وحدت نیوز(کراچی) سندھ یونائیٹڈ پارٹی کے وفد نے صدر سندھ یونائیٹڈ پارٹی و کنوینر دریائے سندھ بچاؤ تحریک کی قیادت میں مجلس وحدت مسلمین کے صوبائی صدر سندھ علامہ باقر عباس زیدی سے مجلس وحدت مسلمین کے صوبائی سیکریٹریٹ میں ملاقات کی، سید زین شاہ نے علامہ باقر زیدی کو دریائے سندھ پر قبضے اور 6 کینال نکالنے کے منصوبے پر سندھ کو درپیش سنگین خطرات سے آگاہ کیا اور دریائے سندھ بچاؤ تحریک میں شمولیت کی دعوت دی جس پر علامہ باقر زیدی نے پانی جیسے بنیادی انسانی مسئلے پر اپنا واضع موقف پیش کرتے ہوئے دریائے سندھ بچاؤ تحریک کی حمایت کا اعلان کیا۔ وفد میں منیر حیدر شاہ، جگدیش آہوجا، رمضان برڑو، خواجہ نوید آمین جبکہ ملاقات میں مولانا مختار امامی، ناصر الحسینی و دیگر موجود تھے۔

ملاقات میں رہنماؤں نے دریائے سندھ سے مزید 6 کینال نکالنے کی پرزور مذمت کرتے ہوئے کہا کہ اس سندھ دشمن منصوبہ کو کسی صورت برداشت نہیں کریں گے۔ دریائے سندھ جو صدیوں سے رواں دواں ہے اور کروڑوں لوگوں کے روزگار کا ذریعہ ہے غیر قانونی نہریں نکالنے کی وجہ سے سوکھ رہا ہے۔ گرین پاکستان اینیشیٹو کی نام پر دریا سندھ کے پانی پر ڈاکہ ڈالنے کی کوشش کی جارہی ہے۔ پہلے ہی دریائے سندھ کا پانی سمندر میں نہیں پہنچ رہا جس کی وجہ سے ٹھٹہ اور بدین اضلاع کی لاکھوں ایکڑ زمین سمندر نگل چکا ہے اور اب انڈس بیسن اریگیشن سسٹم پر مزید کینال سندھ کو بنجر بنانے کی سازش ہے جسے ہم کامیاب نہیں ہونے دیں گے۔

اس موقع پر ملکی و بین الاقوامی حالات پر بھی تفصیلی تبادلہ خیال کیا گیا خصوصا پارہ چنار کے حوالے سے زین شاہ صاحب کو مکمل آگاہی دی گئی جس پر انہوں نے پارہ چنار کے ظالمانہ محاصرے کی مذمت کی اور فوری طور پر اس ظالمانہ محاصرے کو ختم کرنے کا مطالبہ کیا۔