وحدت نیوز(پاراچنار) مجلس وحدت مسلمین شعبہ تنظیم سازی کے وفد نے مرکزی سیکرٹری تنظیم سازی یعقوب حسینی کی قیادت میں پاراچنار کا دورہ کیا، اس موقع پر ایم ڈبلیو ایم شعبہ تنظیم سازی کے رکن علی رضا طوری، سیکرٹری تنظیم سازی خیبر پختونخوا علامہ سید وحید عباس کاظمی اور ایم ڈبلیو ایم پاراچنار کے سیکرٹری جنرل ریاض حسین بنگش بھی ان کے ہمراہ تھے۔ دورہ پاراچنار کے دوران وفد نے مختلف ملی تنظیموں کے رہنماوں، علمائے کرام، اور شخصیات سے ملاقاتیں کیں، ان ملاقاتوں میں پاراچنار کی صورتحال اور تنظیمی ڈھانچے کے حوالے سے گفتگو ہوئی۔ یعقوب حسینی، علی رضا طوری، علامہ وحید عباس کاظمی اور ریاض حسین نے تحریک حسینی پاراچنار کے سرپرست اعلیٰ اور سابق سینیٹر علامہ سید عابد حسین الحسینی، انجمن حسینیہ کے سیکرٹری گل اکبر، مدرسہ جعفریہ کے علامہ غلام شاکری، انصار الحسین کے رہنما منصب علی اور مجلس علمائے اہلبیت (ع) کے رہنماوں کیساتھ ملاقاتیں کیں۔ علاوہ ازیں وفد نے ایم ڈبلیو ایم پاراچنار کے سیکرٹری جنرل ریاض حسین بنگش کیساتھ بھی تنظیمی امور کے حوالے سے نشست کی۔