وحدت نیوز(مانٹرنگ ڈیسک) مجلس وحدت مسلمین پاکستان کے سیکرٹری امور خارجہ حجة الاسلام والمسلمین سید شفقت شیرازی نے کہا ہے کہ پاکستان کے ریاستی اداروں میں تکفیری سوچ کے حامل افراد کا اثر و رسوخ بڑھ گیا ہے جو اس وقت پاکستان کے اندر شیعہ اور بریلوی مسلمانوں کے قتل عام کی بڑی وجہ ہے ۔

انہوں نے کہا کہ ہم نے ملک بنایا تھا اور ہم ہی اس ملک کے محافظ بھی ہیں ، جس کی قیمت ہمیں اس ملک میں اپنے خون سے چکانا پڑ رہی ہے ، شہید بھی ہم ہوں اور احتجاج پر جیلیں بھی ہم بھگتیں ، یہ کہاں کا انصاف ہے؟؟؟

اتحاد بین المسلمین کے داعی اور انتہائی محترم شخصیات آیت اللہ شیخ محسن علی نجفی اور علامہ محمد امین شہیدی کے نام فورتھ شیڈول میں شامل کر نا اور ان کے اکاونٹس منجمد کرنا انصاف کے بنیادی اصولوں کے نہ صرف منافی ہے بلکہ مظلوموں کے ساتھ ظلم بھی ہے ، موجودہ دہشتگردی کے واقعات کی ایک وجہ حکومتی بیلنس پالیسی ہے جس سے دہشتگرد تکفیری طبقے کے حوصلے مذید بڑھ رہے ہیں یہ سب حکومتی غلط پالیسوں کا شاخسانہ ہے ۔ظالم اور مظلوم کے ساتھ ایک جیسا سلوک ہمیں قطعا قبول نہیں ہے۔

حکومت کی جانب سے ملک کے وفادار شیعہ اور سنی مسلمانوں کو سعودی عرب کی ایماء پردیوار سےلگانے کی کوشش کی جا رہی ہے جو ہمارے لئے کسی طرح بھی قابل قبول نہیں۔

ریاستی اداروں میں موجود تکفیری عناصر نے فوج کا ضرب عضب آپریشن اور حکومت کا قومی ایکشن پلان مکمل طور پر ناکام بنا دیا ہے ۔

اللؤلؤة ٹی وی کی اردوسروس کو ٹیلی فونک انٹرویو کے دوران حالیہ دہشت گردی اورعلماء کی گرفتاریوں پرکراچی میں شدید احتجاج کےسوال کے جواب میں کہنا تھا کہ ہمیں ملک میں جمہوری انداز میں احتجاج کرنے کی سزا دی جا رہی ہے کیا سیاست دانوں اوردیگرمذہبی رہنماوں جن میں عمران خان اور طاہر القادری بھی شامل ہیں كيا انهوں نےسڑکوں پرکبھی احتجاج نہیں کیا؟؟ دھرنا نہیں دیا ؟؟ سڑکوں کو بلاک نہیں کیا؟؟ ان کو تو حکومت نے کبھی گرفتار نہیں کیا اور اگر ہم اپنے اوپر ہونے والے ظلم و ستم پرآ واز بھی اٹھاتے ہیں تو ہمارے رہنماوں اور کارکنوں کو گرفتار کر کے جیلوں میں ڈال دیا جاتا ہے۔

علامہ مرزا یوسف حسین اورعلامہ احمد اقبال رضوی کا اس کے علاوہ کیا قصور ہے کہ انہوں نے شیعہ قتل عام پر احتجاج کیلئےآوازبلند کی تھی؟؟ محض زبانی احتجاج پر گرفتاری یہ کہاں کا انصاف ہے ؟؟

ایک سوال کے جواب میں انہوں نے کہا کہ جب دہشتگردوں کو تزویراتی اثاثہ بنانے کی پالیسی بنائی گئی تھی تب بھی شیعہ اور سنی ظلم کا شکار بنے اور جب وہی اثاثے اب ملک دشمن کے ہاتھوں کھیل رہے ہیں تو تب بھی انہیں ختم کرنے کی بجائے ملک کے وفادار شیعہ اور سنیوں پر ہی ظلم و ستم کے پہاڑ توڑے جارہے ہیں ۔

