وحدت نیوز(جعفرآباد)مجلس وحدت مسلمین یونٹ بشام خان لہر ضلع جعفر آباد کے زیر اہتمام مدرسہ المصطفی خاتم النبیین صلی اللہ علیہ و آلہ وسلم میں ایک روزہ اسلام شناسی ورکشاپ منعقد ہوئی۔ اسلام شناسی ورکشاپ سے خطاب کرتے ہوئے مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کہا کہ دین کی معرفت ہر انسان کے لئے لازمی ہے مجلس وحدت مسلمین کے کارکنوں کو دینی تعلیم و تربیت پر خصوصی توجہ دینی چاہئے۔
انہوں نے کہا کہ رجب المرجب کا مہینہ تزکیہ و تہذیب نفس کے لئے بہترین مہینہ ہے قرآن کریم نے واضح طور پر اعلان کیا کہ کامیاب وہ ہوا جس نے نفس کو پاکیزہ بنالیا اور وہ ناکام ہوا جس نے نفس کو گناہوں میں آلودہ کیا۔انہوں نے کہا کہ مجلس وحدت مسلمین کے زیر اہتمام ملک گیر توسیع تنظیم مہم کے موقع پر یونٹس نو نکاتی پروگرام پر عمل درآمد کو یقینی بنائیں مسجد محور یونٹ کا مقصد کارکنوں کی مساجد سے تعلق کو مستحکم کرنا ہے۔انہوں نے کہا کہ مضبوط تنظیم ہی کے ذریعے ملت کے حقوق کا دفاع کیا جا سکتا ہے۔
