یکم جولائی ملت جعفریہ کی عظمت کا دن ہے، قرآن و سنت کانفرنس پاکستان دشمن قوتوں کے لئے ناامیدی کا دن ہے، یکم جولائی خوف اور ناامیدی کے خیبر کو شکست دینے کا دن ہے، ان خیالات کا اظہار مجلس وحدت مسلمین پاکستان کے مرکزی سیکریٹری جنرل علامہ ناصر عباس جعفری نے ایم ڈبلیو ایم لاہور کے رہنماؤں سے قرآن و سنت کانفرنس کی تیاریوں کے سلسلے میں بریفنگ کے موقع پر کیا۔ اس موقع پر مرکزی سیکریٹری امور جوانان علامہ اعجاز حسین بہشتی اور پنجاب کے سیکریٹری جنرل علامہ عبدالخالق اسدی بھی موجود تھے۔ علامہ ناصر عباس جعفری کا کہنا تھا کہ سرزمین پاکستان میں آئے روز کی ٹارگٹ کلنگ میں شیعہ مسلمانوں کی نسل کشی، امریکی مداخلت، بڑھتی ہوئی فرقہ واریت، لوڈشیڈنگ اور دیگر ملکی مسائل کے پیش نظر منعقدہ قرآن و سنت کانفرنس میں، ملت جعفریہ ان معاملات کے حل کے لئے اپنا لائحہ عمل پیش کرے گی، ان کا کہنا تھا کہ افسوس کے ساتھ کہنا پڑتا ہے کہ ہمارے ملک کے حکومتی ادارے اور ایجنسیاں بھی ملک کی سلامتی کے لئے کوئی کام نہیں کر رہی ہیں، ملک میں بڑھتی ہوئی امریکی مداخلت اور فرقہ واریت ہماری ایجنسیوں کی ناکامی کا منہ بولتا ثبوت ہے۔ انکا کہنا تھا کہ اب بھی وقت ہے اگر ہمارے سکیورٹی ادارے اپنی پالیسی کا تعین کرتے ہوئے امریکی مداخلت کو روکنے کے لئے اقدامات کریں تو شاید انکی بچی کچھی عزت کی بحال میں مددگار ثابت ہو، انہون نے مزید کہا کہ قرآن و سنت کانفرنس پاکستان کے باشعور شہری کی امیدوں کے پورا ہونے کا دن ہے کہ جب پاکستان کے محب وطن شہری اس وطن کے تحفظ کے لئے اپنی تمام تر توانائیوں کے ساتھ میدان میں موجود ہوں گے اور یہ ثابت کریں گے کہ ہمارا ہر نوجوان اس سرزمین سے امریکی مداخلت اور فرقہ واریت کے خاتمے اور وحدت کے پیغام کے پرچار کے حاضر ہے۔ ایم ڈبلیو ایم کے مرکزی سیکرٹری جنرل نے کہا کہ ہم نے مینار پاکستان پر شہید قائد علامہ عارف حسین الحسینی کی یاد کو تازہ کرتے ہوئے قرآن و سنت کانفرنس کا اعلان کرکے خوف کے خیبر کو شکست دے دی ہے، یکم جولائی طاغوت کے زرخرید غلاموں کی شکست اور ملت جعفریہ کی عظمت کے اعلان کا دن ہے۔ انہوں نے کہا کہ ہم نے اپنی درس گاہ کربلا کو قرار دیا ہے اور اس راہ میں ہمارا معلم شہید عارف حسینی ہے، اسی لئے شہید حسینی کے معنوی فرزند دشمن کا اس وقت تک تعاقب کریں گے کہ جب تک اس کی نابودی کی خبر دنیا میں عام نہ ہو۔

