وحدت نیوز(لاہور) ہم اپنے عظیم شہداء کی قربانیوں کو رائیگاں نہیں جانے دینگے،ارض پاک کی حفاظت ہمارے ایمان کا حصہ ہے،دہشتگردوں کی پشت پناہی امریکہ بھارت اور اسرائیل کر رہا ہے،پاکستان امت مسلمہ کے لئے ایک امید کی کرن ہے،دشمن امت مسلمہ کو آپس میں دست گریباں کر کے اپنے مذموم مقاصد کی تکمیل چاہتا ہے،ان خیالات کا اظہار مجلس وحدت مسلمین پنجاب کے سیکرٹری جنرل علامہ مبارک موسوی نے صوبائی سیکرٹریٹ میں منعقدہ یوم دفاع پاکستان کے تقریب سے خطاب کرتے ہوئے کیا،انہوں نے کہا کہ یوم دفاع پاکستان شہداء کے پاکیزہ لہو اور ارض پاک سے عہد و پیماں کا دن ہے،ان قوموں کو زوال سے کوئی نہیں بچا سکتا جو اپنے شہداء کو فراموش کرتے ہیں،ہم رہتی دنیا تک اپنے شہداء کو فراموش نہیں ہونے دینگے،دہشتگردی کے خلاف جنگ کو منطقی انجام تک پہنچانا ہو گا،نیشنل ایکشن پلان پر مکمل علمدرآمد کو یقینی بنائے بغیر دہشت گردی کے عفریت سے جان چھڑانا ممکن نہیں،بدقسمتی سے ملکی سلامتی و بقا کی جنگ کو اپنے انجام تک پہنچانے میں ہم آج بھی مصلحت پسندی کا شکار ہے،دہشت گردوں کے سہولت کار اور سیاسی سرپرست اب بھی آزاد ہیں،یہاں ظالم اور مظلوم کو ایک ہی لاٹھی سے ہانکنے کا عمل جاری ہے،ہمیں یہ یاد رکھنا ہوگا کہ حکومتیں کفر سے تو باقی رہ سکتی ہیں مگر ظلم سے نہیں،تقریب میں مجلس وحدت مسلمین پنجاب اور لاہور ڈویژن کے رہنماوں اور کارکنوں کی بری تعداد نے شرکت کی ،شہدائے پاکستان کے درجات کی بلندی کے لئے فاتحہ خوانی و دعائیہ محفل کا بھی اہتمام کیا گیا ۔