ہزاروں شیعہ کارکنوں اور مجالس عزا کے بانیوں ، اور درود وسلام پڑھنے پر سینکڑوں سنی بھائیوں کے خلاف ایف آئی آر کا اندراج اس کا بین ثبوت ہے كه حکومت کی جانب سے ظالم اورمظلوم کوایک ہی پلڑے میں تولا جا رہا ہے اوراس مقصد کیلئےغیرمنصفانہ اورجانبدرانہ بیلنس پالیسی کا سہارا لیا جاتا ہے ۔

ان کا مذید کہنا تھا کہ ملک کا سب سے بڑا المیہ یہی رہا ہے کہ اس کو قائد اعظم کے بعد کبھی کوئی مخلص قیادت دستیاب نہیں ہو سکی، لوٹ مار کا بازار گرم کرنے والے آجکل ہمارے حکمران ہیں ۔انہوں نے کہا کہ میاں نواز شریف کی جب بھی حکومت آتی ہیں تو شیعوں پر مظالم اور ان کے قتل عام کے واقعات بڑھ جاتے ہیں۔ نواز شریف کی حکومت ہمیشہ دہشتگرد تکفیری گروہ کی پناہ گاہ ثابت ہوتی رہی ہے۔

علامہ سید شفقت شیرازی کا کہنا تھا كه پاکستان میں حالیہ دہشتگری کے پیچھے سعودی حکمرانوں کا ہی ہاتھ ہے سعودی ریال کا کمال ہے۔ بھرپورعوامی احتجاج کےباعث یمن کیلئے جب سعودی عرب کو کرائے کیلئے پاکستانی فوج دستیاب نہ ہو سکی تو اس کے بعد انہوں نے اپنا غم و غصہ نکالنے کیلئے پاکستان میں ایک بار پھر تکفیری گروہ پر نئی سرمایہ کاری کرتے ہوئے انہیں متحرک کردیا تاکہ پاکستان میں امن کو تہس نہس کرکے اس ملک کے وفادارعوام کو سزا دی جائے۔

سعودی عرب کے ولی عہد محمد بن سلیمان ، امام کعبہ اور سعودی وزیر خارجہ کے اوپر نیچے پاکستان کے دورے اسی منصوبہ بندی کا حصہ تھے۔ جس کے بعد ملک میں شیعہ اور سنی نامور شخصیات کا قتل، مجالس عزا پر حملے ، شیعہ خواتین پر کوئٹہ اور کراچی میں حملے عزاداروں کی شہادت اسی منصوبہ بندی کا نتیجہ ہے۔

سید شفقت شیرازی نے کہا کہ پاکستان کسی ایک مسلک نے نہ تو بنایا اورنہ ہی کسی ایک مسلک کیلئے بنایا گیا تھا ۔ اوراب سعودی ریالوں کے ذریعے اس ریاست کوایک مسلکی ریاست بنانے کی کوشش کی جا رہی ہے جس کی پاکستان کی غیورعوام مزاحمت جاری رکھیں گے۔

انہوں نے ایک سوال کے جواب میں کہا کہ مجلس وحدت مسلمین پاکستان کا پیغام ہی وحدت ہے اورہم مسلمانوں کے درمیان وحدت اور اتحاد کیلئے اپنا مشن جاری رکھیں گے اوراس مقصد کیلئے ہرقسم کی قربانی پہلے بھی دی ہے اور اب بھی دیں گے ہم اصول پرست لوگ ہیں اور اصولوں کی خاطر جینا اورمرنا بخوبی جانتے ہیں۔

حالیہ دہشت گردی کے حملے پوری پاکستانی قوم پر حملے ہیں، حکمران یاد رکھیں کہ حکومتیں کفر سے تو قائم رہ سکتی ہیں مگرظلم سےنہیں،پاکستانی عوام صبر و استقامت کےساتھ ملک کے امن اور ترقی اورسلامتی کے دشمنوں کے خلاف اپنی جد وجہد جاری رکھیں۔

تحریر۔۔۔۔علامہ ڈاکٹرشفقت حسین شیرازی