وحدت نیوز (کراچی) مجلس وحدت مسلمین پاکستان کراچی ڈویژن  کے مولانا صادق جعفری رشید ترابی پارک میں منعقدہ جشن عید غدیرسے خطاب کرتے ہوے کہا کہ عالم اسلام کو عید غدیر کے با مسرت موقع پر  18اٹھارہ ذوالحج تا24چوبیس ذوالحج ہفتہ ولایت منانے کا اعلان کرتے ہیں۔

رہنماؤں کا کہنا تھا کہ حجۃ الوداع کے روز پیغمبر اکرم ؐ کے توسل سے خدا نے دین کو مکمل کر دیا اور حضرت محمد ؐ نے تاریخی خطب ہ ارشاد فرمایا جس میں ولایت حضرت امیر المومنین علی ابن ابی طالب علیہ السلام کے سپرد کی گئی۔

علامہ صادق جعفری کاکہنا تھا کہ اٹھارہ ذوالحج کی مناسبت سے عید غدیر کے عنوان سے ملک بھر کی طرح کراچی شہر میں بھی چراغاں، سیمینارز، لیکچرز اور دیگر تربیتی پروگرام سمیت محافل میلاد کا انعقاد کیاجارہا ہے اور جس میں اٹھارہ ذوالحج کی اہمیت کے عنوان پر علماء اور اسکالرز خطابات کریں گے اور اس عظیم عید کی اہمیت کو اجاگر کریں گے۔

رہنماؤں نے مزید کہا کہ مسلم امہ کے اتحاد اور یگانگت کے لئے عید غدیر کا موقع انتہائی اہمیت کا حامل ہے تاہم تمام مسلمانوں کو چاہئیے کہ اس موقع پر غدیر اور ولایت کا حق ادا کرتے ہوئے اپنا کردار ادا کریں جبکہ مجلس وحدت مسلمین کے رہنما مولانا ملک غلام عباس، علامہ مبشر حسن، زین رضا،مولانا نشان حیدر ،مولانا حیات عباس بھی موجود تھے۔