وحدت نیوز (لاہور)  مجلس وحدت مسلمین پاکستان کے سربراہ علامہ راجہ ناصر عباس جعفری کے حکم پر آج ملک بھر میں یوم ایفائے شھدائے پاکستان منایا گیا پنجاب کے مختلف اضلاع میں احتجاجی مظاہرے اور شہداء سے اظہار یکجہتی کے لیے شمعیں روشن کی گئی۔ لاہور میں باب العلم امام بارگاہ نشاط کالونی، ویلنشیا ٹاؤن، امامیہ کالونی اور مسلم ٹاؤن موڑ فیروز پور روڈ پر مجلس وحدت مسلمین کے کارکنان خواتین اور بچوں نے شہداء سے اظہار یکجہتی کرتے ہوئے شمعیں روشن کی اور دیئے جلا کر شہداء کے خون سے عہد کیا کہ وقت آنے پر ہم اپنی جانیں تک ملک و قوم کی استحکام اور سر بلندی کے لیے قربان کرنے کو تیار ہے ۔مظاہرین سے خطاب کرتے ہوئے ڈپٹی سیکرٹری جنرل پنجاب سید اسد عباس نقوی نے کہا کہ شہداء کے پاک لہو سے آج تجدید عہد کرکے اس قوم نے ثابت کر دیا کہ ہم شہید پرور قوم اور شہادت کو اپنی طاقت اور کامیابی کا زینہ سمجھتے ہیں۔ انہوں نے کہا کہ ملت جعفریہ پاکستان ہمیشہ سے قربانیاں دیتی آئی ہے۔ ہم نے پاکستان بنایا تھا ہم ہی پاکستان کے اصلی وارث ہیں۔ ہم کسی ملک دشمن تکفیری گروہ کو پاکستان کی سر زمین پر کامیاب نہیں ہونے دیں گے۔

شہداء کی یاد میں منعقد ہ تقریب سے خطاب کرتے ہوئے ضلع لاہور کے سیکر ٹری جنرل علامہ سید امتیاز حسین کاظمی نے کہا کہ شہادت ہمارا ورثہ ہے جو ہماری ماؤں نے ہمیں دودھ میں پلایا ہے۔ شہداء ملت کا پاک لہو اس قوم کی سر بلندی اور وقار کی ضمانت ہے۔ وطن دشمن تکفیری دہشت گردوں کو ہمارے ساتھ خون کی ہولی کھیلنے کی کھلی چھٹی دے دی گئی ہے۔ علامہ امتیاز کاظمی نے کہا کہ حکومت اور ایجنسیاں ہوش کے ناخن لیں اور ہمارے قاتلوں کے سر پر ہاتھ نہ رکھیں ورنہ ہمیں اپنا دفاع کرنا بھی آتا ہے اور اپنا حق چھیننا بھی۔ شرکاء نے طالبان طالبان ظالمان ظالمان، دہشت گردی مردہ باد کے نعرے بھی لگائے۔