وحدت نیوز (اسلام آباد) مجلس وحدت مسلمین پاکستان کے زیراہتمام تین روزہ مرکزی "پیام وحدت کنونشن" کا آج اسلام آباد میں آغاز ہو گیاہے، جس میں شرکت کے لئے کراچی، کوئٹہ اور پشاور سمیت ملک بھر سے اسی سے زائد اضلاع شرکت کر رہے ہیں۔ کنونشن 8 اپریل تا 10 اپریل تک جامع امام الصادق جی نائن ٹو اسلام آباد میں جاری رہے گا۔ تنظیمی کارکنان و عہدیداران کے علاوہ ملک بھر سے علماء کرام اور نامور مذہبی، سماجی و سیاسی شخصیات بھی شرکت کریں گی۔ یہ کنونشن اس اعتبار سے بھی انتہائی اہمیت کا حامل ہے کہ ایم ڈبلیو ایم کے مرکزی سیکرٹری جنرل کا انتخاب بھی اسی کنونشن کے موقع پر عمل میں آئیگا۔ تنظیمی منشور کے مطابق ہر تین سال بعد مجلس وحدت مسلمین کے مرکزی سیکرٹری جنرل کا تقرر کیا جاتا ہے۔ دستور کے مطابق ہر تین سال بعد تمام صوبے اپنی جانب سے شوریٰ عالی کو نئے سیکرٹری جنرل کیلئے دو، دو نام ارسال کریں گے، اسی طرح مرکزی کابینہ بھی اپنی جانب سے دو نام ارسال کرے گی، جس پر شوریٰ عالی دیئے گئے ناموں میں سے دو نام اور اپنی طرف سے ایک نام شامل کرکے تین نام مرکزی شوریٰ میں پیش کرے گی۔ مرکزی شوریٰ ان تین ناموں سے ایک نام کو مرکزی سیکرٹری جنرل کے طور پر چن لے گی، دستور کے مطابق 51 فیصد سے زائد ووٹ لینے والا امیدوار تنظیم کا نیا سیکرٹری جنرل قرار پائیگا۔