی کوشش میں ہے، ہمارے خدشات درست ثابت ہو گئےہیں ،ن لیگ کی پالیسیاں ہمیشہ ہی انسان کش رہی ہیں،ن لیگ کی قیادت نے ہمیشہ ذاتی مفادات کو قومی مفادات پر ترجیح دی ہے، گلگت بلتستان کی نو منتخب ن لیگی حکومت گندم کی قیمتیں بڑھا کر عوام کا گلا کھونٹنے کی کوشش میں مصروف ہے،مجلس وحدت مسلمین کسی صورت اس عوام دشمن سازش کو کامیاب نہیں ہو نے دے گی،پارٹی کے تینوں اراکین اسمبلی گندم کی قیمتوں میں اضافےکے خلاف شدید احتجاج کریں گےاور عوامی حقوق کا دفاع کریں گے۔
وحدت نیوز (سکھر) مجلس وحدت مسلمین صوبہ سندھ کے سیکریٹری امور سیاسیات عبداللہ مطہری نے حسن ہاوس سکھرمیں ملاقات کیلئے آنےوالے پاکستان عوامی تحریک اورپاکستان تحریک انصاف کے وفود سے گفتگو کرتے ہوئے کہا کہ مجلس وحدت مسلمین سندھ کے عوام کو ان کے غصب شدہ حقوق دلوانے کیلئے بلدیاتی انتحابات کے میدان کو خالی نہیں چھوڑے گی، سندھ کے محروم عوام کو بااختیار بنانے کیلئے ایم ڈبلیوایم ہم خیال سیاسی و مذہبی جماعتوں کے ساتھ سیٹ ٹوسیٹ ایڈجسٹمنٹ کے لئے آمادہ ہے، ہماری کوشش ہے کہ دین دار، با تقویٰ اور قابل امیدوار میدان میں اتارے جائیں تاکہ سندھ کے عوام کوانکے جائز حقوق دلوانے میں معاون ثابت ہو سکیں ۔
وحدت نیوز (اسلام آباد) مجلس وحدت مسلمین پاکستان کے مرکزی جنرل سیکرٹری علامہ راجہ ناصرعباس جعفری نے کہا ہے کہ نیشنل ایکشن پلان سے مطلوبہ نتائج اور فیصلہ کن اہداف تب ہی حاصل ہو سکیں گے جب اس قانوں کو سیاسی ضرورتوں سے بالاتر ہو کر صرف اور صرف دہشت گرد قوتوں کے خلاف استعمال کیا جائے گا۔اگر اس قانون کو انتقامی حربے کے طور پر استعمال کیا گیا تو بہت جلد اس کی افادیت زائل ہو جائے گی۔کراچی سمیت ملک کے دیگر صوبوں میں جہاں جہاں فوج کی نگرانی میں آپریشن جاری ہیں وہاں وہاں حوصلہ افزا کامیابیاں ہو رہی ہیں لیکن پنجاب کے مختلف اضلاع میں میں نیشنل ایکشن پلان پر عمل درآمد کی آڑ میں بیلنس پالیسی زور پکڑتی ہوئی دکھائی دے رہی ہے۔حکومت پنجاب دہشت گردوں کے سرپرستوں کو خوش کرنے کے لیے ملت تشیع کے محب وطن گناہ افراد کو گرفتا ر کرنے میں مصروف ہے جو سراسر زیادتی اور پنجاب میں دانستہ طور پر فرقہ واریت پھیلانے کی ایک منظم سازش ہے۔محرم سے قبل ملت تشیع کے افراد کو ہراساں کرنے کی کوشش کی جا رہی ہے تا کہ عزاداری کو محدود کیا جا سکے۔انہوں نے کہا کہ عزاداری سید الشہداء کی راہ میں کسی قسم کی رکاوٹ کو برداشت نہیں کیا جائے گا۔ہم ملک میں قانون کی بالادستی چاہتے ہیں لیکن قانون پر عمل درآمد کے نام پر کسی غیر منصفانہ طرز عمل کو قبول نہیں کیا جائے گا۔
