وحدت نیوز(کوئٹہ)مجلس وحدت مسلمین بلوچستان کے سر براہ علامہ مقصود علی ڈومکی نے کہا ہے کہ N.F.Cایوارڈ میں بلوچستان کی غربت اور پسماندگی کو مد نظر رکھا جائے وسائل کی تقسیم میں آبادی کے ساتھ ساتھ رقبے کو بھی اہمیت دی جائے ۔انہوں نے مطالبہ کیا کہ N.F.Cایوارڈ کے سلسلے میں چھوٹے صوبوں کے مطالبات کو بھی شامل کیا جائے ۔
درایں اثناء علامہ مقصود علی ڈومکی نے شاہ نورانی، سارونہ اور گرد و نواح میں قحط اور سیلابی ریلے سے قیمتی جانوں کے نقصان پر افسوس کا اظہار کرتے ہوئے ، حکومت سے مطالبہ کیا ہے کہ وہ سیلابی ریلے کے متاثرین کے گھروں کی تعمیر اور مالی نقصانات کو پورا کرنے کے لیے اقدامات کرے ،انہوں نے مختلف فلاحی اداروں سے بھی اپیل کی کہ وہ کھلے آسمان تلے بیٹھے افراد کی مدد کو پہنچیں۔
درایں اثناء علامہ مقصود علی ڈومکی نے سالانہ فلسطین کانفرنس کے سلسلے میں جماعۃالدعوۃ بلوچستان کے امیر مولانا مفتی محمد قاسم، جماعت اہل سنت بلوچستان کے رہنماء سید حبیب شاہ چشتی، جمیعت اتحاد العلماء بلوچستان کے صدر قاضی فخر الدین ،پاکستان مسلم لیگ کے رہنماء ارباب ہاشم کانسی، سردار اکبر خروٹی کو دعوت دی ہے۔ اس موقع پر انہوں نے کہا کہ امت مسلمہ اپنے اتحاد و اتفاق کے ذریعہ اسلام دشمن سامراجی قوتوں کے عزائم ناکام بنا سکتی ہے، قبلہ اول بیت المقدس کی آزادی کی جدوجہد میں پوری امت مسلمہ متحد ہے۔