ملت جعفریہ کا ملک گیر اجتماع قرآن و سنت کانفرنس یکم جولائی کو مینار پاکستان لاہور میں ہوگا، ان خیالات کا اظہار مجلس وحدت مسلمین پاکستان کے رہنماں علامہ شیخ حسن صلاح الدین، علامہ مرزا یوسف حسین، علی اوسط ، مولانا علی انوار، اصغر زیدی نے منگل کو کراچی پریس کلب میں پریس کانفرنس سے خطاب کرتے ہوئے کیا۔ انہوں نے کہا کہ ملک بھر میں جاری ملت جعفریہ کی ٹارگٹ کلنگ، ملک میں بڑھتی ہوئی امریکی مداخلت، مہنگائی، بے روزگاری، کرپشن اور دیگر تمام مسائل کے خلاف جعفریہ کا اجتماع، قرآن و سنت کانفرنس یکم جولائی کو لاہور میں مینار پاکستان پر ہوگا۔ایم ڈبلیو ایم کے رہنماوں کا کہنا تھا کہ ضرورت اس امر کی ہے کہ ملک بھر میں بسنے والی وہ تمام اکائیاں، ملتیں اور محب وطن قوتیں، جنہوں نے مملکت خداداد کے قیام میں اہم کردار ادا کیا، وطن عزیز کے استحکام کی خاطر میدان عمل میں سامنے آئیں۔ ملت جعفریہ پاکستان وطن عزیز کے دفاع اور استحکام کے لیے صف اول کا کردار ادا کرتی رہے گی اور مملکت کے عدم استحکام کے خلاف سازشوں کا منہ توڑ جواب دیتی رہے گی۔بانی پاکستان قائداعظم محمد علی جناح، راجہ صاحب محمود آبادی کی محنتوں کو رائیگاں نہیں جانے دیا جائے گا اور ملک میں اسلام دشمن اور ملک دشمن قوتوں کے ناپاک منصوبوں اور عزائم کو شکست سے دوچار کر دیں گے۔ انہوں نے کہا کہ قرآن و سنت کانفرنس کی تیاریاں اپنے عروج پر ہیں اور ملک بھر میں مجلس وحدت مسلمین پاکستان کے کارکنان کانفرنس کی تیاریوں میں دن رات مصروف ہیں، سنت کانفرنس میں شرکت کے لیے ملک بھر میں علمائے کرام، عمائدین کو دعوت نامے جاری کر دیئے گئے ہیں، کانفرنس میں شرکت کے لیے قافلے 29 جون کو روانہ ہوں گے

ملک میں بڑھتی ہوئی لاقانونیت، کرپشن، ملت تشیع کی ٹارگٹ کلنگ، دہشتگردی، فرقہ واریت اور امریکی مداخلت کے خلاف ملت جعفریہ کی ملک گیر تنظیم مجلس وحدت مسلمین یکم جولائی کو مینار پاکستان کے سائے تلے قرآن و سنت کانفرنس منعقد کر رہی ہے، جس کے لیے تیاریاں تکمیل کے آخری مراحل میں ہیں۔ کانفرنس میں تمام سیاسی و مذہبی جماعتوں کے راہنما شریک ہونگے، جنھیں دعوت نامے بھجوا دیے گئے ہیں۔ اس بات کا اعلان مجلس وحدت المسلمین کے مرکزی ترجمان علامہ سید حسن ظفر نقوی نے علامہ عبدالخالق اسدی، علامہ ابوذر مہدوی، علامہ محمد اقبال کامرانی، علامہ اظہر حسن، سید ناصر عباس شیرازی، سید اسد عباس نقوی اور مظاہر شگری کے ہمراہ لاہور پریس کلب میں مشترکہ پریس کانفرنس سے خطاب کرتے ہوئے کیا۔علامہ سید حسن ظفر نقوی نے کہا کہ پنجاب حکومت نے قرآن و سنت کانفرنس کے انعقاد کے لیے اجازت دے دی ہے، پنجاب پولیس بھی بھرپور تعاون کر رہی ہے، لیکن جس طرح اہل تشیع کو مختلف مقامات پر نشانہ بنایا گیا ہے اس کے پیش نظر خدشات ہیں کہ ملک بھر سے آنے والے قافلوں پر حملے ہوسکتے ہیں۔ انہوں نے کہا کہ عالمی سازش کے تحت اہل تشیع کو مساجد، مذہبی مقامات اور سڑکوں پر نشانہ بنا کر شہید کیا گیا ہے، اس لیے ہماری آئی جی پولیس پنجاب سے گزارش ہے کہ وہ آنے والے قافلوں کی حفاظت کے لیے خصوصی احکامات دیں۔ ایک سوال پر مجلس وحدت مسلمین کے مرکزی ترجمان نے بتایا کہ کانفرنس کا مقصد وطن عزیز کے خلاف ہونے والی سازشوں اور فرقہ واریت کا خاتمہ ہے، اس کے ساتھ ملکی استحکام اور دفاع وطن کے لیے تن من دھن قربان کرنے کا عہد کرنا ہے۔ انہوں نے کہا کہ امریکی مداخلت کے باعث ملک بدامنی کا شکار ہے اور بیرونی کے ساتھ ساتھ ملک کے خلاف اندرونی سازشیں بھی عروج پر ہیں اور ملک دشمن عناصر ملک میں فرقہ واریت پھیلا کر ملک کو خانہ جنگی کا شکار کرنا چاہتے ہیں، قرآن و سنت کانفرنس اتحاد امت میں سنگ میل ثابت ہوگی اور ہم دنیا کو بتائیں گے کہ ہم پاکستانی اور سب مسلمان متحد ہیں۔ انہوں نے کہا کہ ملت جعفریہ پاکستان کو یہ اعزاز حاصل ہے کہ ماضی میں بھی استحکام پاکستان کے لئے کردار ادا کیا ہے اور آئندہ بھی بیرونی و اندرونی سازشوں کا منہ توڑ جواب دیتی رہے گی۔ رہنماں نے کہا کہ ملت جعفریہ اپنے ابا و اجداد قائد اعظم محمد علی جناح، راجہ صاحب محمود آباد، محمد علی حبیب اور مرزا ابوالحسن اصفہانی اور دیگر کی محنت رائیگاں نہیں جانے دے گی۔
مجلس وحدت مسلمین کے رہنماں نے کہا کہ پاکستان ملت تشیع نے بنایا تھا اور اس کی حفاظت بھی ملت تشیع کر رہی ہے، کل جنہوں نے قیام پاکستان کی مخالفت کی تھی آج وہی لوگ پاکستان کو عدم استحکام کرنے کیلئے بھی دشمن کے آلہ کار بنے ہوئے ہیں، لیکن ہم دشمن کی تمام سازشوں کا منہ توڑ جواب دیں گے، اس کیلئے اتحاد امت بہت بڑا ہتھیار ہے۔ انہوں نے کہا کہ یکم جولائی کو مینار پاکستان گرانڈ میں قرآن و سنت کا یہ عظیم اجتماع ملک دشمن عناصر کیلئے واضح پیغام ہوگا۔ انہوں نے کہا کہ کانفرنس میں شرکت کیلئے ملک بھر سے علمائے کرام اور عمائدین کو چھ ہزار سے زائد دعوت نامے دیے گئے ہیں۔رہنماں نے کہا کہ قرآن و سنت کانفرنس میں ملت جعفریہ اس عزم سے شریک ہوگی کہ وطن عزیز کے خلاف ہونے والی سازشوں کا قلع قمع کیا جائے اور ملک کو عدم استحکام کا شکار ہونے سے بچایا جائے، اس کیلئے ہم اپنا تن من دھن تک قربان کرنے کیلئے آمادہ ہیں۔ انہوں نے کہا کہ ہم ملک دشمن کسی بھی قوت امریکہ اسرائیل اور بھارت کو کسی طور یہ اجازت نہیں دیں گے کہ وہ وطن عزیز کے امن و امان کو تہہ بالا کریں، قرآن و سنت کانفرنس ملکی تاریخ میں ایک نیا باب روشن کرے گی اور تمام مذاہب کو وحدت کا پیغام دینے کے ساتھ ساتھ ملک دشمن اور اسلام دشمن قوتوں کو بے نقاب کرنے میں سنگ میل ثابت ہوگی۔