وحدت نیوز(کراچی) مجلس وحدت مسلمین کراچی ڈویژنل کونسل کا اہم اجلاس صوبائی سیکریٹریٹ وحدت ہاؤس سولجربازار میں منعقد ہوا جس میں مرکزی وائس چیئرمین علّامہ سیّد احمد اقبال رضوی، مرکزی پولیٹیکل سیکریٹری سیّد اسد عباس نقوی خصوصی طور پر اسلام آباد اور لاہور سے تشریف لاکر شریک ہوئے جبکہ صوبائی صدر سندھ علّامہ سیّد باقر عباس زیدی، صوبائی نائب صدر علامہ مختار امامی ، ڈویژنل صدر کراچی علّامہ صادق جعفری سمیت جملہ اراکین ڈویژنل کابینہ ، تمام ضلعی صدور اور جنرل سیکریٹری صاحبان نے بھی شرکت کی۔
اجلاس میں فیصلہ کیا گیا کہ پارٹی دستور کی روشنی میں تنظیمی سیٹ اپ کو اضلاع کے نیچے تحصیل (ٹاؤن) اور یونین کونسل یا یونین کمیٹی کی سطح پر تشکیل دیا جائے، شہر بھر کے تمام اضلاع میں جنرل ورکرز اجلاس کے انعقاد کو یقینی بناکر توسیع تنظیم و ممبر سازی مہم کو تیز کیا جائے اور تمام طبقہ ہائے زندگی سے تعلق رکھنے والی شخصیات اور عوام کو مجلس وحدت مسلمین پاکستان کے پلیٹ فارم میں شمولیت کی دعوت دی جائے۔
